Nan Hapit Apo Dios Genesis 10

Nan Holag nan Imbabaluy Noah

(I Chron. 1:5-27)

1 Hiyatuy holag nan tulun linala'in imbabaluy Noah an diday nunholag hidin nalpahan di lobong.

Nan Holag Japheth

2 Hay holag Japheth ya da Gomer,* ya hi Magog,† ya hi Madai,‡ ya hi Javan,§ ya hi Tubal,* ya hi Meshek,† ya hi Tiras.‡

3 Ya hi Gomer§ ya nunholag ta da Ashkenaz ay Riphath, ya hi Togarmah.

4 Hi Javan ya nunholag ta da Elishah,* ya hi Tarshish,† ya nan tatagun numpunhitud Cyprus, ya nan tatagun numpunhitud Rhodes. 5 Ya nan holag Japheth di o'ommod nan numpunholag an numbino'ob'on di hapitda an numpunhituh nan abablubabluy hinan pingit di baybay.

Nan Holag Ham

6 Nan linala'in holag Ham ya da Cush,‡ ya hi Mizraim,§ ya hi Put,* ya hi Canaan.†

7 Ya hay holag Cush‡ ya da Seba, ya hi Havilah, ya hi Sabtah, ya hi Raamah, ya hi Sabteka. Ya nan holag Raamah ya da Sheba ay Dedan.

8 Hi Cush§ ya wada han ohan imbaluynan lala'i an hi Nimrod* an hiyay hopap di nangameh an amin hinan abablubabluy hitun luta. 9 Ya nala'eng an manganup ti hi Apo Dios di namadang ay hiya. At hiyanan inalin nan tataguy, “Maphod ahan un'a umat ay Nimrod an manganup an binadangan Apo Dios!” 10 Hay hopap di babluy hi numpapto'ana ya ad Babylon, ya ad Uruk, ya ad Akkad, ya ad Kalneh an hakup di ad Shinar.† 11 Ya ilagatna nan babluy ad Assyria ta hidiy numpangipaphodanah nan siudad an umat ad Nineveh, ya ad Rehoboth Ir, ya ad Calah, 12 ya ad Resen an numbattanan ad Calah ya ad Nineveh ya nundongol an siudad.

13 Hi Mizraim‡ an imbaluy Ham ya nunholag ta nan tatagud Lydia,§ ya ad Anam,* ya ad Lehab,† ya ad Naphtuh,‡ 14 ya ad Pathrus,§ ya ad Casluh (an nalpuwan nan iPhilistia*), ya nan iCrete.

15 Hi Canaan an imbaluy Ham ya nunholag ta hi Sidon an pangpangullu ya un hi Heth.† 16 Ya nunholag goh hi Canaan ta nan himpampun an holag Jebus, ya nan holag Amor, ya nan holag Girgas, 17 ya nan himpampun an holag Hiv, ya nan holag Ark, ya nan holag Sin, 18 ya nan holag Arvad, ya nan holag Zemar, ya nan iHamath. Ya hanan holag Canaan ya diday niwa'at an nepongdah nan udumnan babluy 19 an nete"ah ad Sidon ta numpa'uy ad Gerar ta nangamung ad Gaza. Ya inipluy di udumnan immuy ad Sodom, ya ad Gomorrah, ya ad Admah, ya ad Zeboyim ta nangamung ad Lasha. 20 Hiya hanay holag Ham hi nun'epong hinan do'ol an abablubabluy ya numbino'ob'on di hapitda.

Nan Holag Shem

21 Nunholag goh hi Shem an pangpangullu ya un hi Japheth, ya hiyay ad holag hinan dana' Eber. 22 Hiyatuy holag Shem an da Elam,‡ ya hi Ashur,§ ya hi Arphaxad,* ya hi Lud,† ya hi Aram.‡

23 Hay holag Aram ya da Uz, ya hi Hul, ya hi Gether, ya hi Meshek.

24 Hi Arphaxad ya nunholag ta hi Shelah an ad imbaluy ay Eber.

25 Hi Eber ya duwaday linala'ih holagna. Nan oha ya nginadnanda ta hi Peleg§ ti hidin ataguna ya na'uhi'uhig nan tataguh tun luta. Ya nan oha ya hi Joktan. 26 Ya hay holag Joktan* ya hi Almodad, ya hi Sheleph, ya hi Hazarmaveth, ya hi Jerah, 27 ya hi Hadoram, ya hi Uzal, ya hi Diklah, 28 ya hi Obal, ya hi Abimael, ya hi Sheba,† 29 ya hi Ophir,‡ ya hi Havilah, ya hi Jobab. Hiyanay holag Joktan.

30 Ya hay babluy hi nunhituwanda ya nete"ah ad Mesha ta nangamung ad Sephar hidih nan dudunduntug an niyappit hi buhu'an di algaw. 31 Didanay ahimpahimpangapu an holag Shem an numbino'ob'on di numbabluyanda ya ta"on nan hapitda.

32 An amin dane an tatagu ya hi Noah di napu'aganda ti ma'alah nan patad. Ti hidin nalpahan di lobong ya anggay nan imbabaluy Noah di numpunholag ya unda dumo'ol an niwa'awa'at hitun luta.

