1 KORINTO
Hini omaꞌ-atan tay an libju
Chin me-aggwa an nunlawlagwan Apostol Paul an i nangkaskasaba ay ni Ebanghelyo ja immuy pfimmihhita ad Korinto an ohan otong an pfuglay ad Akaya, an nidchum chin pun-ap-apugwan chi eRome. Otong hitay an siudad an hijay pfuglay chi Griego, Romano, ja Hudju. Khapo ta hitay an pfuglay ja nehnot hichi baybay ja cho-or hachi umuy hichi an i mungkumerchu. Hana khun cha ilukhan ja hana papor. Nunchongor hitay an pfuglay hi enachangjan, ja hana cho-or an lilijon hachi tatakhu hichi, ja hana khun cha umilugtapan, ja hana khun mangat hana uchumna pay an nun-apupukhit an ugali. Hi Paul ja nihihidchi hi chugwa hi tagwon an nangaskasaba ja cho-or hachi namati.
Nalahin chi toloh tagwon an nihihidchi hi Paul ad Efesus an nangaskasaba, ja gwa han chinagwat na an tulaꞌ an narpu hana khun mummeha ad Korinto (1Korinto 7:1). Ja pfinaha na hachi inali cha an khun punhahannugwan hachi namati ja hana uchumna pay an problema cha. Hotti hini enhongpfat Paul ay tay an tulaꞌ cha ja hitay gwa ay tay nahhun an tulaꞌ Paul hana namati ad Korinto. Hotti ay tay an tulaꞌ na ja un nuntukhun ma-ipanggip ay ni khun cha punhohongngilan, ja hini achi cha pangaanan hana khun umilugtap an nidchum ay ni iglesia cha. Inidchum na khu an intulaꞌ hini hongpfat ni khun cha epfokha, an ngay aton chi tatakhu an marhin, ja hana pfalo, ja hana pay uchumna an ma-id ahagwa na, ja hana anun an neꞌnong hana pfolor. Intukhuna khu hini panuh chi aton cha un cha ma-amung an mummeha, ja hana numpfino-ob-on an tamun ni Espiritu Santo ja hini pi-usarana. Hay oha hi intukhun Paul ja hini panuh ni aton cha an mun Santa Sena an hija hini pangnomnoman chin natajan Hesu Kristo, ti chengngor na an agkhuy napanuh hini khun cha aton. (1 Korinto 11:17-34) Ja en-angonoh na hana amahuwan hana natoy.
Hitay an tulaꞌ ja gway pfalor na ay chita-o, ti ma-achar hini problema an immali hana paꞌ-ihuꞌpap an namati an khun mummeha hichi Korinto an achoꞌlan chi pagano. Amat heto hana problema an khun umali ay chita-o an namati ad ugwani. Hitay khu chi pun-achalan hana enhongpfat Apo Jos hato an problema.
1
1 Ha-in hi Paul an enajakhan Apo Jos an numpfalin hi apostol Kristo Hesus, ti hitay chi penhod na. Tayya an chaꞌmi ay tay ibpfa ta-o an hi Sostenes ja muntulaꞌ ami 2 ay chaꞌju an tatakhun Apo Jos an khun ma-am-amamung an mummeha hina ad Korinto. Numpfalinon chaꞌju ay Apo Jos hi nasantuwan an tatakhu na khapo hi nidchuman ju ay Kristo Hesus. Ja pfu-un chaꞌju ja angkhay chi enajakhana muti nidchum an amin hana tatakhu hi apfuglapfuglay an khun mundayaw ay Apo Hesu Kristo ti hijay Apo ta-o an amin.
