1 Si Joab a anak ni Seroyas, ki nadlaw naw kailiw naw no āryaw do pōtot naw a si Absalom. 2 Dawa, nanoboy si Joab so mangay do Tekowa kan napahap so asa masīrib a mabakes. Do nakawara naw, binata ni Joab dya a kāna, “Magpamarang ka a akma kay magdongdong-aw. Maylaylay ka so laylay naw no magdong-aw, kan mangosar kaba so aran āngo a mabanglo a lana. Magpamarang ka akmay nahay dana a nagdongdong-aw. 3 As kangay mod āri, kan ibahey mo dyaw batahen kwaya dyimo.” Do dāwri, inbahey ni Joab an āngo ichirin nanchi do āryaw.

4 Do nakangayaw no mabakesaw a taga Tekowa do yananaw no āri, nagrōkob do tana a magdāyaw dya. Binata na a kāna, “O āpo āri, sidongan nyo pa yaken!”

5 Inyahes no āryaw dya a kāna, “Na, āngo riribok mo ta dawa?”

Inatbay no mabakesaw a kāna, “Asa kwaw a bālo. Nadiman danaw si lakay ko. 6 Yaken a pachirawatan mo, ki myanaw dadwa a anak ko a mahahakay. Do naypisaw a araw, naydiman saw dwa hakawan. Maynamot ta abo napaysyay dyira, kinelbat no asaw, as nakadiman na sya. 7 Changori, machikontra tabo partīdos dyaken a pachirawatan mo, kan batahen da a kon da, ‘Iparawat mo dyamen iyaw nangdimanayas kakteh naya tan dimanen namen a pangbahes so byay no kakteh naya a diniman na.’* 14:7 Sigon do Linteg ni Moyses, machita a madiman iyaw mangdiman. Nom. 35:19-21 An komwan, abohen da panchiw magtāwidaya. As ospen danchiw moybohaya a nabidin a inmaya ko, as kan mabo dana met iyaw no ngaran kan kapōtotan no lakay kwaw do dya tana.”

8 Binata no āryaw do mabakesaw a kāna, “Somabat ka na, ta yaken anchiw mangimandar so pakasolbaran nya riribok mo.”

9 Ki binata no mabakesaw a taga Tekowa do āryaw a kāna, “Mo āpo a āri ko, yaken pakono angayan pamagatos kan iyaw no pamilya ko an myan mangbabalaw dyimo. Dyi pakono a imo kan pagāryan mo.”

10 Initbay no āryaw a kāna, “Aran sino a mangichirin so maikontra dyimo, ki yangay mo dyaken, kan ririboken na pabanchi imo.”

11 Binata no mabakesaw a kāna, “An komwan aket, mo āpo āri, isapata mo pa di ĀPO a Dyos mo tan mangdiman paba iyaw no mamahesaw, kan madiman aba iyaw anak kwaya.”

Binata no āryaw a kāna, “Akmas kasigorādo no kasibibyay ni ĀPO, abaw aran asa a boboh a masday do tana a yapod oho naya no anak mwaya.”

12 Binata dana no mabakesaw a kāna, “Palobōsan mo pa yaken a pachirawatan mo a maychirin pa dyimo mo āpo a āri ko.”

“Na, maychirin ka ah,” initbay na.

13 Binata no mabakesaw a kāna, “Āngo ta inplāno mo komwan a maikontra dyirad tawotawo saya no Dyos? Do nakaibahey mo so nya a disisyon, inokom mo abawriw inaynawan mo, do dyi mwa pinaybidyan so pōtot mwaw a pinaksyat mo? 14 Machita madiman tanchi a tabo a akmas napadwaw a ranom do tana a dyi dana makpeh. Ki tod naba abohen no Dyos iyaw no byay. Basbāli a ipamosposan na a mapaybidi saw napaksyataw a tawo tan dyi dana nāw na komwan.

15 “Nangay ako dya, mo āpo a āri ko a mangibahey so nyaya dyimo, ta inamomo na yaken tawotawo. Naktokto ko a pachirawatan mo a kon ko, ‘Mangay akonchi a machisarīta do āri, ta ara nanchi a parinen iyaw akdawen kwaya dya. 16 Sapay pakono ta adngeyen kan isalākan no āryaw iyaw pachirawatan naw do makeyaw a mangabo dyamen a dadwa kan anak kwaw do inpatāwidaw no Dyos dyamen.’

