1 Datuwe nan imbagan nan patul an hi Lemuel an intugun inana i hiya. 2 Alyonay, Imbabale', he"a ya nawada'a an gapu ta hiyay imbagabaga' i Apu Dios hi ma'at ot hiya nan donglom tun tugun'un he"a. 3 Bokon hay binabai di pangiyayam hi pihhum ya bikahmu te hiyah naey lummuh nabahbahan di udum an patul. 4 Ya donglom Lemuel tun ibaga' te hay patul ya adi e mangmanginnum. Ya bokon hay na'ingil an ma'inum di nonomnomona. 5 Te mabutong'e ya linglingona nan ni'uldin ya aggena inat nan lebbengnan ma'at hinadan nun'awotwot. 6 Hay mabalin hi manginum hinan na'ingil an ma'inum ya nan mun'atte'atte an adi pa"itpol hi dogohna. 7 Ta uminum'e ya alina ya malinglingling bahan hidiyen punligatana.

8 Ya he"an patul di mangihapit hinadan mahmahmo' an adida abalinan an mangibagah nan lebbengnan ma'at i dida. 9 Ot mahapul an boddangam dida ya ta nipto' di atom an mangipanuh i dida ta adida makuluk.

10 Naligat an hama'on di linala'i nan babain maphod di pangiye"ena an paddungnay nabalbalol mu nan nabalol an batu.

11 Ta ma'dinnol nan ahawanan lala'i i hiya an namamah nan atonan mangipapto' hinan bino'lada ta adida makulangan hinan mahapulda. 12 Ya minaynayun an maphod di pangatnan ahawana an ma"id ha atonah bumahbah i hiya. 13 Ya innilanan mumpilih nadan maphod an hinulid te pinhodnan abolon. 14 Ya mahlu bon e manigoh anondan hina'amma an ta'on on idawwiy pangalana. 15 Ya adi mahuyyaman an bumangon ta wan e munha"ang hi anon nan pamilyana ya intuddunay tamuwan nadan puntamuwona. 16 Ya pa'annomnomona ni' on ahina hinubliyan ha luta. Ya inusalna nan bino'lana ta tanomanah greyp. 17 Ya mahlun tumamutamu te mabikah.

18 Ya ta'on boh on nahdom on muntamu ya waday hilbin nadan tamuna. 19 Ya hiya boy mumpudun ta abolona ta iphodnah agamidonda. 20 Ya innilanan hummo' hinadan nun'awotwot ya nadan mahapulnay boddang. 21 Ya adi minomnoman hinan kumog onu lowang te indadaana tuwaliy ma"atung an lubung nan pamilyana. 22 Ya hiya boy mangapyah iyabo'dah nan alo'anda. Ya maphod di tigona te munlubung hi maphod an linen. 23 Ya nan ahawanan lala'i ya innilan di tatagu te hiyay ohan mibilang hi mangipangpangulu i didan bimmoble.

24 Ya hay udum hi aton nan babai ya mangiyammah udum an linen an lubung ya bal'oh ta inginana. 25 Ya waday pamiyal di tatagun hiya. Ya adi minomnoman hinan ma'at hi udum hi algo. 26 Ya ma'uley panapitna ya nala'ing an muntugun. 27 Ya ipapto'nay pamilyana ya adi ma'ahigga. 28 Ta mun'am'amlong nadan imbabalenan hiya. Ya atbohdin nanongnan haphapiton ahawanay amaphod di pangatna. 29 Ta alyonay, Dakol di binabain maphod di pangiye"eda mu impohpohod di pangiye"em.

30 Nan maphod an tigon di ohan tagu ya uma"ul te mabalin an maluman. Mu nan babain waday takutna i Apu Dios ya mapemanan. 31 Ot nan athidin babai di midattan hi gungguna ta hiyay bino'lana. Ot lebbengnan lispituwon di tatagu an gapuh nan maphod an atona.