81
Egvu, Ásafu deru nụ onye ishi egvu; t'e gude ngwa-egvu gítitu gụa ya
1 Unu gụa egvu ẹhu-ọtso-ẹna nụ Nchileke;
onye bụ iya bụ ike ayi!
Unu gude ẹhu-ọtso-ẹna
tụa ụzu l'ifu Nchileke kẹ Jékọpu!
2 Unu watanụ ọgu egvu;
unu eye iya nkwa!
Unu kpọoru iya ogumogu; mẹ une!
3 Unu gbua ụpyoku;
m'ọ Ọnwa Ọphungu fụlephu!
Unu gbukwaa ya phụ;
m'ọnwa dzulephu edzudzu;
4 l'iphe ono bụkwa ome-l'alị,
a tụru doberu ndu Ízurẹlu;
mbụ l'ọo iphe Nchileke kẹ Jékọpu
tọru ọkpa iya; sụ t'e tsoje.
5 Ọ bụ ekemu, ọ tụru;
yo shihu ike;
bya asụ tẹ Jósẹfu meje
teke ono, o tsoru ndu Íjiputu ọgu ono;
mbụ l'ẹke ono, mu nụru
okfu ẹ te dodu mu ẹnya ono.
6 Okfu ono sụru: “Ọo yẹbedua
pafụru ẹphe oke ivu, shi nọdu ẹphe l'ishi;
bya ezia ẹphe nkata ivu ono,
ẹphe shi vuru ono.
7 Teke unu nọ l'iphe-ẹhuka;
bẹ unu kuru iya oku.
Ya anọdu l'urukpu;
gude egbe-igwe za unu oku;
bya adzọfuta unu.
Ya gude mini Meriba data unu.
8 Unubẹ ndibe iya;
unu ngabekpoduaphu;
tẹ ya lọo unu ẹka lẹ nchị!
Unubẹ ndu Ízurẹlu;
unu ngabẹkpodaru iya phụ nchị!
9 T'ẹ b'ọ dụkwa iphe ọdo,
unu e-dobe; l'agwa
agwagwa l'ẹke unu nọ;
ọphu ọ dụkwa iphe ọdo,
unu a-bajẹru ẹja.
10 Ishi iya bụru l'ọo yẹbedua bụ
Ojejoje; bụru Nchileke unu.
Ọo yẹbedua bụ onye
dufutaru unu lẹ Íjiputu.
Unu kpuhaa ọnu unu ekpuhaa;
tẹ ya nụa unu nri.
11 Obenu lẹ ndibe iya
ta angadụru iya nchị;
mbụ lẹ Ízurẹlu te ekwedu nọdu iya l'ẹka.
12 Tọ dụ iya bụ; ya eworu ẹphe
haaru ẹjo ọkpoma ẹphe;
t'ẹphe tsowaruru iphe ẹphe rịtaru l'obu ẹphe.
13 Ndẹge ndibe yẹbe Nchileke
a-ngabẹru iya nchị;
ọ -bụru lẹ ndu Ízurẹlu e-tso ụzo, ya tọru ẹphe;
14 m'ẹ tọ ga atsụkwa iya l'ẹhu
mbụ omekputa ndu ọhogu ẹphe.
Ya ga egude ike iya chịa
ndu ẹphe dụ ashị ọkpu-akpọhu.
15 Ndu Ojejoje dụ ashị
wozifutaje onwẹphe alị l'ifu iya;
ya ahụ̀a ẹphe àhụ̀hù jeye lẹ tutu yoyo.
16 Obenu l'unubẹdua;
bẹ ya e-gude ọkpobe witu nụa nri;
gude manụ-ẹngu,
shi l'agbara-mkpuma nụ-jia unu ẹpho.”