29
Jobu ekfu okfu-ẹhu iya
1 Jobu ekfuru iphe, ookfu tụgburu; sụ:
2 “Ọ dụ mu t'a sụ l'oge
teke ono a-laphuta azụ;
mbụ teke ono,
Nchileke shi eletaje mu ẹnya ono;
3 mbụ teke ono,
urọku iya shi anọduje
enwu mu l'ụzo ishi.
Yọ bụru iphoro iya;
bẹ mu shi egudeje swee ẹke ọchi gbaru.
4 Ọ bụ teke ono; bẹ ẹka
mu shi bụru ụpete.
Ọ bụ teke ono;
bẹ ọ̀nyà mu lẹ Nchileke
shi bụru ọnu-ọma;
a gọoru iya ndibe mu.
5 Teke ono;
bẹ Ọkaribe-Kakọta-Ike shi nọnyabe mu.
Ụnwegirima mu
eswiphee mu mgburumgburu.
6 Teke ono; bẹ iphe,
bụ elu, mu doberu edobe shi azụ azụzu.
Oshi olivu mu l'eyeru mu
nebyi jeye lẹ ndu ọphu nọ l'alị ọkponku.
7 Teke mu shi ejeje
l'obu-edukfu mkpụkpu;
tsoru ndu bụ ọgurenya
nọdu l'obu-edukfu.
8 Ụnwu-okorọbya -phụa mu;
ẹphe akpọlaa azụ;
ndu bụ ọgurenya
awụ-lihu vudoru mu evudo.
9 Ndu ọphu bụ ishi
lẹ mkpụkpu adaa ashị.
10 Ọnu akpụru ndu,
a maru ẹpha ẹphe l'ụga;
ire anyaru ẹphe l'akpo.
11 Iphe, bụ onye nụru ẹke
mu ekfu okfu;
shi atụje ọnu mu k'ọma.
Ẹge ono bẹ ndu phụru
mu nụ; shi ajajẹ mu ajaja.
12 Ishi iya abụru lẹ mu shi
adzọje ndu ụkpa,
raru bya t'a gbaaru ẹphe mkpu;
jeye l'ụnwu-ogbe,
ẹ te nwedu onye a-gbaru ẹphe mkpu.
13 Ndu, nọ l'oke mkpa;
mẹ ụnwanyi, nji ẹphe
ta nọhedu shi ajajẹ mu ajaja;
kẹle mu shi bụru ẹphe
ọ-kwọ-lẹ-mkpa.
14 Mu shi emeje iphe mu eme
t'ọ daburu adaburu;
t'ẹ b'e emegbu nwoke;
t'e megbu nwanyi.
15 Mu shi bụru ẹnya,
ndu ìshì gude aphụ ụzo;
bụru ọkpa, ndu ngvụru gude eje ije.
16 Mu shi dụ l'ọ bụ nna
l'ẹke ndu ụkpa nọ;
shi agbajẹru onye
mu ta madu ọdzori.
17 Mu shi anafụje ndu
ẹjo madzụ ike ẹphe;
nafụta ndu ẹphe guderu
t'ẹphe nweru onwẹphe.
18 Mu shi arịje lẹ mu a-ka nka;
nọdu l'ụlo mu;
laa l'oge nka-ezekuna
nke mu l'ẹhu-gudangu.
19 L'ọ́gbaragba mu a-nọ
je agẹe ọnu lẹ mini;
iji l'adatsụa l'ẹkali, mu.
20 Ugvu, aakwabẹ mu
a-nọdu adụ
ọphungu ọphungu mbọku-mbọku;
ike mu l'adụkwaphu
ọphungu ọphungu l'eje.
21 Ndiphe eshi egebeje
nchị t'ẹphe nụa iphe mu ekfu.
Ẹphe shi adaje ashị;
ngabẹ nchị teke mu adụ ẹphe ọdu.
22 O shi abụje;
mu -yewa ọnu;
ẹ to nwehedu onye
ekfukwadu okfu ọdo.
Okfu mu ekfu shi
eguje ẹphe egugu lẹ nchị.
23 Ẹphe shi akwabẹjeru mu
l'ọ bụ ndu kwabẹru
mini t'ọ chịa.
Ẹphe shi anabatajẹ okfu mu
l'ọ bụ mini ọdungu.
24 Mu -mụa ọnu-ọchi; o bu atuzita ẹphe.
Ẹphe -lee mu ẹnya l'ifu;
ẹphe agbakerehu.
25 Ọ bụ mu shi anọduje
ekoshi ẹphe ụzo;
l'edu ẹphe l'ọ bụ eze,
edu ndu sọja iya;
l'adụ ẹphe ike ẹge
aadụje ndu aphụ byaru.”