18
Hay Miyadwah Himmapitan Bildad
1 Ya tembal Bildad an holag Shuah an inalinay,
2 “Anuud mah di pangidinngam an gun humapihapit?
Hay maphod ya idinongmu ta way atonmin mi'haphapit ay he"a!
3 Anaad ta un da'mi ibilang hi paddungnay animal?
Ay ihunay un ami munlayah hi pannigmu!
4 Ya unmu pa"ion di odolmun dumalat nan bungotmu.
Mu undan mabalin ta dumalat hene ya mahukatan tun luta ta mahlig nan duntug?
5 Makulug an ag'agan ma'ubah nan nappuhin tagun umat hinan hilaw an mun'adop
6 ta homelong nan abung ti adi mipabnang nan hilaw.
7 Din panalan hidin hopapna ya mabi'ah,
mu ad ugwan ya un miyoh'oha ti mitalupinay di hu'ina,
at nan nappuhin pangatnay manalibdud ay hiya.
8 Ya adina elan ya ene'wanah nan wadan di hulu,
at egpa'na ya nahuluy hu'ina,
9 at mahulu nan mu'udna,
ya impa'ud nan hulu hiya.
10 Ya waday nahophopan an bituh mangna ay hiyah nan dalan an pange'wana,
11 ya an amin nan pange'wana ya mimitnud nan nidugah an umipata'ot
ay hiyan paddungnay unda pudugon.
12 Hiya ya adangyan hidin hopapna,
mu ad ugwan ya munhinaang.
Ya nan nidadaan an mamannod ay hiya ya nan punligatan.
13 Atata'ot di dogohnan nalipuh di odolna,
ya mun'abulu' an amin di up'upna,
at hay atayanay hodhodona.
14 Hay atoy di mangilayaw ay hiyah nan abungnan awadan an amin di gina'una,
ya nungguyudna ta iyuynah nan alin di atata'ot.
15 Ya nan abungna ya ma'ubah ti gohbon nan mundalang an budbuda,
16 at hiya ya umat hinan ayiw an mete"ah lamutnan mamaganan ta engganah nan hapangna.
17 At ma'ubah di panginomnomandan hiyah tun luta,
ya ta"on un nan ngadana ya mi'id hitun luta.
18 Ya mapakak hiyah nan wadan di mapatal
ta miyuy hinan munhehellong ta ma'ubah hitun luta.
19 Ya mi'id ahan ah holagnah taynana,
ya hidih nan punhituwanan babluy ya mi'id ah ohah mataguh nan pamilyana.
20 Ya an amin nan mangngol hinan nappuhin ma'at ay hiya
an mete"ah buhu'an di algaw ta engganah nan a'unugan di algaw ya umogyatda,
ya wumogwogdah ta'otdah nan ma'at.
21 Hiyah ne ma'at hi moltan nan mangamangat hinan pumbaholan,
at umat hinay ma'at hinan man'ug an adi mange'gon ay Apo Dios.”