42
Ẹ́vù, a raru nụ onye ishi egvu tẹ Ụnwu Kora gụa
1 Ọ bụ ẹge nne ele anọduje atụ hẹngu hẹngu;
l'achọ nggele ẹke ọo-gụ mini;
bẹ mu atụ hẹngu hẹngu
l'achọ nggụbe Nchileke.
2 Obu Nchileke; dụ mu;
mbụ Nchileke ọphu nọ ndzụ.
?Bụ teke ole; bẹ mu e-vudo iya l'ifu?
3 Ẹnya-mini mu bụwa nri mu: eswe l'ẹnyashi;
kẹ l'ẹ tọ dụdu teke ndiphe ta ajịjedu mu:
“?Ba awe; bẹ Nchileke mu nọ?”
4 Nta-a, mu tụko iphe nọ mu l'obu ekfushi-a;
bẹ mu nyataru ẹge mu shi edujeru ndu ọha;
ayi atụko azụ eje l'ụlo Nchileke;
azụ egvu ẹhu-ọtso-ẹna;
l'ekele Nchileke ekele;
mbụ ndu ọha, byaru ọgba ajị ono.
5 ?Bụ ngụnu meru iphe ẹhu daru mu kọo.
?Bụ ngụnu meru iphe
ọkpoma akfụ mu nkfụ.
Mu a-nọdu ele Nchileke ẹnya l'ẹka;
kẹle mu e-mekochaa jaa ya ajaja;
mbụ onye bụ iya bụ onye adzọfutaje mu nụ;
6 bụru Nchileke mu.
Ẹhu chihukwaru mu echihu.
Ọo ya meru iphe mu nọdu
l'alị Jọ́danu nyata ngu;
mbụ l'alị Hẹmonu lẹ Ugvu Miza.
7 Ebo mini akpọru ebo mini ibe iya gerugeru.
Ẹnari ngu; mẹ uphere ngu
tsọwaru l'ọ bụ mini bya ekpua mu.
8 L'eswe bẹ Ojejoje ekoshije mu n-yemobu iya.
O -be l'ẹnyashi;
mu akpụru egvu iya l'ọnu;
l'ekfukfu, mu ekfuje anụ
Nchileke, gude ndzụ mu.
9 Mu sụru Nchileke,
bụ agbara-mkpuma mu:
“?Bụ ngụnu kparu iphe
ị zaharu mu?
?Bụ ngụnu kparu iphe ndu
ọhogu mu akpa mu ẹhu;
yọ bụleruphu aphụ; bẹ mu agụ”
10 Ndu achị mu nụ anọduje ezi mu okfu; su:
“?Nanụhunu Nchileke mu ọbu?”
Iphe ono, ẹphe anọduje
ekfu ono tụkowa ọkpu,
nọ mu l'ẹhu amịpyashi amịpyashi.
11 ?Bụ ngụnu meru iphe ẹhu daru mu kọo?
?Bụ ngụnu meru iphe
ọkpoma akfụ mu nkfụ?
Mu a-nọdu ele Nchileke ẹnya l'ẹka;
kẹle mu e-mekochaa jaa ya ajaja;
mbụ onye bụ iya bụ onye
adzọfutaje mu nụ;
bụru Nchileke mu.
bụru Nchileke mu.