1 Binata ni Samwel dyirad tabo Israelita saw a kāna, “Inadngey ko tabo inbahey nyo, kan pinatnek ko āri a mangitoray dyinyo. 2 Sichangori, myan dana iyaw āri nyo a mangidaōlo dyinyo. Malkem ako na kan may-oban ako naya. Siraw pōtot ko, ki machiyan saya dyinyo. Nangidaōlo ako dyinyo makayapo do kaadekey ko manda sichangori. 3 Cha ko dya. Sigi, magtistīgo kamo a kontra dyaken do salapen ni ĀPO kan no āryaya a pinidi na. Sino akin dyira so tōro a bāka mana asno a ināgaw ko? Sino kinōsit ko? Sino indadanes ko? Sino nangrawatan kos pasoksok tan akma ko nabolsekan? On, tistīgwan nyo a kontra dyaken an myan pinarin ko dyirad dyaya aran āngo, ta pabidyen konchi dyinyo.”

4 Initbay dan tawotawowaw a kon da, “Kinōsit mana indadanes mwaba met yamen. Aba met inhap mo a pasoksok yapo do aran asa.”

5 Binata ni Samwel dyira a kāna, “Si ĀPO kan iyaw pinidi naw sicharaw, ki siraw mangipaneknek dyinyo a abaw madongso nyo a pinariparin ko a madi.”

Initbay da a kon da, “On, si ĀPO, ki iyaw mangpaneknek.”

6 Binata pa ni Samwel dyirad tawotawowaw a kāna, “Si ĀPO, iyaw nangitongdo di Moyses kan Aaron, kan iyaw nangikaro siras kapoonan nyo a yapo do Egipto. 7 Changori, nāw nyo a maytēnek do yanan nyo saya, kan tistīgwan ko inyo do salapen ni ĀPO do kaipanakem ko dyinyo so tabo mabibīleg saw a pinariparin na tan naisalākan kamo kan siraw aāmang nyo.

8 “Do nakangay daw da Jakob kan siraw pōtot na saw do Egipto, intanyitanyis daw kapangdaw da so sidong di ĀPO. Tinoboy na sa Moyses kan Aaron a nangihbot siras aāmang nyo do Egipto kan inyangay da sa do dya tana.

9 “Ki kinawayakan daw no ĀPO a Dyos da. Dawa, inparawat na sa do tanoro ni Sisera a komander no bōyot ni Jabin a āri no syodad a Hasor kan do tanoro dan Pilisteo saw kan do tanoro no āri do Moab. Nachigobat sa a kontra dyira kan sinākop da sa. 10 Do dāwri, tomnanyitanyis sa di ĀPO, kan binata da a kon da, ‘Naygatos kami kan tinadyichokodan namen imom ĀPO, kan nagsīrbi kami di Baal kan Astarot. Ki changori, isalākan mo pa yamen dyirad kabōsor namen, kan magsīrbi kami na lang dyimo.’ 11 As tinoboy ni ĀPO si Jerobbaal kan Barak, kan Jepta, as kan yaken a si Samwel, kan insalākan naynyo do toray dan kabōsor nyo do omdibon nyo tan naybibyay kamo a sitatalna.

12 “Ki do nakaboya nyowaw si Nahas a āri dan Ammonita saw a naypasngen a mangraot dyinyo, binata nyo dyaken a kon nyo, ‘Chakey namen āri a magāri dyamen,’ aran si ĀPO a Dyos nyo, ki sīgod a āri nyo. 13 Changori, cha dyaw āri a pinidi nyo, iyaw inyahes nyo, kan iyaw pinatnek ni ĀPO a magāri dyinyo. 14 An myan kaanyib nyo di ĀPO, an magsīrbi kamo dya kan mangadngey so chirin na a dya machiribīldi dyirad bilbilin na, as kan an monot kamo kan iyaw no āri a magāri dyinyo di ĀPO a Dyos nyo, dyorinchi a maganay! 15 Ki an dyi nyo a adngeyen si ĀPO, kan magribīldi kamo dyirad bilbilin na, kontraen nanchi inyo kan iyaw āri nyo.

16 “Dawa, changori, nāw kamo a maytēnek kan chiban nyo ītwaw a mabīleg a parinen ni ĀPO do salapen nyo! 17 Changori abawriw kapagāpit so trīgo? Tawagan ko si ĀPO tan mangyangay so adey kan chimoy. Tan komwan, mapatakan nyo iyaw karahet a pinarin nyo do kapanyideb ni ĀPO do kapangdaw nyowaya so āri.”

18 Dawa, tinawagan ni Samwel si ĀPO, kan pinayedey kan pinachimoy ni ĀPO do dāwri a araw. As siraw tabo a tawotawo, ki taywaraw nakamo da di ĀPO kan di Samwel.

19 Binata dan tabo tawotawowaw di Samwel a kon da, “Maydasal ka pa di ĀPO a Dyos mo a para dyamen a pachirawatan mo tan dyi kami a madiman, ta innāyon namenaya do gatos namen iyaw kapanahes namenaw so āri namen.”

20 Initbay ni Samwel dyira a kāna, “Mamo kamo aba. Oyod a pinarin nyo nya karahet. Aran komwan, basta dyi nyo pakono a tadyichokodan si ĀPO. Basbāli a pagsīrbyan nyo si ĀPO do tābo pōso nyo. 21 Somiwal kamo aba a magdaydāyaw dyirad abos sinpaspangan a didyosen. Makasidong kan makaisalākan saba dyinyo, ta abaw sīrbi da. 22 Maynamot do mabīleg a ngaran na, nonolay naba ni ĀPO tawotawo na, ta chaay-āyo ni ĀPO iyaw kaibidang na dyinyo a tawotawo na. 23 An maynamot dyaken, mateng dyaken kapaygatos di ĀPO do kapagsardeng ko a mangidasal dyinyo. Nanawhen koynyo sigon do maganay kan kosto a kabibyay nyo. 24 Ki basta anyiben nyo si ĀPO, kan pagsīrbyan nyo a sipopodno do tābo no pōso nyo. Kanakmen nyo saw mabīleg saw a pinarin na dyinyo. 25 Ki an tongtongen nyo maygatos, inyo kan iyaw āri nyo, ki maponas kamo a tabo.”