1 Myan nangipadāmag di Joab a kāna, “Myanaw a tanyisan kan dong-awan no āryaw si Absalom.” 2 Dawa, iyaw kapagragragsak no tābo a bōyot do kapangābak da, ki naybadiw a kapagdongdong-aw da, ta do dāwri a araw, nadngey daw nyaya a “Myan a magdong-aw iyaw āryaw para do pōtot naw.” 3 Nakasalamed saw soldādo saw a naybidi do syodadaw do dāwri a araw a akma saw masnek do nakapayyayo da do paggogobatan. 4 Inolib no āryaw rōpa naw so kakamay na, as nakatanyis na so malyak a kāna, “O anak ko Absalom! O Absalom a anak ko, anak ko!”

5 Sinpangan na, nangay si Joab do bahay ni āri, kan binata na a kāna, “Changori, ki inasnesnekan mwaya tabo mahahakay a pachirawatan mo do kaisalākan da so byay mo kan siraw byay da no pōtot mo a mahahakay kan mababakes, no byay da no baket mo saw kan minabakes mo saw. 6 Chadaw mo saw mangipsokaw dyimo, kan ipsok mo saw madawaw dyimo. Malawag a inpaboya mos changori a siraw komander saw kan siraw tawo da saw a mahahakay, ki bāli abo sa dyimo. Maboya ko a ad-adda chahwahok mo an nabyay si Absalom, kan tabo kami, ki nadiman. 7 Changori, mohbot ka kan yay mo sa ahwahoken saw mahahakay saw a tawo mo a pachirawatan mo. Isapata ko di ĀPO a an dyi ka mohbot daw, abanchiw aran asa a mahakay a matokos dyimo sichahep. Iyanchiw nyayaw kapapalālwan a didigra do tabo a didigra a nangay dyimo a makayapo do kapagbarīto mo paw.”

8 Dawa, naytēnek āryaw, kan naydisna do disnan naw do rowanganaw. Do nakaibahey daw sya dyirad tawotawo saw so nya: “Myan a maydisna iyaw āryaw do rowanganaw,” nakpeh sa tabo tawotawowaw do salapen naw.

9 Do tabo trībo no Israel, ki nagsosopyat tabo tawotawo saw, kan inbahey da a kon da, “Insalākan na yaten no āryaya do toray dan kabōsor ta saya. Iyaw nangisalākan dyaten dyirad toray dan Pilisteo saw. Ki sichangori, nayyayo a komnaro do logar taya a maynamot di Absalom. 10 Ki si Absalom a iyaw pinidi ta a magāri dyaten, ki nadimanaya do paggogobatan. Āngo ta abo payaw plāno ta a mapabidi so āryaw?”

11 Inpaw-it ni Āri Dabid nya minsāhi da Sadok kan Abyatar a papādi a kāna, “Yahes nyo pa dyirad panglakayenaw no Joda a kon nyo, ‘Āngo ta inyo a nanawdyi a mapasabat so āri? Ta no naibahebahey do intīro a Israel, ki naipadāmag dana do āryaw. 12 Inyo, ki kaliposan ko, kaasi-asi ko kan karayaraya ko. Āngo ta inyo manawdyi a mapabidi so āryaw? Imbes a inyo manma!’ 13 As ibahey nyo met di Amasa a kon nyo, ‘Imo abawriw asi kan raya ko? Dosāen na pakono yaken no Dyos so taywara an dya imo payparinen ko a komander no bōyot ko a katādi ni Joab.’ ”

14 Nahwahok ni Dabid pōso dan tabo tawotawo no Joda, kan akma dana saw nāsa do kapangtokto da. Sinpangan na, inpaibahey da do āryaw a kon da, “Maybidi ka kan tabo saw mahahakayaw a pachirawatan mo.” 15 Dawa, inrogi no āryaw naybidi, kan nakarapit do Oksong a Jordan.

