18
Egvu, Dévidi, bụ nwozi Ojejoje deru nụ onye ishi egvu
Egvu-wa b'ọ gụru gude kele Ojejoje mbọku, Ojejoje nafụtaru iya l'ẹka ndu ọhogu iya l'ẹphe ha; o swikposhia kẹ Sọlu
1 Mu yeru ngu obu Ojejoje.
Ọ bụ nggu bụ ike mu.
2 Ọ bụ nggu bụ agbara mkpuma mu;
bụru nggu bụ
a-gbabe-a-dzụru nke mu;
bụkwaru ngu phụ anafụtaje mu.
Ọ bụ nggu bụ oke mkpuma,
mu agbabajẹ je edomia onwomu.
Ọ bụ nggu egbochitaje mu
t'ẹ b'ọ dụ iphe e-me mu nụ;
bụru nggu egbochitaje mu;
bụru nggu egudeje ike ngu dzọo mu.
Ọ bụ nggu bụ ụlo, shihuru ike,
mu agbabajẹ; zeeru ndzụ.
3 Ọ bụ Ojejoje, bụ onye gbaru
t'aajaje iya ajaja bẹ mu arakuje;
yọ bya adzọfuta mu l'ẹka ndu ọhogu mu.
4 Ọnwu yewaru mu eri l'ẹkpiri.
Ọ-la-l'iyi atsọ-kputawa mu l'ọ bụ utso.
5 Alị-maa yewaru mu eri l'ẹkpiri.
Anwụhu agbabẹwa ọnya kwabẹru mu.
6 Teke mu eje iphe-ẹhuka;
bẹ mu rakuru Ojejoje.
Mu rakuru Nchileke mu t'ọ gbaaru mu mkpu.
Yo shi l'eze-ụlo iya nụa olu mu.
Mkpu, mu chiru chiku iya ruru iya lẹ nchị.
7 Tọ dụ iya bụ; iphe bụ
mgboko etehu kfụkakfuka;
nmakọta jijiji.
Iphe bụ ọkpa ugvu etekota kpakpakpa;
kẹle Nchileke;
bẹ ẹhu eghu eghughu.
bẹ ẹhu eghu eghughu.
8 Ẹnwuru-ọku eshi iya l'imi l'akpọ kẹ tụtutu.
Ọku, shi iya l'ọnu l'enwu phophopho.
Icheku-ọku, shi iya nụ
atalẹphu kfukfukfu.
9 Yọ dọjaa akpamigwe
parakatangu; gbazita.
Urukpu, gbahụru kẹ
tsụbalangu anọdu iya lẹ mkpuli ọkpa.
10 Yọ nọdu l'eli cherobimu; phefu.
Yọ bụru l'ẹswi phẹrephere b'o degeru l'ephe.
11 Yo gude ẹkpuru-ọchi kpuchia onwiya;
mbụ l'urukpu, mini jiru ejiji
nọ-pheru iya mgburumgburu.
12 Urukpu; mẹ aka-mini;
mẹ icheku-ọku, ata kfukfukfu
eshi l'o-gbu-nwịi-nwịi ya awụshi.
13 Ya ndono;
Ojejoje anọdu l'imigwe gbaa egbe-igwe;
a nụa olu onye ono,
bụ Ọkaribe-Kakọta-Nụ ono;
bya aphụa aka-mini;
mẹ icheku-ọku, ata kfukfukfu.
14 Ọ gbaru akfụ iya;
gude chịkashia ndu ọhogu iya.
Yo kua ebemu-igwe, ekua kẹ mẹremu;
ẹphe eze ọso; gbalashịa.
15 Nggụbe Ojejoje azụa ume;
baaru ndu ọhogu ngu mba.
Eze Ẹnyimu ekekahu ẹbo;
a phụkota akpakparama alị iya;
ntọ-l'alị mgboko adaburu ebedere-badara.
16 Ojejoje shi l'imigwe tụfu ẹka
zụ mu gbirimu; gụfuta mu l'ebo mini.
17 Ọ dzọfutakwaru mu phụ
l'ẹka oke ọhogu mu;
mẹ l'ẹka iphe bụ ndu mu dụ
ashị, kariru mu ẹka.
18 Ẹphe tsoru mu okfu teke ono,
ụmuruku mụru mu ono.
Obenu l'ọo Ojejoje bụru mu agbarike.
19 O dufutaru mu; dobe mu
l'ẹke ẹhu a-dụ mu agu.
O yeru mu ẹka dzọfuta mu l'ọgu;
kẹle mu nọ iya l'obu.
20 Ojejoje buru mu nggo;
kẹle mu bụ onye doberu ẹka ndoo;
O buru mu nggo;
kẹ l'ẹ to nwedu ẹke, mu yesweru ẹka.
21 Kẹ l'ọ bụlephu ụzo,
Ojejoje tọru; bẹ mu etso.
Mu ta aghabụaru Nchileke azụ.
22 Ekemu Ojejoje;
bẹ mu elezitaje ẹnya l'ọ ha;
mu ta ajịkabua ome iphe ọ sụru t'e mee.
23 Ẹ to nwedu ẹke ụta nọ mu l'ẹhu l'ifu iya.
Mu sefukotaru ẹka mu l'iphe dụ ẹji.
24 Ojejoje buru mu nggo;
kẹle mu bụ onye doberu ẹka ndoo.
O buru mu nggo;
kẹ l'ẹ to nwedu ẹke,
mu yesweru ẹka l'ẹke ọono.
