1 Sichangori, maynamot ta inbidang naynyo no Dyos a mapateg a anak na, iya dana pakono tolāden nyo do tabo kabibyay nyo. 2 On, maybibyay kamo a maysin-aadaw a akmas nakadawaya ni Kristo dyaten do nakaitoroh naw so byay na a maynamot dyaten. Ta an maynamot dya, ki taywara a chinahwahok no Dyos a akmay mabanglo a dāton a naiparawat do salapen na.

3 Dawa, sichangori, maynamot ta tawotawo narana inyo no Dyos, dyi nyo pakono a simsiman nya saya a marahet a kaparin nyo a akmas kapaychakatekateh a machoknod, malapos a kaparin mana kapayāgom.* 5:3 Kol. 3:5 Ta siraw nyaya kaparin, ki dyi sa pakono a maparin dyirad tawotawo saw no Dyos. 4 Asa pa, do kapachisarsarīta nyo, dyi kamo pakono a maychirin so malapos mana abos sirsīrbi a kapaychirin kan siraw malapos saw a sisyabak. Ta siraw akma syay a chirin, ki makwan an myan sa dyinyo, basbāli a nawri pakono parinen nyo kapagyāman nyo do Dyos. 5 Naknakmen nyo nyaya, ta oyod: Iyaw no pagtorayan no Dyos kan si Kristo, ki maitoroh aba polos dyirad maychakatekateh a machoknod kan siraw malaposaw so dadakay, as kan siraw maāgom saw. On, no kapayāgom, ki asa klasi a kapagdaydāyaw do didyosen. Ta siraw maāgom, ki chadachadaw daw myan saya do lōbongaya kan iyaw kapangahwahokaw do Dyos.

6 Maallīlaw kamo aba dyirad mangibaheyaw a marahet sabaw nya saya a kaparin, ta maybayataw sa, as kan dosāen na sa ni Āpo Dyos siraw dyaw a magtongpal dya a mamarin so akma syay. 7 Dawa, machirayarayay kamo aba dyirad akma siras syay a tawotawo. 8 Ta do nakarahan, maybibyay kamo do kasarisaryan, ta chapatak nyo abas Āpo Dyos. Ki sichangori, maynamot ta nayparin kamo na tawotawo no Dyos, myan kamo na do sēdang. As dawa, maybibyay kamo na pakono a akmas tawotawo saw do kasēdangan a makapatak so chakeyaw no Dyos. 9 Ta no tawowaw a myan do sēdang, ki may-asi so tabo a kīta no maganay, kinalinteg, kan oyod. 10 Dawa, ipasnek nyo pakono machinanawo so makahwahokaw di Āpo.† 5:10 Roma 12:2 11 Tadyichokodan nyo saw marahet saya a abos sinpaspangan a kaparin no tawotawo saw a myan pa do kasarisaryan, basbāli a ikarigatan nyo mamarin so maganay tan panyibaya daw marahetaw a pinarin da. 12 Ta taywara makasnesnek a aran tod mo lang a isaritaw parinen daw do malimed. 13 Ta anchan maiparang dana do sēdang tabo no makasnesnek saya a pariparinen da, ki dawri dananchiw malawag a kaboyan so marahet saya a dadakay da. 14 Ta tabo nonchi a maiparang, ki masēdangan sanchi. Akmas myanaw a naitolas do kanta a kāna,

15 As dawa, magannad kamo do tābo kabibyay nyo. On, maybibyay kamo paba a masalanga, an dyi dana asa masīrib! 16 Parinen nyo tabo a maparin nyo a mamarin so maganay, ta chapatak nyo na a marahet dana saw nyaya araw. 17 Paychabobohen nyo abaw arang nyo, basbāli a iktokto nyo pakono a maganay an āngo chakeyaw no Dyos dyinyo.

18 As maybobok kamo paba, ta nyaw pakayapwan nyo a mamarin so makabābaba saya a pariparinen nyo a mapawnot dyinyo do pakarārayawan nyo, basbāli a mapno kamo pakono do Ispirito Santo tan iya danaw mangigpet dyinyo. 19 Nāw nyo pakono a ipanakenakem do katakatayisa dyinyo no naitolas saw a kanta a yapo do Salmo a pakaidayāwan no Dyos. Magkanta kamo pakono so matatarek saw a pagdaydāyaw do Dyos kan siraw kanta saw a intoroh dyinyo no Ispirito Santo. On, kantaan nyos Āpo Dyos a yapo do makatayrahem a aktokto nyo.§ 5:19 Kol. 3:16 20 Pirmi kamo pakono a magyamyāman do Dyos a Āmang ta do tabo a kayayan nyo a maynamot do kapachasa nyo naya di Āpo Jeso-Kristo. 21 Maysinpapaitoray kamo, ta nawriw pakaboyan so kayan anyib nyo di Kristo.

22 Inyo a mababakes, mapaitoray kamo pakono dyirad kabahay nyo, ta nawriw chakey ni Āpo a parinen nyo. 23 Ta no mahakay, ki iyaw pinakaoho no baket naw a akma si Kristo a mangipangōlo so iglisya a pinakainawan na.* 5:23 Epe. 1:22; Kol. 1:18 Ta iya, ki intoroh naw byay na a pangisalākan siras manganohedaw dya. 24 As dawa, inyo a mababakes, machita paitoray kamo pakono do kabahay nyo do tabo a akmas kapaitoray no iglisya di Kristo.

25 Ki inyo a mahahakay, ipaboya nyo adaw nyo dyirad kabahay nyo saw a akmas kadawaw ni Kristo dyaten a manganohed a iglisya na. Ta no pinarin na, ki intoroh naw byay na a maynamot dyaten. 26 On, pinarin naw nyaya tan payparinen na yaten a iglisya na a masantwan do salapen no Dyos. Ta naibidang ta na a nadalosan do salapen no Dyos a maynamot do nakapanganohed taw do chirin na kan do nakapagpabawtisar taw do ranom. 27 Pinarin naw nyaya tan komwan, pagsagānaen na yaten a manganohed a sidadalos† 5:27 Pal. 19:7-8; 21:2, 9 kan abos mancha mana pakadilawan mana aran āngo pagkorangan do salapen na. On, pagsagānaen na yaten a manganohed a masantwan kan aba polos pakapilāwan ta. 28 As dawa, machita chadaw no mahakay kabahay na a akmas kadaw nas inawan na. Ta no madaw so baket na, bāli inawan naranaw chinadaw naw. 29 Ta aryoriw tawo a mangipsok so mismo na inawan? Aba, basbāli a pakanen na kan aywanan na a akmas kaaywanaw ni Kristo dyaten a manganohed dya 30 Ta aran sino a manganohed, ki nairāman dana do inawan Kristo. 31 Natongpal danaw naitolasaw do Masantwan a Tolas a kāna,