17 “Iniktokto ko a pachirawatan mo a kon ko, ‘Paynahahen nanchi yaken no ichirin mom āpo a āri ko.’ Ta no āpo a āri ko, ki akmay anghil no Dyos a makapaytarek so kosto kan madi. Si ĀPO a Dyos mo pakono myan dyimo.”

18 Do dāwri, inatbay no āryaw mabakesaw a kāna, “Itayo mwaba dyaken, ta ariw iyahes ko dyimo.”

“Na, ibahey mo pa, mo āpo a āri ko,” binata no mabakesaw.

19 Inyahes no āryaw a kāna, “Intoboyawri ni Joab dyimo tabo nyaya?”

Inatbay no mabakesaw a kāna, “Akmas kasigorādo no kasibibyay mo a āpo a āri ko, polos a dyi ako a makaliklik do aran āngo a ibahey mo. On, si Joab a pachirawatan mo iyaw no nangmandar dyaken a parinen ko nya, kan iya paw nangichirin dyaken an āngo saw no ibahey ko. 20 Pinarin naw nya tan mapaysonong no kayayan sichangori. Ki mo āpo ko, myan sīrib mo a akmay sīrib no anghil no Dyos, kan chapatak mo tabo mapariparin do tanaya.”

21 Sinpangan na, binata no āryaw di Joab a kāna, “Sigi, palobōsan ko nya. Ngay, mangay ka kan yangay mo a isabat barwaw a si Absalom.”

22 Nagrōkob si Joab do tana a magdāyaw dya, kan binindisyonan naw āryaw. Binata ni Joab a kāna, “Changori, chapatak ko na a pachirawatan mo a chahwahok mo yaken, ta pinalōbosan no āpo a āri ko iyaw inakdaw no pachirawatan na.”

23 Sinpangan na, nangay si Joab do Gesor, kan insabat na si Absalom do Jerosalem. 24 Ki binata no āryaw a kāna, “Machita somabat do bōkod naw a bahay. Basta dya mapaboya dyaken.” Dawa, nangay si Absalom do bahay na, kan napaboya aba do āri a āmang na.

25 Do intīro a Israel, abaw maidāyaw so kataer a akmas Absalom. Makayapo do tōtok na a mandad rapan naw, ki abaw pakapilāwan na. 26 No kapaygogod na so boboh na, ki maypisa lang do makatawen maynamot do karahmet narana no boboh naw. Kinīlo na, kan no karahmet na, ki nasorok a dadwa a kakīlo sigon do pagkīlwanaw a os-osaren no āri.

27 Myan tatdo a pōtot a mahahakay ni Absalom, kan asa a mabakes. Si Tamar iyaw ngaran na, kan nayparin a taywara so kapintas a mabakes.

28 Minyan so dadwa a katawen do Jerosalem si Absalom a dyi a polos a napaboya do āri a āmang na. 29 Do asa karaw, inpatawag ni Absalom si Joab tan iyaw toboyen na do āryaw, ki chinaskeh ni Joab mangay dya. Dawa, pinirwa narana inpatawag ni Absalom, ki alit na chinaskeh naw mangay ni Joab. 30 Sinpangan na, binata ni Absalom dyirad tobotoboyen na saw a kāna, “Chiban nyo pa. Iyaw hakawanaw ni Joab a machitalin do hakawan kwaw, aryaw naimoha a sebāda. Yangay nyo a sosohan.” Dawa, nangay saw tobotoboyen naw ni Absalom, kan sinosohan daw hakawanaw.

31 Sinpangan na, nangay si Joab do bahay ni Absalom, kan binata na dya a kāna, “Āngo ta sinosohan dan tobotoboyen mo saw hakawan kwaw?”

32 Binata ni Absalom di Joab a kāna, “Chiban mo. Inpatawag kwaw imo, kan binata ko a kon ko, ‘May ka dya tan toboyen koymo do āri a mangyahes a “Āngo ta napasabat ako a yapod Gesor? Maganaganay an myan ako pa daw!” ’ Dawa, changori, imo mangibabaet dyaken tan makapagparang ako di āri. As an myan gatos ko, mabaywan akwaba a iyaw mangdiman dyaken.”

33 Dawa, nangay si Joab do āryaw, kan inbahey na tabo nya. Sinpangan na, inpatawag no āryaw si Absalom. Do nakangay naw, nagrōkob do tana do salapenaw no āryaw, kan dinadek no āryaw si Absalom.