1 Homnabas danaw āro a tawen do nakaitorohaw ni ĀPO dyirad Israelita so talna a yapo do kabōsor da saw a omdibon dyira. Do dāwri, laklakayan dana si Joswe. 2 Tinawagan naw tabo a Israelita a pakairāmanan dan panglakayen, pangpangōlo, ok-okom, kan opisyalis saw, kan binata na dyira a kāna, “Laklakayan ako naya. 3 Inyo a mismo, naboya nyo tabo pinarin ni ĀPO a Dyos nyo dyirad tabo nya saya nasyon a maynamot do kaganay nyo. Si ĀPO a Dyos nyo, iyaw nachigobat para dyinyo. 4 Kanakmen nyo nakapaychakarwa ko na dyinyo so pinakabinglay dan trībo nyo tana daw no natokos saya nasnasyon a ari nyo pad nasākop. Nairāman dyira dyaw nasyon saw a sinākop ko do payawan no Oksong Jordan do dāya a manda do Mediterranean a Tāw do lāod. 5 Si ĀPO a Dyos nyo, ki paksyaten na sanchi do ayaman nyo. Padoydoyen na sanchi a machibawa do kalongo nyo. Dyira nyonchiw tana da a akmas inkaryaw dyinyo ni ĀPO a Dyos nyo.

6 “Dawa, payiten nyo aktokto nyo kan kapyahēn nyo a tongpalen tābo naitolas do Librowaw no Linteg ni Moyses a dya somiwal do kawanan mana do kaholi.* 23:6 Jos. 1:7 7 Machirārayay kamo aba dyirad tawotawo saya do nasnasyon saya a nabidin a myan dyinyo. Abneken nyo abaw ngarangaran dan dyos da mana pagsapata iyaw ngaran da. Dayāwen nyo saba mana magrōkob dyira. 8 Basbāli, nāw nyo a sitatalek di ĀPO a akmas parinen nyowaya mandas changori.

9 “Ta si ĀPO, napaksyat siras magdindināmag kan mabibīleg saya nasnasyon do linongwan nyo. Mandas changori, abaw makapaytēnek a mangābak dyinyo. 10 Makapaksyat asa dyinyo so asa ribo, ta si ĀPO a Dyos nyo, ki machigobat a para dyinyo a akmas inkari naw. 11 Dawa, kaannadan nyo kadaw nyo si ĀPO a Dyos nyo.

12 “Ta an tomadyichokod kamo kan machirārayay kamo dyirad tawotawowaw no nasnasyon a nabidin dyinyo, as kan an machikabahay kamo dyira, 13 masigorādo a paksyaten paba ni ĀPO a Dyos nyo siraw nasnasyon saya do longwan nyo. Basbāli a siranchiw mayparin a akmay asdok kan saltok a mangotap dyinyo. Siranchiw akmay iplot do bokot nyo kan akmay nōlok do mata nyo mandan maopas kamo do dyaya maganay a tana a intoroh dyinyo ni ĀPO a Dyos nyo.

14 “Changori, īto danaw kadiman ko. Chapatak nyo do tābo pōso nyo kan do tābo katawo nyo a abaw aran asā dyirad tabo saya magaganay a kari a intoroh dyinyo ni ĀPO a Dyos nyo iyaw dya natongpal. On, tabo kari na dyinyo, ki natongpal. Abaw asa dyira a dya natongpal. 15 Ki akmas nakatongpal no kāda maganay a kari ni ĀPO a Dyos nyo dyinyo, komwan kaipadidiw ni ĀPO dyinyo so tabo marahet an dyi nyo a tongpalen a mandanchan abohen nanchinyo do nyaya maganay a tana a intoroh na dyinyo. 16 An sokīren nyo tōlag ni ĀPO a Dyos nyo a inmandar na dyinyo, as may kamo a magsīrbi dyirad kadwan a dyos kan magrōkob dyira, iyaw kasoli ni ĀPO, komnyay dyinyo. Malisto kamonchi a maopas do maganayaya tana a intoroh na dyinyo.”