15
Siraw Papitwaw a Anghilis kan Siraw Papitwaw a Sabak
1 Katayoka na, nakaboya ako so matarek pa a pakaboyan do hanyit, as kan iyaw nyaya a pakaboyan, ki oltimo a makaskasdāaw. Myan saw papito a anghilis a natalek a mangyangay so papito a kalidyatan. Siraw nyaya a kalidyatan, ki manawdyi dana a maynamot ta nawri danaw tawsan no soli no Dyos a napado do tanaya.
2 Nakaboya ako so akmay tāw a naparin do sarming a nachisaglan apoy. As siraw nangābakaw so marongsotaw a animal kan iyaw no ladāwan naw, kan siraw dyaw a namarkaan so nomirwaw a ngaran na, ki maytēnek sad bitaw no akmay tāw a naparin do sarmin. Myan pa dyiraw arpa da a iyaw intorohaw no Dyos dyira, 3 as kinanta daw kantaw ni Moyses* 15:3 Inkanta ni Moyses kapagyāman na di Āpo Dyos do katayoka daw no Israelita a nangābak so kabōsor da. Eks. 15; Deot. 32 a adīpen no Dyos do kaychowa kan iyaw kantaw no Karnirwaw. Inkanta da a kon da,
“Mabīleg kan makaskasdāaw saw kaparin mo,
mo Āpo Dyos a Manakabalin do Tābo!
Malinteg ka do tābo kayayan mo, kan myan dyimo oyod.
Imo pa iyaw āri dan tabo saw a nasnasyon do lōbongaya.
4 Sino iyaw dya mamo dyimom Āpo?
Sino iyaw maskeh a mangipakatoneng so katan-ok mo?
Maynamot ta imo a moyboh masantwan.
Mangay sanchiw tabo a nasyon,
kan magdāyaw sanchid salapen mo,
ta naboya da tabo malinteg a kaparin mo.”
5 Katayoka no nya, ki naboya ko a naywangan iyaw makatayrahemaw a yanan do timplowaw do hanyit,† 15:5 Do makatayrahemaya a yanan do pagdayāwan a pinatnek ni Moyses, ki kinapya daw no bato saw a naytolasan no Dyos so asa poho a linteg na. Heb. 9:4 iyaw nawri a mismo yanan no lintegaw no Dyos. 6 Do dawri, siraw papitwaw a anghil a natorohan so panakabalin a mangyangay so papito a kalidyatan, minohtot sad timplowaw. Nakalaylay sa so maydak a masisileng, as kan myan paw balitok a banda da a pinadibed dad barōkong daw. 7 Do dawri, myan asa dyirad apataw a sibibyay a parswa nanoroh dyirad papito saw a anghil so papito a balitok a sabak, kan napno sas soli no sibibyay a Dyos a magnanayon. 8 As iyaw timplowaw, ki napno so ahob a mangipaboya so katan-ok kan kabīleg no Dyos. Abaw nakasdep do timplowaw nandad nakaparin da tabo no papitwaya kalidyatan a inyangay dan papitwaya kaanghil do tanaya.