9
Hay Punyamanan ay Apo Dios an Dumalat di Amakulugna* Hinan Biblian di iGreece ya nalammung nan Psalm 9 ya Psalm 10 ta ma'ohha an psalm.† Nan mahhun an letran di alphabet di Hudyu an A ya hiyay te"an di letrah nan mahhun an verse, ya nan miyadwan letran di alphabetda an B ya hiyay te"an di letradah nan miyadwan verse. Ya umat hinay aat ten Psalm 9 ya 10 ti mahayhaynod nan hinohhan letran di alphabetda an mete"ah A ta engganah nan negpongana, ya ta"on un 22 di letran nan alphabetda mu anggay nan 20 an letray na'usal eten psalm.
Hete ya psalm an intudo' David, ya hay intud'ana ya nan ap'apun di muntudtuduh kanta, ya hay tunena ya “Hay Natayan nan Imbaluy'un Lala'i.”
1 Ipabagbagtu' He"a ahan, Apo Dios,
ya ul'ulgudo' an amin nan inatmun mun'aphod.
2 Ma"am'amlonga' an gapun He"a,
ya ikankanta' nan pundayaw'un He"a, Apu an na'abbagbagtu.
3 Wa ay ta He"ay mihanggah nan buhul'u
ya un himbumaggaan nun'atu"inda ya nun'atoyda.
4 Ya nahamad an makulug di punhumalyam
ti impa'innilam an mi'id di numbahola'.
5 Mu hanan nun'appuhiy pangatdan Hentil hinan abablubabluy an adi umunud ay He"a
ya immannung an ubahom dida ta ma'aliwandah enggana.
6 Ya pinogpogmu mahkay nan buhulmi ya ta"on nan babluyda,
at mi'id ah panginomnoman hi aatdah enggana.
7 Mu He"a, Apo Dios, di Alih enggana,
ya wagwada'ah nan umbunam an munhumalyah nan tatagu,
8 ya umannung an nahamad di atom an manumalyah nan tatagu,
ya umat goh hinan atom an mumpapto'.
9 Ya He"a, Apo Dios, di bumaliw hinan ma'abohlan,
ya He"ay bumadang goh hinan gutud di ipaligligatan.
10 Nan nanginnilan He"a di mangiyokod hi nitaguandan He"a
ti mi'id ah din'ugmuh mamhod an middum ay He"a.
11 Mungkanta tu'uh nan pundayaw tu'un Apo Dios an Alid Jerusalem,
ya ulgudon tu'uy numbino'ob'on an mun'aphod an ina'inatnah nan Hentil hinan abablubabluy
12 ti adina al'alliwan nan maligligatan,
ya adina goh aliwan nan pumpahpahmo'andan Hiya,
ya moltaona nan pumatopatoy.
13 At hom'ona' ni', Apo Dios,
ta baliwana' hinan pangipaligligatan nan buhul'un ha"in ta adia' matoy
14 ta way ato' an mangipattig hinan pangipabagbagtua' ay He"ah nan hinagang di tatagud Jerusalem,
ya ta ipattig'uy pun'am'amlonga' hi namaliwam ay ha"in.
15 Ti nan Hentil hinan abablubabluy an adi mangulug ay He"a, Apo Dios,
di nun'abituh nan inyammadah a'naan di ibbadan tagu.
16 Mu impattig Apo Dios di ana'ahhamadna an dumalat nan maphod an panumalyana,
at hiyanan nan nun'abaholan an tatagu ya diday mun'a'nah nan linut'u'andan bitu.
17 Ya an amin nan nun'appuhiy pangatna ya hay atoy umayana,
ya umat goh hinay ma'at hinan Hentil hinan abablubabluy an nan'ug ay Apo Dios.
18 Mu nan nun'awotwot an tatagu ya adida ma'aliwan,
ya midat goh ay dida nan hahalimidonda.
19 At adim ni' iyabulut an ngohoyon da'ah nan Hentil
ta unmuat humalyaom dida ta pun'alim nan numbaholanda,
20 ya pata'ton dida, Apo Dios,
ta way panginnilaandan dida ya unda tagu ya anggay.
*^ Hinan Biblian di iGreece ya nalammung nan Psalm 9 ya Psalm 10 ta ma'ohha an psalm.
†^ Nan mahhun an letran di alphabet di Hudyu an A ya hiyay te"an di letrah nan mahhun an verse, ya nan miyadwan letran di alphabetda an B ya hiyay te"an di letradah nan miyadwan verse. Ya umat hinay aat ten Psalm 9 ya 10 ti mahayhaynod nan hinohhan letran di alphabetda an mete"ah A ta engganah nan negpongana, ya ta"on un 22 di letran nan alphabetda mu anggay nan 20 an letray na'usal eten psalm.