1 Nyaya tolas, ki yapo dyaken a si Pablo a asa apostol ni Kristo Jesos a maynamot do pangeddeng ni Āpo Dyos.

Maytolas ako dyinyo a tawotawo no Dyos do Epeso* 1:1 Do kadwan saw a kaaadanan a manyoskripto, abaw chirin a “do Epeso.” a mapagtalkan do kapanganohed nyo di Kristo Jesos.

2 Myan pakono dyinyo parābor kan kaydamnayan no kapangtokto a yapo di Āpo Dyos a Āmang ta kan yapo di Āpo Jeso-Kristo.

3 Daydayāwen ta si Āpo Dyos a iyaw Āmangaya ni Āpo ta a Jeso-Kristo, ta tinorohan na yaten so tabo a naispiritwan a bindisyon a myan do hanyit a makaynamot do kapachasa tayad Kristo. 4 Ta do kasakbay paw no nakaparswa no lōbongaya, ki pinidi narana yaten no Dyos a mayparin a machasa di Kristo. Tan komwan, payparinen na yaten a tawotawo na a masantwan kan abanchiw pamagatosan na dyaten do salapen na. 5 On, maynamot do adaw na, ki sīgod dana inranta no Dyos a payparinen na yaten a anak na a maynamot do pinarinaw ni Jeso-Kristo. On, pinarin naw nyaya a maynamot ta nyaw chinasoyot na kan sīgod a pinanggep na a parinen. 6 Dawa, sichangori, madaydāyaw si Āpo Dyos a maynamot do nya makaskasdāaw a parābor na a chinadadam na a intoroh dyaten a maynamot ta nachichasa ta do Anak naya a oyod nas chadaw.

7 Ta makaynamot do rayaw ni Kristo a minoyog do nakadiman naw do kros, ki naisalākan ta na. No chakey na batahen, ki napakawan ta na do gatogatos ta a maynamot do maboslon a parābor no Dyos. 8 Nya parabor, ki chinadadam na a intoroh dyaten kontodo sīrib kan kapakaāwat tan mapatakan ta a maganay iyaw pinanggep naw dyaten. 9 On, inpakatoneng na dyaten nya panggep na a naitayo a plāno na do nakarahan a inkeddeng na a matongpal dana di Kristo. 10 As nya danaw plāno naw a patayokahen nanchi do naikeddengaw a chimpo: Raparapahen nanchi a tabo pinarswa na a myan do hanyit kan do tana, as kan si Kristo danaw pinakaoho da tabo a abos pandan.

11 Tabo parinen no Dyos, ki parinen na sigon do sīgodaw a pinanggep na kan chakey na. Komwan nakapidi na dyaten a mayparin a tawotawo na a maynamot do kapachichasa ta di Kristo, ta nawriw inkeddeng na do sakbay paw no nakaparswa na so lōbongaya. 12 Tan komwan, yamen a nanma a nanganohed di Kristo, ki idaydāyaw namen si Āpo Dyos a maynamot do makaskasdāawaya a parābor na dyamen.

13 Masaw dyinyo a somnarono dyamen a nanganohed di Kristo. On, ki aran inyo, ki nairāman kamo na a machichasa di Kristo, ta do nakapangadngey nyowaw so oyod a iyaw Maganayaya a Dāmag a maynamot do kaisalakānan nyo, ki oyod a nanganohed kamo dya. Dawa, minarkaan naynyo no Dyos a dyira na do kaitoroh naw dyinyo so inkari naw a Ispirito Santo. 14 Iyaw nyaya Ispirito, ki iyaw pangsigorādo so rawaten taw anchi a tabo a inkari no Dyos dyaten a tawotawo na. On, iya paw mangipanamnāma dyaten a mandan karawat tas kakomplito no nya kaisalakānan ta. Dawa, idaydāyaw ta pakono si Āpo Dyos a maynamot do makaskasdāawaya a parābor na dyaten.

15 As dawa, nyaw naynamotan na a nakayapo do nakadngey kwaw so kapanganohed nyo di Āpo Jesos kan no rakohaya a kadaw nyo dyirad tabo tawotawo no Dyos, 16 ki machipanda abaw kapagyamyāman ko do Dyos a maynamot dyinyo, kan nāw ko a omnakenakem dyinyo do kāda kapaydasal ko. 17 On, nyaw pangdakdaw ko do Dyos a madaydāyawaw a Āmang ta kan Dyos ni Āpo ta a si Jeso-Kristo a torohan naynyo so sīrib kan kapakaāwat nyo a yapo do Ispirito na tan maypaypangay paw katoneng nyo so maynamot dya. 18 Paydaydasal ko paynyo tan masēdangan pangtoktwan nyo tan matonngan nyo iyaw hahawen nyowaya a maynamot do nakatawag na dyinyo, as kan tan mapatakan nyo iyaw maboslonaw a bindisyon a kinapya na a para do tawotawo na. 19 Asa pa, paydasal koynyo tan matonngan nyo abwayas kapayngay so kabīleg a panakabalin a myan dyaten a manganohed di Kristo. Iyaw nya panakabalin a somidosidong dyaten, ki iyaw panakabalin no Dyos a 20 naipaboya do nakapagōngar naw si Kristo, as kan do nakapaydisna naw sya do makanawan naw do hanyit. 21 Changori, dawriw pagtorayan ni Kristo, kan iyaw kapagtoray na, ki matortoray kan aran sino a magsaad so kinar-āri, katoray, kinamanakabalin, mana kabīleg.† 1:21 Kol. 1:16; 2:18. No chakey na batahen dya, ki siraw anghilis saw a myan so panakabalin kan toray. Roma 8:38; Epe. 2:2; 6:12; Heb. 1:5-14; 1 Ped. 3:22 As iyaw āwag ni Kristo, ki iyaw kapapatgan do aran sino a myan so toray, as kan sichangori aba lang, an dya abos pandan.‡ 1:21 Pilp. 2:9-11; Heb. 1:4; 1 Ped. 3:22 22 No pinarin no Dyos, ki inpaitoray na di Kristo tabo a naparswa, as kan tinongdo na a iyaw mangipangōlo so iglisya a siraw tabwaw a manganohed dya.§ 1:22 Epe. 5:23-24; Kol. 1:18 23 Tan komwan, iya danaw pinakaoho ta a manganohed dya, as kan yaten, ki akmay pinakainawan na. Tan komwan, komplito a mabata asaw inawan. Aba polos pagkorāngan na a mangipangōlo dyaten, ta iya, ki myan do tabo a mangapnopno so tabo a naparswa.* 1:23 Yaten namatayoka si Kristo, ta yaten pinakainawan ni Kristo a mamatayoka so tarabāko na. Kol. 1:17-18, 24