31
1 Ya intuluy Job an himmapit an inalinay,
“Ya intulag'un butiwo' nan babalahang,
ya adi' dida amnawan.
2 Ti ngadan han midat an malpuh nan Dios an wad abuniyan,
ya nan ipabanohnan malpuh nan nidugah di abalinanan wad abuniyan?
3 Undan adina moltaon nan gun mumbahol?
Ti nan gun mangat hi nappuhi ya anaad ta bo'on mah diday munholholtap?
4 Inilanan amin di ato'ato',
ya titiggonan amin di gun'u pundalanan.
5 Ya gulat ta waday inlayaha' unu way ohah binalbaliya'
6 ya hi Apo Dios di okod an mangihamad an munhumalyan ha"in,
mu agguy'u inat,
at inilanan mi'id ah numbahola'.
7 Ya gulat hi un'u inhingngi ta agguy'u inunud nan ma'andong an dalan,
unu inamnawa' ta nidduma' an nangat hinan pumbaholan,
unu gulat ta waday udumnah inat'uh nappuhi,
8 ya hay molta' ya maphod hi un nan udumnan tataguy mamto' hinan inhabal'u,
ya mahapul an mun'abu'nut an amin nan nun'itanom'u.
9 Ya gulat hi un way inamnawa' hi babai,
unu penhod'un umuy hinan ahawan di heneggon'u ta elo"u,
10 at maphod hi un nan ahawa' ya mihakup hinan udumnan linala'i,
ya maphod hi un nan udumnan linala'iy mangelo' ay hiya.
11 Ti umipabain ahan di umat hinan bahol,
at mahapul an mahumalya nan mumbahol ya mamolta.
12 Ya gulat ta ma'at di umat hina ya an amin di wan ha"in ya maphod hi un mun'apa"i
an umat hinan apuy an gohbonan amin.
13 Ya gulat ta way ililin nan baal'un lala'i unu babain ha"in
ya adi' ipanuh,
14 at hay ato' mah hi unna' bagan ay Apo Dios,
ya hay pambal'uh unna mahmahan di inat'u?
15 Ti numpaddung an hi Apo Dios di nunlumun ha"in,
ya Hiya goh di nunlumuh nan baal'u,
at mi'id di nun'abhiwanmi.
16 Ya agguy'u ahan hiniganan an gun namadabadang hinan nun'awotwot
ya nan umu'utun an binabain umalin mumpabadang hi un way mahapulda.
17 Ya undan pinunghan'uy ma'an
ta agguy'u indatan nan mumpunhinaang an nguhu?
18 Agguy'u ahan!
Ti nete"ah din a'unga' ya umat hi panalimun di ommod di nanalimun'uh nan nguhu,
ya heten nitagua' ya gun'u hinalimunan nan umutun an binabai.
19 Ti wa ay di tigo' hinan nawotwot an tatagun mi'id di lubungda
20 ya indat'uy lubungdah nan lubung an nalpuh nan dutdut di kalnilu'
ta way ilubungda ta adida mah'aw,
at hiyaat unda hapiton di amaphod'u.
21 Ya gulat ta un nonong ya hinudpa"u nan nguhu
ti inila' an waday abalina' hinan punhumalyaan,
22 ya abuluto' hi un ma'ipung tun ta'lay'u
ya maphod hi un mun'akumhu tun pu'ol'u.
23 Ti ha"in ya tuma'ota' hinan nidugah an pummoltan Apo Dios,
mu dumalat nan ta'ot'uh nan anabagtuna ya agguy'u ahan inat hana.
24 Immannung an agguy'u ahan ene'kod di nitagua' hinan inadangyan'u
an umat hinan namahmah an balitu' an agguy'u inaliy,
Hiyay pange'koda' hi baliw'u!
25 Ya agguy'u goh enehdol di a'e'gona' hinan inadangyan'u
ya an amin hinan gina'un wan ha"in.
26 Ta"on hi un'u tinnig di amaphod di algaw ya bulan
mu agguy'u dinayaw dida,
27 ya agguya' ahan na'al'alu' an ni'dayaw ay dane han dayawon nan udumnan tataguh tun luta.
28 Ya gulat ta nan umat hinay numbahola'
at maphod hi unna' moltaon an ipapatoy hinan huwis
ta way mangipa'innilah un'u din'ug hi Apo Dios an abalinanan amin di logom.
29 Ha"in ya agguya' immamlong hidin nipaligligatan nan mi'buhul ay ha"in,
ya agguya' goh nundenol hidin naguguluwandah nan nappuhin na'at ay dida.
30 Agguya' ahan numbahol ti mi'id ah ohah iniduta',
unu hay way namhoda' hi unda ma'ubah.
31 Ya an amin nan baal'u ya iniladan gunna' nun'am'amlong an nummangilih nan bunag,
at mi'id ah ohah nunhinaang.
32 Ya impahi'um'un amin di mangilin nalpuh udum an babluy,
at mi'id ah immiyan hinan dalan.
33 Agguy'u inhaut nan bahol'u an umat hi aton di udum an tatagu,
34 ya agguya' timma'ot hi inalin nan tatagu,
ya agguy'u goh inta'ot di pangabohlan nan tutulang'un ha"in hi nangalyandah unna' didindinong an adia' lumahlahun.
35 (Un mah mi'id di mangngol hi hapito'?
Ha"in ya ihapata' an immannung an amin tun hapito'!
Mu maphod hi un tabolon Apo Dios an nidugah di abalinana ta Hiyay mangipa'innilah unna' nibahhaw,
ya maphod hi un nan mi'bohhol ay ha"in ya itudo'dan amin nan ipabaholda,
ya indatdan ha"in,
36 at ala',
ya natulida' an tuma'dog ta tabolo' nan ipabaholda
ta donglon an amin nan tatagu.
37 Ya ipa'innila' ay Apo Dios an amin nan ina'inat'u
ti adia' bumain an mi'haggangan ay Hiya.)
38 Ya gulat ta un'u penloh nan lutan punhabala'
an ta"on hi un iyadin nan ad luta,
39 unu gulat ta inan'u nan nabto' an agguy'u binayadan
ta hiyay dumalat hi atayan nan nangihabal,
40 ya abuluto' kaymu an hay holo' an nun'ahbitan di ipahangawmun nen luta
ta bo'on nan wheat ya nan barle an umat hi paguy.”
Hiyah te da'puh di hinapit Job.