1 Sichangori a kakakteh, an maynamot do kangay ni Āpo ta a si Jeso-Kristo kan iyaw kapaychipeh taw a somarang dya,* 2:1 1 Tes. 4:17 ki myan chakey namen a akdakdawen dyinyo. 2 Dyi kamo pakono a mabakel kan mariribokan do nadngey nyo a padto mana dāmag a nakabata sya a nakahabas danaw no arawaw a kapaybidi ni Jesos a Āpo ta. Anohdan nyo saba, aran ibahey da a iyaw nyaya a dāmag, ki yapo dyamen mana myan intolas namen dyira. 3 On, ipalōbos nyo abaw aran sino a mangallīlaw dyinyo, ta mangay abanchiw nawri a araw, malaksid an maparin sanchiw dadwa saya a pangilasīnan. No asa, ki myan anchiw araw a kapachikontra kan kapachiribīldi no tawotawo do Dyos. As no somarono, ki myan anchiw mangkontraw so linteg no Dyos a nairanta dana a mangay do impyirno. 4 Ki no parinen nanchi, ki kontraen nanchiw tabo a pagdaydayāwan dan tawotawo mana aran āngo a pinatnek no tawotawo a dyos da. Tan komwan, ki patneken nanchiw mismo a inawan na a katotohosan. As do dawrinchi, ki somdep anchi a maydisna do timplowaw no Dyos, as kaibahey na sya iya danaw dyos da.

5 Kakakteh, manakem nyo abawriw a do kayan ko paw dyinyo, ki inbahey ko na dyinyo tabo nyaya a maparin anchi? 6 On, chapatak nyo a myan sichangoriw ombalabalat mana ombayo so nyaya a mangkontra so linteg no Dyos tan dya magparang do sakbayaw no naikeddengaw a araw mana chimpo na. 7 Syimpri, aran sichangori, ki ari dana maytaytarabāko so malimed iyaw kabōsoraya no Dyos. Ki akmas binata kwaya, myan paw ombayowaya sya. Ta maparin aba mohtot iyaw nya mangkontra so linteg no Dyos mandanchan mapakaro nawri a mangbalabalat sya. 8 Ki anchan napakaro nawri, ki dawrinchi a magparang iyaw no mangkontraw so linteg no Dyos. Sinpangan na, anchan mangay si Āpo Jesos kontodo iyaw makaskasdāawaw kan kararanyaganaw a glorya na, ki tod nanchi a dimanen machikontraw a maynamot do bīlegaw no alop na. On, maynamot do chirin na lang,† 2:8 Pal. 17:14; 19:21; 20:9 ki dimanen naw mangkontraw so linteg no Dyos. 9 Ki sakbay a maābak nyaya a mangkontra, ki maparin nanchi a ipaboyaw arwaw a matatarek a pakaboyan kan makaskasdāawaw a milagro a pangallīlaw na so tawotawo. On, parinen na saw nyaya a milagro a maynamot ta myan dyaw panakabalin Satanas. 10 On, osaren nanchiw aran āngo a marahet a pangallīlaw so tawotawo a maypaypasngen do pakarārayawan da a abos pandan a pakadosāan. On, madōsa sanchi a maynamot ta chinaskeh da iyaw oyod a maynamot di Jesos a kaisalakānan da. 11 Dawa, inpalōbos danan Āpo Dyos a mangay dyiraw nya mayit a kaallīlaw tan manganohed sa so bayataw. 12 Tan komwan, ki sira tabo, ki maokom sanchi a madōsa a maynamot ta nanganohed saba do oyod, basbāli a nawriw chinasoyosoyot daw gatos.

13 Ki inyo a kakakteh a chadaw no Dyos, masisītaw kapirmi namen a magyamyāman do Dyos maynamot dyinyo. Ta yapo do kasiknan pan araw, ki pinidi narana inyo no Dyos tan maisalākan kamo a maynamot do kapanganohed nyo do oyod. On, maisalākan kamo a maynamot do panakabalin no Masantwanaya a Ispirito a makapayparin dyinyo a masantwan do salapen no Dyos. 14 On, ta maynamot do Maganayaya Dāmag a innanawo namen dyinyo, ki tinawagan naynyo ni Āpo Dyos a machirapa do maidaydāyawaw a glorya ni Jeso-Kristo a Āpo ta. 15 Dawa, maynamot do dya, kakakteh, ki maytēnek kamo a dya madyiwadyiway do kapanganohed nyo, as nāw nyo a igpet oyod a iyaw innanawo namenaw dyinyo do nakaikasaba namenaw sya kan nakaitolas namenaw sya dyinyo.

16-17 Si Āpo Jeso-Kristo pakono kan si Āmang ta a Dyos mangahwahok kan mangpayit so kapangtokto nyo do tabo a maganay a kapaytarabāko kan kapaychirin nyo. On, maparin pakono nyaya a maynamot ta inpaboya ni Āpo Dyos adaw na dyaten, as kan maynamot do rakoh a kāsi na, ki intoroh na dyaten abos pandan a kapangahwahok kan kapapatgan a namnāma ta.