3 Hi Apo Jos an Ama ta-o ja hi Apo Hesu Kristo chi mangkhohkhohan ay chaꞌju ja mangchat hi pomhochan ni piꞌtakhuwan ju.
Chin nunyamanan Paul khapo chin nangkhohkhohan Apo Jos hay hana namati ad Korinto
4 Achiꞌ epokhong an munyaman ay Apo Jos ti matikhaw an engkhohkhohan chaꞌju ay hija khapo hi nidchuman ju ay Hesu Kristo. 5 Ti, khapo ay tay neꞌ-oh-ohhaan ju ay hija, ja nichatan aju hay hana nun-apfalor an khun ichat Apo Jos hi tatakhu na, an amat ay ni nanginnilaan ju ay ni umannung an tudtuchu ja ay ni apfalinan ju an khun mangi-ali. 6 Ti limmamot ay ni nomnom ju hana tinihtikhuwan mi an omaꞌ-atan Kristo. 7 Hijaot un ma-id i ju nungkulangan hana numpfino-ob-on an na-ispirituwan an apfalinan ay tay i ju punhohhoochan ay ni pumpfangngachan Hesu Kristo an Apo ta-o. 8 Hijay mangpapfipfi-ah ay ni pammati ju ta ma-id pungkulangan ju chin arkhaw an pumpfangngachana an Punhugijana hi tatakhu. 9 Ti matalek hi Apo Jos an nangajakhan ay chaꞌju ta meꞌ-oh-ohha aju ay tay Empfalayna an hi Hesu Kristo an Apo ta-o.
Chin himminglan Paul hana pumapaꞌ-i hi pun-oh-ohhaan
10 A-akhi, tayya han itukhun u ay chaꞌju khapo ay ni apfalinan tay Apo ta-o an hi Hesu Kristo. Mahapor an munlalammong aju ta achi la-ahna ja i aju ma-aggwa-aggwa ta un aju mun-oh-ohha hi nomnom. 11 Alloꞌ hitay, a-akhi, ti gwa han chengngor u an impa-innilan ni pamilyan Kloe an khun aju munhohongnger. 12 Hini chengngor u ja gwa anu hana khun mangali hi, “Chaꞌmi ayya ja hi Paul chi nidchuman mi.” Ja allon khuy uchumna hi, “Ja chaꞌmi ja hi Apolos chi nidchuman mi.” Ja allon khuy uchumna hi “Ja hi Peter chi nidchuman mi.” Ja hana uchumna khu ja allon cha hi, “Ti chaꞌmi ayya ja hi Kristo chi nidchuman mi.” 13 Un agkhu kaykhu la-ahna ja i ju khinaggwakhaggwa hi Kristo! Un chah ha-in an hi Paul chi natoy hichi kros khapo hi pfahor ju? Ja un chah ha-in khu chi nidchuman ju chin numpabautisaran ju? 14 Hinaot niꞌ kaen ta ma-id chi hay binautisaraꞌ ay chaꞌju, an angkhay cha Krispus ay Gayus. 15 Hotti ma-id chi oha ay chaꞌju hi gway panghiꞌ-ingana an mangali hi numpabautisar ta midchum ay ha-in. 16 Aa taꞌgwa, ja gwacha khu cha Stefanas an pamilya an binautisaraꞌ ja angkhaynana khuh niꞌ hi anilaꞌ. 17 Ti agkhujaꞌ hennag ay Kristo ta ujaꞌ mumbautisar, muti unaꞌ hennag an i mangkaskasaba ay tay Ebanghelyo. Ja achiꞌ khun pa-akhaꞌkhajaon hini atoꞌ an mangaskasaba ta ipatikhaw u hini kinala-eng u, ti achiꞌ podhon an ma-aꞌ-aanan hini apfalinan ni puntudtuchugwaꞌ ay ni enat Kristo an natoy hichi kros.
