27
Hay Luwaluh Ipabagbagtuan Apo Dios
Hi David di nangitudo' eten psalm.
1 He"a, Apo Dios, di mamatal an mangipapto' ay ha"in,
ya He"a goh di baliw'u, at hiyanan mi'id ta'ta'.
Ya He"ay ihania' hitun atagu', at hay ta'ta' mah?
2 Ya wa ay ta umali nan nun'appuhiy pangatdan mamatoy ay ha"in
mu un at goh diday paddungnay mapulig.
3 Ya ta"on hi unna' li'ubon hinan do'ol an tindalu ta buhulona'
mu adia' tuma'ot ti He"a, Apo Dios, di ehdol'u.
4 Wada ahan han pohdo' an ibaga ay He"a, Apu:
iyabulutmu ni' di punnononnga' hinan Abungmun mundayaw ya munluwalun He"a eten atagu'
ta innilao' nan nidugah an amaphodmu ya nan umipanoh'aam.
5 At nan ipaligligata' ya halimunana',
ya ipo"oya' hidih nan Timplum,
at mid al'alin ha"in an paddungnay unna' ipattu' hinan pa"ata'nang an batu.
6 At an amin nan buhul'u ya apputo' dida.
Ya it'u"u nan pun'am'amlonga' an mun'onong hinan Timplum,
ya ikantaa' an ipabagbagtu He"a an Dios.
7 At donglom ni' tun luwalu', Apu,
ya hom'ona' ta abulutom nan ibaga'.
8 Ya inali' hi nomnom'uy,
“Mahapul an hi Apo Dios di pangiluwalua'!”
Ya immannung an hiyay ato' ta Hiyay pangiluwalua'!
9 At adia' ni' du'gon an baalmu,
ya adia' boholon ti He"ay gun bimmadang ay ha"in!
Ya He"ay Apu' an mamaliw ay ha"in,
at adia' ni' taynan.
10 At ta"on hi unna' inganuy ay da aman ina
mu He"a, Apo Dios, di manalimun ay ha"in.
11 At, Apo Dios, itudum ay ha"in di pohdom hi ato',
ya ipanguluwa' ta madadawoh di pundalana'
ti nidugah an do'olda nan mamuhul ay ha"in!
12 Ya adim ni' iyabulut an aton nan buhul'u nan pohdondan aton ay ha"in ti ulgudon nan tataguy layah hi aat'u,
ya nidugah an nappuhi nan pana'ta'atotdan ha"in.
13 Mu inila' ahan an matagua' ta tigo' di amaphodmu, Apu,
ad ugwan eten atagu',
14 at ehdol tu'uh Apo Dios,
ya adi tu'u tuma'ot ya numanomnom ta Hiyay edenol tu'u!