1 Bata pa ni ĀPO a Manakabalin do Tābo a kāna, “Chiban nyo! Īto a panmahen ko a toboyen pachirawatan ko tan yay na paysonongen ayaman ko.* 3:1 Mt. 11:10; Mk. 1:2; Lk 7:27 As si Āpo a chichichwasen nyo, ki maychihat anchi a mangay do timplo na. As iya paw pachirawatan no tōlag† 3:1 Iyaw “pachirawatan no tōlag,” ki iyaw Mesias a si ĀPO Jeso-Kristo. a ahahayen nyo, ki īto a mangay.”

2 Ki sino paro makaibtor anchi do arawaw a kawara na? Sino paro makapaytēnek kan omsalap sya do kapagparang naw? Iya, ki akmanchiw apoy a manglōnag so pasek kan akmanchiw sabon a mayit a makapanyidak so laylay. 3 Maydisna anchi a akmas manglonlōnagaw kan mangdaldalosaw so pirak a mangdalos siras Lebita kan manglōnag sira akmas pirakaw kan balitok. Tan komwan, mirwa sanchi a mangidāton so omno a dāton di ĀPO. 4 Do dāwri, omno sanchiw dāton saw no Joda kan Jerosalem a makaay-āyo di ĀPO a akma do homnabas saya a araw kan nakarahan saw a tawtawen.

5 Bata pa ni ĀPO a Manakabalin do Tābo a kāna, “Do dāwri, maypasngen akonchi dyinyo a mangokom. Igodes konchiw magtistīgo so kontra dyirad manolib saw,‡ 3:5 Eks. 22:18; Leb. 20:27 machikamalāla saw, siraw mangpaneknekaw so bayataw,§ 3:5 Eks. 20:14, 16 siraw mangkōsit siras maytaytarābako do sweldo da, siraw mangidadanes siras bālo kan olīla, kan siraw mangbalat so kinalinteg para do gan-ganaet saw a machiyan dyinyo,* 3:5 Eks. 22:21; Deot 24:17-18, 27.19 as kan siraw abwaw so anyib dyaken.”

6 Bata pa ni ĀPO a Manakabalin do Tābo a kāna, “Yaken iyaw ĀPO a dya magbalbāliw. Dawa, inyo a kapotōtan ni Jakob, ki napatawos kamo aba. 7 Makayapo do chimpo da no aāmang nyowaw, tinadyichokodan nyo na saw bilbilin kwaw, kan tinongpal nyo saba. Maybidi kamo na dyaken, as maybidi akonchi met dyinyo. Ki iyahes nyo a kon nyo, ‘Maypāngo kapaybidi namen?’

8 “Manakaworiw tawo do Dyos? Ki aran komwan, manakanakaw kamwaya dyaken! Ki iyahes nyo a kon nyo, ‘Maypāngo a manakaw kami dyimo?’ Pinarin nyo do apagkapollo† 3:8 No apagkapollo, ki no chaasa poho no tabo mohamoha. Leb. 27:30; Nom. 18:21-29 kan dāton nyo saw dyaken. 9 Nabay kamo, inyo a intīro a nasyon, ta manakanakaw kamwaya dyaken. 10 Mangyangay kamo na so komplīto a apagkapollo nyo do pangapyanaw tan myan manawob a mākan do pagdaydayāwan ko. Sigi, soōten nyo yaken, as chiban nyo an dyi konchi a iwangan bintan saw no hanyit kan padohen konchi dyinyo somawasaway a bindisyon. 11 Palobōsan ko sabanchiw insikto kan ganyit a mangrārayaw so mohamoha nyo. As no kaobāsan nyo, ki mawlal sabaw asi da sakbay a maynoy. 12 Do dāwrinchi, tabo no nasnasyon, ki tawagan danchi inyo so mabindisyonan, ta makapasoyosoyot tana nyo.” Nyaw binata ni ĀPO a Manakabalin do Tābo.

13 Bata pa ni ĀPO a kāna, “Mayolong kamo do kapaychirin nyowaya dyaken. Ki aran komwan, iyahes nyo a kon nyo, ‘Maypāngo kapayolong namen do kapaychirin namen dyimo?’ 14 Binatabata nyo a kon nyo, ‘Abaw sinpaspangan no kapagsīrbi di ĀPO. Aryoriw mahahap namen do kapagtongpal namen so bilbilin na mana do kapagdongdong-aw namen do salapen ni ĀPO a Manakabalin do Tābo a mangipaboya so kapagbabāwi namen? 15 Changori, do kapakaboya namen, sirayaw mapapangas sayaw nabindisyonan. Siraw mamariparinaya so marahet, ki maballīgi sa. As aran siraw mangsōot so Dyos, ki abayaw pakaan-anwan da.’ ” Nawriw idabadabay nyo.

16 Sinpangan na, siraw myanaw so kaanyib di ĀPO, ki nagsasarīta sa, kan inadngey sa ni ĀPO. Do salapen na, myan naitolas do nahon a libro a pangnakenakem so ngarangaran dan manganyibaw dya kan magdayāwaw do ngaran na. 17 Batahen ni ĀPO a Manakabalin do Tābo a kāna, “Siraw tawotawo ko, ki machitatārek sanchi a taywara a mapateg dyaken do arawaw a kapangokom ko, as chāsi ko sanchi a akmas kāsi no asa a āmang do pōtot na a matodyo dya. 18 Maboya nyonchi a mirwa iyaw paytarkan no malinteg kan marahet, iyaw paytarkan no magsīrbi do Dyos kan dya magsīrbi dya.”