Chin natajan Hesu Kristo chi atikhan ni kinala-eng Apo Jos
18 Hitay khun mekasaba an enat Kristo chin natajana hichi kros, ja achi pfalolan hana tatakhu an ma-utaw chi piꞌtakhuwana. Muti ay chita-o an khun takhuwon Apo Jos ja anila ta-o an hitay chi atikhan ni otong an apfalinan Apo Jos an manakhu hi tatakhu. 19 Amat ay tay nitulaꞌ an hapit Apo Jos hi nangarjana hi,
“Paꞌ-iyoꞌ hana enat chi tatakhu an nangehchor ay ni kinala-eng cha,
Ja hini la-eng chi tatakhu an epa-akhaja cha, pumpfalinoꞌ hi ma-id herpfina.” * 1:19 Isaiah 29:14
20 Ja emmat, ti anong un hana manomnom an tatakhu, ja hana gway achar na, ja hana khun mundibati hana omaꞌ-atan hana gwah to lota, ja ma-id itolong na. Ti impatikhaw Apo Jos an ma-id herpfin tay na-inlubungan an kinala-eng. 21 Ja hay eneꞌchan Apo Jos khapuh kinala-eng na, ja umad-adchi hini kinala-eng chi tatakhu ta ma-annila cha hini omaꞌ-atana. Hay penhod na ja takhuwona hana mamati ay Kristo khapo ay ni umannung an tudtuchu an khun mi ekasaba, an allon hana agkhuy namati hi ma-id herpfi na. 22 Achi pfalolan hachi Hudju ti hay penhod cha hi tikhagwun ja hana milagro an pangtikhan ay ni apfalinan Apo Jos ja un cha mamati. Ja pahigwon khu hachi Hentil ti hay penhod cha ja hana na-unig an tudtuchu an narpu hi nomnom chi takhu. 23 Muti hay khun mi ekasaba ja chin natajan Kristo hichi kros, ja pahigwon hachi Hudju ti apfopfohor hi pangngolan cha, ja hachi ayya Hentil ja ma-id herpfi na ay chicha. 24 Muti ay chita-o an enajakhan Apo Jos, Hudju man wenno Hentil, ja anila ta-o an hitay enat Kristo chi panginnilaan ay ni apfalinan ja kinala-eng Apo Jos. 25 Ti hana enat Apo Jos an allon chi tatakhu hi ma-id chi pfalor na, ja najunaot ja hijay napfarpfalor mu hini kinala-eng cha. Ja hini allon cha an na-apfakan Apo Jos khapo hi natajan Kristo ja najunaot ja hijay atikhan ni apfalinan Apo Jos an ot-ottong mu hini apfalinan chi tatakhu heto lota.
26 A-akhi, nomnomon ju chin omaꞌ-atan ju chin nangajakhan Apo Jos ay chaꞌju. Ma-id chi cho-or ay chaꞌju hi nun-achar ay ni kinala-eng chi takhu. Ja ma-id khu chi cho-or ay chaꞌju an gway nangato hi haad na, ja empfapfalay chi gway mapfalina. 27 Ti pinilin Apo Jos hana ma-id achar na ja la-eng na hi pannig chi tatakhu ta mapfa-inan hana mangeh-ehnger ay ni achar cha. Ja pinili na khu hana amat hi ma-id pfirpfilang na an tatakhu ta mapfa-inan hana mangeh-ehnger hi apfalinan cha. 28 Pinilin Apo Jos hana milulumlum an tatakhu heto lota, ja hana mapahpahiw, ja hana allon cha hi ma-id herherpfi cha, ta ipatikhaw na an ma-id herpfin hana khun pfalolan chi tatakhu. 29 Hotti ma-id oha hi takhu hi mumpa-akhaja hi sangwanana. 30 Ja hi Apo Jos chi nangidchum ay chita-o ay Kristo Hesus an hijay pangmatunan ay ni umannung an kinala-eng Apo Jos. Khapo ay Kristo ja nipfilang ta-o hi magpong, ja numpfalin ta-o hi nasantuwan an tatakhun Apo Jos, ja nawayawaya-an ta-o hi pfahor ja patoy. 31 Hotti unuchon ta-o hitay impatulaꞌ Apo Jos hi nangarjana hi, “Hini mamhod an gway eh-ehnger na, ja hini koma enat Apo Jos chi ehnger na.”† 1:31 Jeremiah 9:24