As siraw tawotawo saw no Joda, ki nangay sa do Gilgal do bīt no oksong Jordan a nachibayat do āryaw, kan sinpangan na, namtang sa tabo a naybidi. 16 Si Simey a pōtot ni Gera a Benhaminita a yapo do Bahorim, ki ingodes naw minosok a nachirayay dyirad mahahakay saw no Joda a machibayat di Āri Dabid. 17 Myan di Simey asa rībo a Benhaminita. Myan pa dyira si Siba a iyaw pachirawatan no pamilya ni Saulo, kontodo iyaw no asa poho kan dadima saw a pōtot na mahahakay kan dadwa poho a adipen na. Nakalyalisto sa nangay do Jordan, do yanan naw no āryaw. 18 Namtang sa do pamtanganaw do oksongaw tan sidongan daw kapamilyaanaw no āri a maysopo, kan tan parinen daw aran āngo a chakey na a ibahey dyira.

Do nakapamtang naw ni Simey a pōtot ni Gera do Jordan, nagrōkob do salapenaw no āryaw, 19 kan binata na dya a kāna, “Mo āpo a āri ko, dyi mo pakono yaken a ibidang a nakagatos. Dyi mo na pakono a naknakmen iyaw no madi a naparin ko, yaken a pachirawatan mo a āri ko, do arawaw a nakakaro mo do Jerosalem.* 19:19 2 Sam. 16:5-13 Sapay pakono ta mapakaro danad aktokto no āri. 20 Ta chapatak ko a yaken a pachirawatan mo, ki naygatos ako. Dawa, mangay ako sicharaw a iyaw manōma do tabo a yapo do trībo ni Jose tan mosok a machibayat dyimo mo āpo a āri ko.”

21 Do dāwri, binata ni Abisay a anak ni Seroyas a kāna, “Machita abawri a ipadiman si Simey do dyaya a pinarin na? Inabay na iyaw pinidi naw ni ĀPO.”

22 Ki initbay ni Dabid a kāna, “Āngo bibyang ko dyinyo, inyo a anak ni Seroyas a mayparin a akmay kabōsor ko sicharaw? Taywaran myan maipadiman sicharaw do Israel? Chapatak kwabawri a yaken iyaw no āri no Israel changori?” 23 Dawa, binata no āryaw di Simey a kāna, “Ipadiman kwaba imo.” Nyaw insapata no āryaw dya.

24 Si Mepiboset a apoko ni Saulo, ki minosok met a nachibayat do āryaw. Ari na pa a dya nalablaban iyaw kokod naw, mana ari pad nakapangiminyin, mana ari pad nabasan so laylay nakayapo pad nakakaro naw no āryaw mandan nakapaybidi nayan āryaw a abos nakaparoparwan. 25 Do nakawara naw a yapo do Jerosalem a machibayat do āryaw, inyahes no āryaw dya a kāna, “Āngo ta dyi ka nachangay dyaken, mo Mepiboset?”

26 Binata ni Mepiboset a kāna, “Mo āpo a āri ko, inallīlaw naw yaken no pachirawatan kwaw! Inbahey kwaw dya a kon ko, ‘Pasangaan mo paw asno kwaw tan makasakay ako a machangay di āri.’ Ta yaken a pachirwatan mo, ki piday ako. 27 Pinaraherahet na yaken a pachirawatan mo do āpo a āri ko. Ki iyaw āpo a āri ko, ki akmaw anghil no Dyos. Dawa, parinen mo an āngo iktokto mo a maganay. 28 Tābo kapamilyaan ni āpong ko, ki maikari a maipadiman no āpo a āri ko, ki intoroh mo do pachirawatan mo iyaw logar dyirad machichakan saw do lamisaan mo. Dawa, āngo karbengan ko a mangay kan mangdaw do āri?”

29 Binata no āryaw dya a kāna, “Ngay, omhes ka na maychirin. Nadisisyon ko na a imo kan si Siba, ki paycharwan nyo naw tanaw ni Saulo.”