*10:2 Nunhitu nin hinan pingit di Black Sea. Nan udumnan holag Japheth an nitudo' hitu ya niddumdan AntiKristu (unu nan Mi'bohhol ay Jesu Kristu) hinan Punligatan di Tatagu ta mi'gubatdah nan Hudyu (Ezek. 38:2, 5-6). Umat ay da Gomer, ya hi Magog, ya hi Tubal, ya hi Meshek. Ya niddum goh nan udum an holag Ham (verse 6) an umat ay da Cush ay Put.

†10:2 Nunhitu nin hi appit hi agwan di Black Sea hi un hagangon di buhu'an di algaw.

‡10:2 Nan ma'alih Medes an iMidia.

§10:2 Nunhitud Greece hi appit hi agwan hi un hagangon di buhu'an di algaw, ya nunhitu goh ad Asia Minor hi a'unugan di algaw.

*10:2 Nunhitu nin ad Pontus (unu ad Turkey).

†10:2 Nunhitu nin hinan Moschian Mountains an wad Asia Minor (unu ad Turkey).

‡10:2 Nunhitu nin ad Thrace.

§10:3 Nan tulu an holag Gomer ya numpunhitudad Iraq hi appit hi iggid hi un hagangon di buhu'an di algaw.

*10:4 Mid mapto' ya nunhitud Cyprus, ya bo'on ay ya ad Sicily hi ad Italy.

†10:4 Nunhitu nin ad Spain hi appit hi agwan hi un hagangon di buhu'an di algaw.

‡10:6 Nunhitud Egypt ya ad Ethiopia hi appit hi agwan hi algaw hi un hagangon di buhu'an di algaw.

§10:6 Ohan ngadan di ad Egypt.

*10:6 Nunhitu nin ad Somalia, ya bo'on ay ya ad Libya.

†10:6 Nunhitud Phoenicia.

‡10:7 An amin nan pitu an holag Cush ya numpunhitudad Arabia.

§10:8 Mid mapto' ya bo'on hiyay tagun mungngadan hi Cush an nibaag hinan verses 6-7, ya hay nunhituwana ya ad Mesopotamia.

*10:8 Mid mapto' ya hiyah ne ngadanah nan hapit di Hebrew, ya hay oha goh an ngadana ya hi Sargon I.

†10:10 Ohan ngadan di ad Babylon.

‡10:13 Ohan ngadan di ad Egypt.

§10:13 Nan numpunhitud Asia Minor.

*10:13 Nan numpunhituh nan neheggon ad Cyrene hinan ongol an babluy ad Africa.

†10:13 Nan numbino'ob'on an tribon numpunhitud Libya hinan mapulun.

‡10:13 Nan numpunhitud Egypt hi appit hi iggid hi un hagangon di buhu'an di algaw.

§10:14 Nan numpunhitud Egypt hi appit hi agwan hi un hagangon di buhu'an di algaw, ya nan numpunhitu goh ad Sudan.

*10:14 Gapu ta do'oldad Canaan at palpaliwan ya nangadnan ad Israel ta Palestine an miyunnudan hinan ngadanda.

†10:15 Nunhitud Asia Minor.

‡10:22 Nunhituh appit hi buhu'an di algaw ad Mesopotamia (unu ad Iran).

§10:22 Nunhitud Assyria hi appit hi iggid hi un hagangon di buhu'an di algaw ad Mesopotamia.

*10:22 Nunhitu nin hi appit hi agwan hi un hagangon di buhu'an di algaw ad Mesopotamia.

†10:22 Nunhitu nin ad Asia Minor.

‡10:22 Nunhitud Syria.

§10:25 Hay pohdon nan ngadana an ibaga ya na'uhig. Mu ngadan nen na'uhig hidin timpun din nitungawana? Hay kulugon nan do'ol ya na'uhig nan hapit di tataguh tun luta ti oh'ohhay hapitda (Gen. 11:1-9), mu wada goh di mangulug an na'uhig nan luta ti alyonda an oh'ohhay babluy hidin pengpenghana, mu hidin timpun din nitungawan Peleg ya inlahhin Apo Dios ta na'uhi'uhig, hiyaat un waday pitun ongol an babluy an ma'alih continents ad ugwan an ad Asia, ya ad Australia, ya ad Africa, ya Europe, ya ad North America, ya ad South America, ya ad Antarctica, ya hay panginnilaan anu ya gulat ta tigonyu hanah nan mapa ya mabalin an ipabangngadyu dida ta ma'ohhay luta ti nan continent ad South America ya miha"ad hinan continent ad Africa, ya nan continent ad Australia ya miha"ad hinan continent ad Asia.

*10:26 Nan holagna ya numpunhitudad Arabia hi appit di agwan hi un hagangon di buhu'an di algaw.

†10:28 Nunhitud Yemen. Mu nan i'Ethiopia ad ugwan ya alyonday hiyah ne babluyda tuwali.

‡10:29 Nunhituh nan lugal hi awadan nan do'ol an balitu' (I Ki. 9:28; 10:11), mu mid nanginnilad ugwan hi awadana. Mid mapto' ya ad Africa, ya bo'on ay ya ad Arabia hi appit hi agwan hi un hagangon di buhu'an di algaw.