36
1 Ya intuluy Elihu an himmapit an inalinay,
2 “Anuham an donglon ta ituluy'un humapit
ta ipa'innila' ay he"ay udum hi aat Apo Dios.
3 Heten nipa'innilan ha"in ya makulug an nalpun Apo Dios an nunlumun ha"in,
at itudu' an nan nunlumun ha"in ya na'ahhamad di ato'atona.
4 Ha"in ya makulug an amin di hapito' ay da'yu an mi'id di layah
ti ha"in ya nala'enga' ya nanomnomana'.
5 Nidugah di abalinan Apo Dios ti mi'id ah ohah pahiwona,
ya nidugah di abalinana ti adina ibahhaw nan planuna ti ma'at damdama.
6 Ya hontona nan pi'taguan nan gun mumbahol,
mu Hiyay mammo' an mangidat hi amaphodan nan nun'awotwot.
7 Ya halimunana nan nahamad di pangatda,
ya punhaadona didan umat hinan ali ta diday me'gonan hi enggana.
8 Mu gulat ta way abaludan nan tatagu ta mipaligligatda an dumalat nan nappuhin inatda
9 at ipa'innilan Apo Dios ay dida nan numbaholanda ya nan numpahiyaanda.
10 Ya ihamadna ta donglonda nan tugunan dida,
ya ta itutuyuda nan baholda.
11 Ya gulat ta donglonda ya inunuddah Apo Dios ta Hiyay itamuanda at lumenggopda,
ya mawaday amlong hi nitaguanda.
12 Mu gulat ta adida umunud at mun'a'ubahdah nan tadom di hanggap,
ya mun'atoydan dumalat di ami'id di inilada.
13 Ya nan nun'abaholan an agguy kimmulug ay Apo Dios ya bumubungotda,
ya ta"on hi unda mipaligligat hinan amoltaanda mu adida pohdon an mumpahpahmo' ay Hiya.
14 Ya ta"on unda ungunga mu mun'atoydah
nan nun'appuhi ya hinan umipabain an ina'inatda.
15 Ya manu ay punligaton Apo Dios nan tatagu ta way atondan mituduwan,
ya punholholtapona dida ta way atondan mangipadutu' hinan alyonan dida.
16 Hay planun Apo Dios ya ibaliw da'ah nan ligatmu,
ya palenggopon da'a,
ya idatnay na'ahhamad hi nitaguam.
17 Mu nan aton Apo Dios an mummoltah nan udumnan tatagun mumbahol
di hiyay atona goh an mummoltan he"a.
18 At halimunam nan aatmu ta adim amnawan tun gina'uh tun luta,
ya tigom ta adi'a mumbahol an dumalat nan do'ol an pihhun mili"ud an midat ay he"a.
19 Undan baliwan da'ah nan inadangyanmu ta adi'a munholtap,
ya undan abalinan di bi'ahmun mamaliw ay he"a?
20 At adim dedennon di adatngan nan mahdom an gutud di a'ubahan nan tatagu.
21 Halimunam di aatmu ta adim aton di nappuhi
ti hay dumalat hi pangipa'alian Apo Dios hi punligligatam
ta way atom an adi mangat.
22 Ihamadmun innilaon an hi Apo Dios ya nidugah di abalinana,
ya Hiyay na'abbagbagtu ya un an amin nan mumpuntudtudu.
23 Ya mi'id ah ohah mangitudun Hiyah atona,
ya mi'id goh ah ohah tagun mangalih un nibahhaw di inatna.
24 Ipabagbagtun nan tatagu Hiyah nan ikantada,
at nomnomom ta ita"engmuy intamuna.
25 Tinnig an amin di tataguy umatana,
mu nibataan,
at agguyda inimmatunan.
26 Hi Apo Dios ya nidugah ahan di abalinanan adi tu'u pa"innila,
ya adi tu'u pa"uyap hi ado'ol di tawona.
27 Hiya ya ipatuluna nan dulnun danum hi ad daya,
ya numbalinonah udan,
28 ya nun'ogahna an malpuh nan bunut
ta way pumhodan nan tatagu.
29 Mi'id ahan di nanginnilah nan atonan mumpangiwa'at hinan bunut,
ya nan atonan mangipa'idul ad daya.
30 Ya mattig an umilat ya mabenangan nan nunlene'woh hi wadana,
mu pahelongonay bunol di baybay.
31 Hiyah ne atonan mangipapto' hinan tatagu,
ya idatnay do'ol hi tanudda.
32 Hiyay nangdon hi ilat,
at Hiyay mangipa'ilat ta mepto' hinan pohdonan pangepto'an.
33 Nan idul ya ipa'innilanay umalian di madloh an udan,
ya ta"on nan animal ya umat goh an inilada.”