3
1 Ẹnyashi ophu;
bẹ mu azẹje l'oshi-azẹe mu;
ngabẹru onye mu yeru obu.
Mu achọo ya nta;
chọo ya imo; mu ta phụ iya.
2 Nta-a bẹ mu e-gbeshi tụko
mkpụkpu lẹ mkpụkpu;
mẹ l'edukfu l'edukfu jephekota;
chọo onye ono, mu yeru obu ono.
Mu atụko ẹke ono tsoo;
chọo ya; mu ta phụ iya.
3 Mu lẹ ndu nche ẹnyashi
edzuda l'ẹke ẹphe etsophe ọma-mkpụkpu.
Mu ajị ẹphe:
“?Unu phụ-swetaru mu
onye ono, mu yeru obu?”
4 Mu eswetatsulephu ẹphe;
ọwaa bụwa onye ono,
mu yeru obu ono.
Mu azụ iya gbirimu; swechia ya.
Mu t'ekwe haa ya t'ọ tụgbua.
Mu akpụa ya jeye teke mu
kpurutaru iya ụlo nne mu,
bụ iya bụ ụlo nwanyi,
mụru mu nụ gẹdegede.
5 Unubẹ ụnwanyi Jerúsalemu;
unu kwee mu ụkwa
l'unu ta akpatsudu
n-yemobu rua teke ọo-bya l'onwiya;
kẹle n-yemobu bụkwa
ẹge eedoje umoro;
mẹ ele-a bẹ eedoje iya.
6 ?Bu onye dụ ẹge ono, shi l'echi-ẹgu,
dụ l'ọ bụ ẹnwuru-ọku ono;
mbụ onye a gbaru mẹeru; gbaa ya ínsẹnsu
yeru ntụ,
eshi kwẹkwekwe,
ndu agba nghọ ere.
7 Lenu-o! Ọ kwa iphe Sólomọnu zẹ;
b'a pa ẹge ono abya!
Ndu tso iya nụ dụ ụkporo ndu sọja ẹto,
a gụtaru l'iphe bụ ndu bụ
ndu ike-ka-l'ọgu lẹ Ízurẹlu.
8 Ẹphe l'ẹphe ha tukota ogu-mbeke;
bụru ndu, k'ọgu doru ẹnya.
Ẹphe tukota ogu-mbeke l'ukfu;
rụkota ẹhu kẹ ụkutuku,
a-kụ l'ẹnyashi.
9 Eze Sólomọnu metaru
onwiya iphe eegudeje apa eze.
Oshi, o gude mee ya bụ
oshi, shi l'ugvu ugvu Lébanọnu.
10 Itso iya bụ mkpọla-ọcha;
b'o gude mee ya.
Oshi ẹhu iya ẹke
aadakobeje adakobe;
b'e gude mkpọla-ododo wụa.
Oshi, aanọduje anọdu,
nọ iya nụ b'e kwekotaru
ẹkwa, eke ụrobu-ụrobu.
Imime iya b'e
geshikwaruphu ẹkwa,
amakọta mma,
bụ ẹkwa, ụnwanyi
Jerúsalemu kpashịru;
gude koshi l'ẹphe yeru Sólomọnu obu.
11 Unu wụfuta;
unubẹ ụnwanyi Záyọnu;
bya achịa ẹnya l'ẹke eze
Sólomọnu kpu okpu-eze iya,
bụ okpu-eze ono, nne iya kpuberu iya
mbọku ono, ọ lụru nwanyi,
bụ mbọku ono, ẹhu tsọru iya ẹtu ono!

© 2014 WBT