27
1 Ya innaynayun Job an himmapit an inalinay,
2 “Immannung an ihapata' ay Apo Dios an adi matmattoy
an Hiyay nangaan hinan biyang'uh amaphoda',
ya Hiya an nidugah di abalinanay nangidat hitun nidugah an holholtapo' eten nitagua'.
3 Mu heten atagu' hi engganah unna' matoy
4 ya adi' ahan hapiton di nappuhi,
unu adi' hapiton di layah.
5 Ya ta"on hi un ngadan di atonyu ya adi' damdama alyon hi un ayu makulug,
mu heten atagu' ya ibilang'u damdaman mi'id di bahol'uh engganay un mapogpog tun nitagua'.
6 Ya halimuna' nan amakulug'u,
ya abigabigat ya mipanomnom ay ha"in
an mi'id ah bahol'uh engganay un mapogpog tun nitagua'.
7 Hay maphod ni' ya mun'amoltada nan mi'buhul ya nan mamahapahal ay ha"in
an umat hi amoltaan nan gun mumbahol an mangamangat hi nappuhi.
8 Hay namnamaon nin nan adi mangulug ay Apo Dios
hinan gutud di pamogpoganah nitaguanda?
9 Undan donglon udot Apo Dios nan kilada
an mumpabadang hi un madatngan di aguguluwanda?
10 Undan mabalin hi unda mi'yam'amlong ay Apo Dios an nidugah di abalinana?
Ya undan mabalin hi unda mumpabadang ay Hiyah nan malgom an gutud?
11 At ihamadyun donglon ta itudu' di aat nan nidugah an abalinan Apo Dios,
ya ibaag'u nan ina'inat Apo Dios an adi' ihaut.
12 Mu hatun na'at ya hinamadyun tinnig an amin,
mu nen ta"on ya gunyu hapiton nan mi'id hulbina.
13 Hiyah te indadaan Apo Dios hi moltan nan gun mangat hi nappuhi
ta lagbun nan umipaligligat an idat nan nidugah di abalinana.
14 Ta"on un dumo'ol di holagda ya mun'atoyda damdamah
nan gubat unu hinan batel.
15 Ya nan ma'angang an adi matoy ya mun'atoyda damdaman dumalat nan naligat an dogoh,
at mun'ilubu'da,
ya mi'id di ngumulngul ay dida an ta"on hi un nan a'ahawada.
16 Ya nan nun'abaholan an gun mangat hi nappuhi ya manu ti adadangyanda
an do'ol ahan di pihhuda ya lubungdan nitalepon,
17 mu la'tot ya nan nahamad di ugaliday mangilubung hinah nan lubungda,
ya diday mangngal an mangogodwah nan pihhuda.
18 Ya nan abung an nunhituwan nan nun'abaholan
ya adi madnoy an umat hinan abung di bibbiang
unu umat hinan allung an ihi'ugan nan muntamuh payaw.
19 Ya henen gutud di nolo'anda ya adangyanda,
mu awni ta bumangonda at tigonda an nun'a'ubah din inadangyanda.
20 Mawaday atata'ot hi holholtaponda
an umat hi alian di puo',
ya albongan di luta,
at mun'a'anuddah nan mahdom.
21 At nan puo' an malpuh buhu'an di algaw ya pun'iyaddibna dida,
at mun'a'ubahdan mun'itapal hi adagwi.
22 Ya ta"on hi unda ilulud an mamaliw hi odolda
mu mi'id damdamay homo' nan mabi'ah an puo' ay dida.
23 At nan puo' ya mabi'ah an gun mun'apalin mipyud ay dida
ta ipata'otna didah nan gunda lumayawan,
ya nun'itayapna dida,
at mun'a'ubahda.”