1 Sinpangan na, komnaro sa Abraham do yanan Mamre, kan lomnongo sad tana Negeb do abagātanen Kanaan. Minyan sa so dēkey a chimpo do naypayawan Kades kan Sor. Somarono, nangay sa do idi a Gerar. 2 Do kayan daw do Gerar, no inbahebahey ni Abraham a maynamot di Sara a baket na, ki maykakteh sa. Dawa, inpatawag ni Āri Abimelek a āri do Gerar si Sara. 3 Ki do dāwri a mahep, napaboyaw no Dyos di Abimelek do asa tayēnep a kāna, “Masigorādo a madiman ka maynamot ta inhap mo nya mabakes a myan danas kabahay.”

4 Ki do dāwri, ari na pad kinaoknod ni Abimelek si Sara. Dawa, binata na di Āpo a kāna, “Imom Āpo, chapatak mwa abo marahet a pinarin ko dya. Dimanen mori yaken kan siraw tawotawo kwaya a aran abo gatos ko dya? 5 Nayengayaw inbahey da, da Abraham kan Sara dyaken a maykakteh sa ta dawa. Aba polos marahet a iniktokto ko, kan madalos kaparin ko do kahap kwaw sya.”

6 Ki tinbay no Dyos do tayēnep a kāna, “On, chapatak kwa abaw marahet a iniktokto mo a parinen mo. Dawa, inpalōbos kwaba a sinalid mo nya mabakes, tan dyi ka maygatos dyaken. 7 Sichangori, pabidyen mo naw nya mabakes do kabahay naw. Ta iyaw nawri a mahakay, ki asa propīta ko, as paydasal nanchimo tan dyi ka madiman. Ki an dyi mwa pabidyen, syirto a madiman ka kan siraw tabo tawotawo mwaya.”

8 Do kamabekasanaw, minhep a naybangon a napatawag si Abimelek so tabo opisyalis na saw, as nakaibahey nas tabo napariparinaw do tayēnep na. Ki do nakadngey daw sya, taywaraw nakamo da. 9 Katayoka na, pinatawag ni Āri Abimelek si Abraham, kan binata na dya a kāna, “Inanghen mo yamen? Āngo gatos ko dyimo, tan nangyangay kas pangbakebakel mo dyaken kan do pagāryan kwaya? Pinarin mwaya dyaken, ki rombeng a dya parinen do kapayngay a tawo.” 10 Inyahes na pa, “Samna! Āngo ta pinarin mo nyaya?”

11 Ki tominbay si Abraham a kāna, “On, ata, no myan do aktokto ko, ki abaw mamo do Dyos do logar nyowaya. Dawa, namo ako, kan binata ko do inawan ko a kon ko, ‘Āngonchan dimanen da yaken, as kahap das baket kwaya?’ 12 No ibahey kwaya dyimo, mo āpo āri, ki oyod. Oyod a maykakteh kami do āmang, ki engga do ānang. Ki aran komwan, naychabahay kami. 13 Do nakatoboyaw no Dyos dyaken a karwan ko kapamilyaan ni āmang ko a mangay do matarek a tana, inbahey kod baket ko a kon ko, ‘An oyod a chāsi mo yaken, do tabo a ngayan ta, ki ibahey mwa maykakteh ta.’ ”

14 Sinpangan na, pinaybidi ni Abimelek si Sara di Abraham, as kan tinorohan na pas karniro, bāka, kan kadwan dyirad adīpen na saw a mahakay kan mabakes. 15 Do dāwri, binata ni Abimelek di Abraham a kāna, “Chiban mo tabo tana kwaya. Mamidi kas chakey mwa yanan, kan omyan kamo daw.” 16 Binata na pa di Sara a kāna, “Tinorohan ko kakteh mwaw so asa rībo a kapidāso a kwarta.* 20:16 Asa rībo a kapidāso a kwarta do dāwri, ki nagistayan 11.5 kakilo. No balor no asa adīpen do dāwri a chimpo, ki tatdo a poho lang a kapidāso a kwarta. Eks. 21:32 Nyaw pakaboyan dan tabo rārayay nyo saw a abaw naparin dyimo a madi, as kan paysonongan danan aran āngo a kasnek a rinawat mo.”

17-18 Maynamot do naparinaya di Sara a baket ni Abraham, inpalōbos aba ni ĀPO a myan matorohan so anak do pagāryan ni Abimelek. Sinpangan na, naydasal si Abraham do Dyos, as pinapya no Dyos si Abimelek kan si baket na kontodo mababakes saw a adīpen na tan mirwa dana sa a maymanganak.