3
Matortoray si Jesos kan si Moyses
1 Dawa, inyo a naibidang a kakakteh ko a pinidi no Dyos kan rārayay ko a tinawagan Āpo Dyos, karahmen nyo a iktokto maynamot di Jesos a iyaw tinoboy no Dyos a Katotohosan a Pādi do kapanganohed ta a mangibabaet so tawotawo kan Dyos. 2 Mapagtalkan kan matodyo si Jesos do Dyos a namidi sya a akmas Moyses a napagtalkan a nangtongpal so chakeyaw no Dyos do nakaaywanaw siras tawotawo saw no Dyos.* 3:2 Do chirin Griego, siraw tawotawo saw no Dyos, ki kayarig daw bahay a yanan no Dyos. Nom. 12:7 3 Ki syimpri, madaydāyaw pa a adayo si Jesos kan Moyses. Tan an ipariho ta do kapatnekaw so bahay, rakorakoh dāyaw no mapatnekaw so bahayaw kan iyaw mismwaw a bahay. Komwan sa Jesos kan Moyses. 4 Ta oyod a kāda bahay, ki myan napatnek sya. Ki si Āpo Dyos, ki iyaw mamariparin so tabo. 5 Oyod a matalek si Moyses do kapaytarabāko na a intoroh ni Āpo Dyos dya a mangaywan so tawotawo no Dyos. Ki aran komwan, alit na kayarig na lang asa a adīpen do bahay no Dyos. As no pinarin naw, ki inpakatoneng na lang maynamot do masakbayanaya a parinen anchi no Dyos. 6 Ki matarek si Jesos. Ta iya, ki adīpen aba, an dya mismo a Anak no Dyos. Iya paw matalekaw a akin dyira so bahayaw. As yaten, ki mairāman ta na do pamilya na, an nāw ta na a matored a monot do tabo chakey na kan abaw polos kasnek ta a mangigpet so namnāma taya dya.
No Kapangahwahok kan Ballāag
7 As dawa, parinen ta pakono akmas binataw no Ispirito Santo do Masantwan a Tolas a kāna,
“Sichangori, an makadngey kamo so chirin no Dyos,
8 Magsōkir kamo aba do Dyos
a akmas nakapachiribīldi daw dya no kapoonan nyo saw
do let-ang do kaychowa.
9 Sinōot da yaken daw no kapoonan nyo saw
a aran naboya daw makaskasdāawaw a pinarin ko
do irahem no apat a poho a katawen do kayan daw do let-ang.
10 Dawa, siraw nawri a tawo, ki nakasoli ako dyira,
kan binata ko a, ‘Pirmi da yaken a tadyichokodan,
ta dān da a dya tongpalen bilbilin ko.’
11 As dawa, do nakasoli kwaw dyira,
inkari ko a polos dana sanchi a dya makasdep
do paynahahan a insagāna ko a para dyira.”† 3:11 Sal. 95:7-11; Eks. 17:1-7; Nom. 14:1-13
12 As dawa, kakakteh ko, magannad kamo tan abo pakono dyinyo mayparin a marahet so kapangtokto a dya manganohed a mapawnot dyinyo a machisyay do sibibyayaya a Dyos ta, 13 basbāli a nya pakono rebbeng na parinen nyo do kayan payan ōras nyo a mangadngey so chirin ni Āpo Dyos. Masisīta a nāw nyo a mangbagbaga so katakatayisa dyinyo tan dyi kamo a maallīlaw do gatos a iyaw nawri, ki mapaywam dyinyo a mangsōkir so Dyos. 14 Ta mairāman ta na a machirārayay di Kristo, an nāw ta na a igpet kapanganohed ta a yapo do kairogi na a mandan pandan kabyay ta.
15 Iktokto nyo paw naitolasaw do Masantwan a Tolas a kāna,
“Changori, an makadngey kamo so chirin no Dyos,
magsōkir kamo aba do Dyos
a akmas nakapachiribīldi daw dya no kapoonan nyo saw.”‡ 3:15 Sal. 95
16 Sino paro saw nakadngey so chirin no Dyos, kan sino paro saw somnokir sya? Sirabawriw inpangōlwanaw ni Moyses do nakakaro daw a tabo do Egipto? 17 Sino paro saw nakasolyanaw ni Āpo Dyos do irahem no apat a poho a katawen do kabidibidi daw do let-ang? Sirabawriw tawotawo saw a naygatos a pinaychaharaharag no kadiman do let-ang? 18 Sino pa saw nangikaryanaw ni Āpo Dyos a polos sanchi a dya makasdep do paynahahan a insagāna na a para dyira? Sirabawriw komnontra saw dya? 19 Dawa, napatakan ta na an āngo dyi da nakasdepan do paynahahan a insagāna no Dyos a dyira da, ta iya sawen kabon anohed da dya!