25 Ndu yeru ngu obu;
bẹ iikoshije l'i yeru ẹphe obu.
Ndu ụta ẹ-ta dụduru;
b'ẹ tii mejedu iphe aa-ta
nggụbe Ojejoje ụta.
26 Ndu obu ẹphe gụru iphoro;
bẹ iidobejeru obu iphoro.
Obenu lẹ ndu ụgho;
bẹ ịinuje aphụ.
bẹ ịinuje aphụ.
27 Ndu wozitaru onwẹphe alị; bẹ ịidzofutaje.
Obenu lẹ ndu eku onwẹphe
ẹge ẹphe ẹ-ta hadu;
bẹ iiwozitaje alị.
28 Ọ bụ nggụbe Ojejoje eyejeru
mu ọku l'urọku mu.
Iimeje tẹ iphoro nọduru mu l'ẹke ọchi gbaru.
29 Ọ bụ l'ike nke ngu;
bẹ mu e-gude mekputa
igwe-ọha ndu sọja;
bụru ike nke ngu;
bẹ mu e-gude nyia ụpho-mkpuma mkpụkpu;
je anaa mkpụkpu ọbu.
30 Nnajiufu; ụzo ngu dụ-kota mma.
Okfu ngu te nwedu ntụpo.
Oogbobutaje ndu gbabaru
l'ime ngu je anọdu ezeru ndzụ.
31 ?Bụ onye ole ọdo bụ
Nchileke, nọnu; a gụfu Ojejoje?
?Bụ onye ole ọdo bụ
Eze Oke Mkpuma;
gbahaa Nchileke ayi?
32 Ọ bụ Nchileke emeje tẹ ike dụ mu;
bụru iya emeje t'ụzo mu;
be enwe ntụpo.
33 Oomeje; mu akfụ
bugengu-bugengu l'ọ bụ mgbada.
Mbụ l'oomeje tẹ mu
vudoshia ike l'eli ugvu.
34 Ọozuje mu; mu amaru ẹge aalụje ọgu;
k'ọphu bụ m'o -ruhuru;
ọ bụru akfụ igwe;
mu adụlee ike gbaa ya.
35 Ọ bụ nggụbe Ojejoje
egbochitaje mu;
shi ẹge ono adzọ mu.
Yọ bụru ike ngu;
bẹ iigudeje gudeshia mu.
Ẹka, iiyeru mu emeje;
tẹ mu bụru eze madzụ.
36 Iimeje ụzo mu t'ọ ha ụsa; tẹ ọkpa be echifu mu.
37 Mu chịru ndu ọhogu mu; gude.
Mu ta tsụladu azụ; jeye
ẹphe abụru kpurupyata.
38 Mu gweru ẹphe rakaraka;
k'ọphu bụ l'ẹphe te egbeshihedu ọdo.
Ẹphe adashịa;
wụshiru mu l'iku ọkpa.
39 Ọ bụ ike ngu;
bẹ mu gude je ọgu.
Nggu emee ndu ọhogu mu;
t'ishi rua ẹphe alị l'ifu mu.
40 Ndu ọhogu mu b'i meru;
ẹphe eche ọkpa l'ọso; gbaphu azụ.
Ndu, mu dụ ashi b'i meru; mu egbushikota.
41 Ẹphe chiru mkpu;
to nwe onye gbaru ẹphe mkpu.
Ẹphe araku Ojejoje;
t'o yeru ẹphe ọnu.
42 Mu gweru ẹphe ogwe ujimu;
mee ẹphe t'ẹphe dụ l'ọ bụ udzu-ẹja,
phẹrephere ephekashi.
Mu wụshiru ẹphe l'ọ bụ ẹpoto l'esu-ụzo.
43 Ị nafụtaru mu l'ẹka ndu etso mu ọgu;
bya emee mu;
mu abụru ishi iphe bụ mbakeshi;
k'ọphu bụ lẹ ndu, mu te
shidu maru;
byaru bya anọdu mu l'ẹka.
44 Ẹphe -nụa l'ọwaa iphe mu sụru t'e mee;
ẹphe eeme ya ẹgwegwa.
Iphe bụ ndu, shi eshishi efozikotajeru mu.
45 Meji atọfukota iphe bụ ndu
ono, shi eshishi ono;
ẹphe eshi l'ẹke ẹphe nọgbaa l'ezeru ndzụ;
fụru kwẹkwekwe byakfuta mu.
46 Ojejoje nọkwa ndzụ;
tẹ ajaja bụru kẹ oke mkpuma mu ono!
T'e kutsee Nchileke, bụ onye adzọfutaje mu nụ!
47 Ọ bụ Nchileke ejeje ọgwata
ụgwo iphe ndu ọhogu mu meru mu.
O meru ụnwu eliphe;
ẹphe anọdu mu l'ẹka.
48 Ọonafutaje mu l'ẹka ndu ọhogu mu;
mbụ wolia mu eli;
woghaa ndu ọhogu mu.
Ọonafutaje mu l'ẹka ndu iphe-kpaa.
49 Ọo ya meru iphe mu e-vudo
l'edzudzu iphe, bụ
mbakeshi jaa Ojejoje ajaja.
Mu e-gude egvu jaa ya.
50 Onye ọ fọtaru t'ọ bụru eze;
bẹ oomeje t'ọ lụ-gbua l'ọgu.
N-yemobu iya bẹ ọonoduje
ekoshi onye ọ wụru manụ l'ishi; mbụ Dévidi;
mẹkpo iphe bụ eri iya jeye lẹ tutu yoyo.