30 Binata ni Mepiboset do āryaw a kāna, “Palobōsan mo iya a ahapen narana tābo. Manawob dana dyaken nakapaybidi mwaya a abo so nakaparoparwan.”

31 Si Barsillay a Gileadita, ki minosok pa a yapo do Rogelim tan rārayayan naw āryaw a mamtang do Jordan, kan pinatodah na do nakasabat naw. 32 Si Barsillay, ki oltimo danaw kamalkem na, ta wawaho dana poho a katawen. Pinabahonan naw āryaw so kanen na do nakayan naw do Mahanaim, ta oltimos kabaknang. 33 Binata no āryaw di Barsillay a kāna, “Machipamtang ka dyaken, kan nāw mo dyaken do Jerosalem, kan yaken makatoneng dyimo.”

34 Ki tinbay ni Barsillay iyaw āryaw a kāna, “Papira pa a katawen iyaw no kabyay ko tan machangay ako pa do āri a somonget pa do Jerosalem? 35 Wawaho a poho danayaw tawen kos changori. Maparin kori a paytarken no makaay-āyo kan engga? Matahaman koriw kanen kan inomen ko? Madngey ko pawriw tīmek no mahahakay kan mababakes a magkankanta? Āngo paw pachirohno no pachirawatan mwaya a dadagsen no āpo a āri ko? 36 Iyaw no pachirawatan mwaya, ki machangay do āryaya so dēkey do kapamtang naya do Jordan. Āngo paw panggon-gona na dyaken no āryaya so komwan? 37 Palobōsan mo pa yaken a pachirawatan mo a maybidi tan madiman ako do bōkod ko a īdi a masngen do aschip a tanem no āmang kan ānang ko. Ki chayaw pachirawatan mwaya a si Kimham.† 19:37 Si Kimham, ki pōtot ni Barsillay. Palobōsan mo pakono a machipamtang dyimo a āpo a āri ko. Parinen mo dya iyaw aran āngo a iktokto monchi a maganay dyimo.”

38 Binata no āryaw a kāna, “Sigi, si Kimham danaw machipamtang dyaken, kan parinen konchi dyaw aran āngo a makahwahok dyimo. Tabo a chakey mo dyaken, ki parinen konchi dya a para dyimo.”

39 Sinpangan na, tabo no tawotawo saw, ki namtang sa do Jordan, kan aran iyaw no āryaw. Dinadek kan binindisyonan no āryaw si Barsillay, as somnabat dana si Barsillay.

40 Do nakapakabtang danaw no āryaw a nangay do Gilgal, nachipamtang dya si Kimham. Tabo bōyot saw no Joda kan kagodwa no bōyot no Israel, ki nachipamtang sa do āryaw.

41 Sinpangan na, tabo mahahakay saw no Israel, ki nachangay sa do āryaw, kan binata da dya a kon da, “Āngo ta siraw kaliposan namen saya a mahahakay no Joda, ki sililimed sa a nachipamtang do āryaya kan kapamilyaan na do Jordan kontodo tabo bōyot na tan maybidi sa do Jerosalem?”

42 Tinbay da tabo no mahahakayaw no Joda siraw mahahakay saw no Israel a kon da, “Pinarin namen komwan, ata masngen a kaliposan namen iyaw no āryaw. Āngo pakasoli nyowaya do dyaya? Komninan kamyori so aran āngo a binayādan no āryaya? Nakarawat kamyori so aran āngo a rigālo a yapo dya?”

43 Tinbay no mahahakay saw no Israel siraw mahahakay saw no Joda a kon da, “Myan iyaw asa poho‡ 19:43 Myan asa poho a trībo no Israel. As no Joda, ki maychatanyi a trībo. a bīngay namen do āryaw. Dawa, rakorakoh iyaw karbengan namen di Dabid kan inyo. Āngo ta idadanes nyo yamen? Yamen abawriw nanōmaw a nangibahey a paybidyen taw āryaw?”

Ki marangranggas pa saw chirin dan mahahakay saw no Joda kan chirin saw no mahahakay saw no Israel.