4
Unqꞌa chusbꞌal uvaꞌ nik ichus unqꞌa chulin yoleꞌ
1 Pet alel kan taꞌn u Tiixhla Espíritu uvaꞌ at uxhchil la ijalpu vitxumbꞌaleꞌ tiꞌ inimat unqꞌa jikla yoleꞌ tu vimoxtebꞌal unqꞌa qꞌiieꞌ. As aꞌeꞌ uvaꞌ at veꞌt oꞌ stuul cheel. Tan ninima veꞌt unqꞌa uxhchileꞌ unqꞌa ichusbꞌal unqꞌa subꞌuleꞌ uvaꞌ la eesan vitxumbꞌaleꞌ tu bꞌey
2 taꞌn unqꞌa chulin yoleꞌ uvaꞌ kaꞌvatz kuxhtuꞌ. As yeꞌ nibꞌen ste uvaꞌ vaꞌlexh kuxh vitxumbꞌaleꞌ nibꞌaneꞌ.
3 As ni tal unqꞌa chulin yoleꞌ uvaꞌ yeꞌ la uch teqꞌot tibꞌ unqꞌa najeꞌ tukꞌ umaj ixoj. As at echbꞌubꞌal uvaꞌ yeꞌ la uch techbꞌuleꞌ uveꞌ ni taleꞌ. As Tiixh kat aqꞌon unqꞌa echbꞌubꞌaleꞌ sqe, aqꞌal uvaꞌ la qaqꞌ taꞌntiixh te Aak stiꞌ. As la qechbꞌu, jankꞌal oꞌ uvaꞌ oꞌ niman tetz Aak uvaꞌ ootzimal isuuchil viyol Aakeꞌ sqaꞌn,
4 tan kajayil unqꞌa echbꞌubꞌaleꞌ uvaꞌ kat icheesa Aak as bꞌaꞌneꞌ uvaꞌ la qechbꞌu. As yeꞌ la uch qixvataꞌ. Pet aal la qaqꞌ taꞌntiixh te u Tiixheꞌ stiꞌ. As la qechbꞌu,
5 tan ni tal viyol Aakeꞌ uvaꞌ qetz unqꞌa echbꞌubꞌaleꞌ skajayil. As la qaqꞌ taꞌntiixh te u Tiixheꞌ stiꞌ.
Ni tal u Pablo itxumbꞌal u Timoteo
6 Tan asoj lachus unqꞌa yoleꞌ uvaꞌ ni val see te unqꞌa qitzꞌin qatzikeꞌ, as axh umaꞌl u bꞌaꞌnla lochonaal kꞌatz u Jesucristo la ibꞌaneꞌ. As la iyakꞌinsa axh u chusbꞌaleꞌ taꞌn unqꞌa jikla yoleꞌ tukꞌ unqꞌa jikla chusbꞌaleꞌ uveꞌ nimamal aꞌn.
7 As yeꞌ la anima unqꞌa yoleꞌ uvaꞌ cheenal kuxhtuꞌ, tan yeꞌl kuxh itxaꞌkeꞌ. Pet yaꞌlu eebꞌ tiꞌ abꞌanat u bꞌaꞌneꞌ vatz u Tiixheꞌ,
8 tan echeꞌ nibꞌan umaj uxhchil tiꞌ iyakꞌinsal vichiꞌoleꞌ tul ni toojeꞌleꞌ, as bꞌaꞌn ni tex ibꞌan te vichiꞌoleꞌ. As ech achusat eebꞌ tiꞌ ibꞌanax u bꞌaꞌneꞌ vatz u Tiixheꞌ, tan nimal u bꞌaꞌnileꞌ alel kan see tetz vatiichajileꞌ tzitzaꞌ vatz u txꞌavaꞌeꞌ. As echat la ibꞌan vatiichajileꞌ kꞌatz u Tiixheꞌ tiꞌ ibꞌeneꞌ.
9 As jik chit u yoleꞌ ni val see. As bꞌaꞌneꞌ uvaꞌ la kunima.
10 As estiꞌeꞌ ni qaqꞌ yakꞌil tiꞌ u qaqꞌoneꞌ. As nu kupalebꞌe kꞌaxkꞌo, tan kꞌujleꞌl chit kukꞌuꞌl tiꞌ u islich Tiixheꞌ uvaꞌ ni qꞌalpun unqꞌa tenameꞌ skajayil, as bꞌaxel oꞌ uvaꞌ niman tetz u Jesús.
11 As aꞌ u yoleꞌ uvaꞌ la aal te unqꞌa qitzꞌin qatzikeꞌ tiꞌ uvaꞌ la inima. As lachus ste unpajte.
12 As aꞌ u bꞌaꞌnla txumbꞌaleꞌ la akꞌuch vatz unqꞌa qitzꞌin qatzikeꞌ tiꞌ ayoloneꞌ as tiꞌ abꞌanat u bꞌaꞌneꞌ, tan tiꞌ uvaꞌ kꞌujleꞌl akꞌuꞌl tiꞌ u Tiixheꞌ, as xoꞌn Aak see, as jik veꞌt axh vatz Aak. As yeꞌxhebꞌil la eesan aqꞌii tiꞌ uvaꞌ txulnal axh.
13 As tul uvaꞌ yeꞌxnaj oon in, as la ooksa aama tiꞌ asikꞌlet viyol u Tiixheꞌ xoꞌl unqꞌa qitzꞌin qatzikeꞌ. As la ooksa xeꞌ taama unqꞌa qitzꞌin qatzikeꞌ tiꞌ inimat unqꞌa bꞌaꞌnla yoleꞌ. As la aal isuuchil unqꞌa yoleꞌ ste unpajte.
14 As yeꞌ la ayaꞌsa eelat isuuchil u eejleꞌmeꞌ uvaꞌ aqꞌel see taꞌn u Tiixhla Espíritu tul uvaꞌ kat taqꞌ jeꞌ unqꞌa iqꞌesal unqꞌa qitzꞌin qatzikeꞌ iqꞌabꞌ seeꞌ tul kat inach Tiixh.
15 As ooksa aama tiꞌ abꞌanat unqꞌa veeꞌ ni val see. As yeꞌ la ayaꞌsa abꞌanataꞌ. As la ilpi uvaꞌ aal iyakꞌin aama tiꞌ u Tiixheꞌ.
16 La eel eebꞌ tiꞌ abꞌanat u bꞌaꞌneꞌ as tiꞌ achusat u jikla yoleꞌ. As yeꞌ la eesa eebꞌ skꞌatz, tan asoj ech la abꞌaneꞌ echeꞌ uveꞌ ni val see, as jit kuxh axh la qꞌalpu axh tiꞌ animat unqꞌa yoleꞌ. Pet antu unqꞌa qitzꞌin qatzikeꞌ la qꞌalpi uvaꞌ la niman u yoleꞌ.