135
1 Unu jaa Ojejoje ajaja.
Unu tua Ojejoje ẹpha.
Unu jaa ya ajaja;
unubẹ ndu ejeru Ojejoje ozi;
2 mbụ unubẹ ndu eje ozi l'ụlo Ojejoje;
mẹ l'ọma ufu Nchileke ayi.
3 Unu tua Ojejoje ẹpha;
kẹle Ojejoje dụ mma.
Unu gụa egvu gude jaa ya ajaja; kẹ l'ọ bụ
iphe gbaru nụ ndono;
4 kẹle Ojejoje fọtawaru Jékọpu t'ọ bụru nk'iya;
mbụ l'ọ hatawaru Ízurẹlu t'ọ
bụru ndu yẹbedua gẹdegede nwe.
5 O doru mu ẹnya lẹ
Ojejoje ha nshinu;
mbụ lẹ Nnajiufu ayi kakọta iphe, bụ agwa.
6 Ọ bụ iphe dụ Ojejoje mma;
bẹ oomeje l'imigwe;
mẹ lẹ mgboko.
Yọ bụru iphe dụ iya mma;
bẹ oomeje l'eze ẹnyimu; mẹ l'ebo, nọ iya nụ.
7 Ọ bụ iya emeje tẹ urukpu shi
l'ẹke mgboko beru dụbe eruru.
Oomeje t'egbe-igwe gbaa teke ọ chị mini;
l'emeje tẹ phẹrephere shi
l'ụlo ẹke ọ tụ-chiru iya wata ephephe.
8 Iphe bụ ọkpara lẹ Íjiputu b'o chigbushiru;
mbụ iphe bụ ọkpara lẹ madzụ; mẹ l'elu.
9 O gude iphe-ọphulenya;
mẹ iphe-ọhubama,
dụgbaa biribiri mekoshi unubẹ ndu Íjiputu.
Yọ bụru iphe o gude
hụ̀a Fero yẹle ndu ozi iya àhụ̀hù.
10 Mbakeshi, dụ l'igwe b'o chitsushiru;
bya egbushikwaaphu ndu
eze, shihugbaaru ike.
11 O gburu Sihọnu, bụ eze ndu Amọru;
bya egbua Ọgu, bụ eze ndu Báshanu;
bya egbushikota eze ndu Kénanu l'ẹphe ha.
12 Yo woru alị ẹphe washịaru
ndu nk'iya, bụ Ízurẹlu;
t'ọ bụru òkè-iphe ẹphe.
13 Ẹpha nggụbe Ojejoje
anọje jeye lẹ gbururu.
Ọphu a byadụ bya azaha
ngu azaha dụbe l'ọgbo sweru ọgbo;
14 kẹle Ojejoje a-haru ndibe iya enge;
gude ẹge ono dụa ndu ejeru iya ozi obu.
15 Agwa ndu ọhodo bụtsua
mkpọla-ododo yẹle mkpọla-ọcha;
bụ iphe madzụ gude ẹka mee.
16 O nweru ọnu;
ọle ẹ too kfudu okfu;
nweru ẹnya;
nweru ẹnya;
ọphu ọ phụdu ụzo.
17 O nweru nchị;
ọphu 'ọnudu iya iphe.
To nwe ume ndzụ, nọ iya l'ẹhu.
18 Ndu eme iya nụ;
a-dụ ẹge ọ dụ;
mẹwaru iphe bụ ndu dakoberu iya nụ.
19 Unubẹ ndibe Ízurẹlu;
unu jaa Ojejoje ajaja.
Unubẹ ndibe Érọnu;
unu jaa Ojejoje ajaja.
20 Unubẹ ndibe Lívayi;
unu jaa Ojejoje ajaja.
Unubẹ ndu atsụ Ojejoje egvu;
unu jaa Ojejoje jajaja.
21 T'e shikwa lẹ Záyọnu
jaa Ojejoje jajaja;
mbụ onye ono, bu lẹ Jerúsalemu ono.
Unu jaa Ojejoje ajaja.