1 Inalin goh Apo Dios ay ha"in di, 2 “Ezekiel, hay inilam hi nun'abhiwan nan wa'al hinan malgom an ayiw hi inalahan? An umat hinan nitanom an greyp an gulat ta napugah an amin di bungana ya hay a'usalan di odolna? Undan waday a'usalana an umat hinan ayiw? 3 Mi'id ti adi mabalin an iyammah pana'ul ta way punhabluyan. 4 Manu ti mabalin an mitunguh un namaganan, mu ag'agan magbu, ya mi'id di balana. 5 At umat hinay aat nan odol di greyp an wa ay ta napugah an amin di bungana ya mi'id mahkay di hulbina, at ta"on hi un itungu unu adi.”

6 Ya inalin goh nan na'abbagbagtun Dios di, “Da'yun nunhitud Jerusalem ya umat ayuh nan wa'al hi inalahan an hay a'usalanda ya un mitungu ya anggay.* Hay pohdon nan apuy an hapiton ya nan nangiyayan nan iBabylon ay da Alin hi Jehoiachin ya nan udumnan impapto'na an umat ay Ezekiel hidin 597 B.C. (II Ki. 24:10-16). 7 Ti moltaon da'yu. At ta"on hi un nabaliwan di udum ay da'yuh nan nahhun an nummolta' mu moltao' damdama dida ta mun'a'ubahda.† Hay itudun ten miyadwan apuy an agguy pay na'at ya nan pangiyayan nan iBabylon hinan Hudyuh din 586 B.C. Ya umat hinay ato' ta way panginnilaanyun Ha"in nan Dios an ap'apu. 8 Ya gapu ta din'uga' nongkay ay da'yu at hiyanan inganuy'u nan babluyyu. Ha"in an na'abbagbagtun Dios di nanapit ete.”