1 Do dāwri, nanghap si Samwel so asa kapraskitaw a lana, kan pinado na do oho naw ni Saulo, as nakadadek na sya. Binata na a kāna, “Pinidi naymo ni ĀPO a mangipangōlo siras tawotawo na a Israel! Magāri kanchi dyirad tawotawo na, kan isalākan mo sanchi dyirad kabōsor da saw a nakadibon dyira. Iyanchiw nyaw pangilasīnan mo a pinidi naymo ni ĀPO a mangitoray so tawotawo na: 2 Do kakaro mwaya dyaken sichangori, makabayat kanchi so dadwa mahahakay do masngenaw do tanem ni Rakel do Selsah do payis naw no tana dan Benhamin. Ibahey danchi dyimo a kon da, ‘Nachichwasan darana saw asno saw a chichichwasen mo. Sira pabaw pakariribokan ni āmang mo, kan imo danaw chabakel na. Yahahes naw a kāna, “Āngo paro parinen ko a maynamot do anak kwaw?” ’

3 “Katongtong monchi so mayam mandan marapit mo rakohaw a kayo no Tabor. Makabayat kanchi daw so tatdo a mahahakay a somonget a mangay a mangidāton do Dyos do Betel. Asa dyiraw mayrara so tatdo a orbon a kalding. Iyaw asaw, ki tatdo a kamemeh a tināpay. As iyaw asaw, ki manahabit so lālat a sopot a napno so palek. 4 Komostaen danchimo, as kapanoroh da so dadwa kamemeh a tināpay a machita rawaten mo.

5 “Katayoka no nawri, mangay kanchi do paytokonan naw no Dyos do Gibea a yanan da no matokpohaw a bonggoy a soldādo dan Pilisteo saw. Do kapakasdep monchi do idyaw, makabayat kanchi so bonggoy no propīta a mosok a yapo do logaraw a pagdaydayāwan a magtoktokar so arpa, tamborin, pīto, lyra,* 10:5 Iyaw lyra, ki dekedekey kan iyaw arpa. kan mangipadpadto sa. 6 Iyaw panakabalin no ispirito ni ĀPO, ki mangay anchi dyimo, kan machipangipadto kanchi dyira, as kan mabaliwan dananchiw katatawo mo. 7 Do katongpal no nya saya pangilasīnan, parinen mo an āngo masisīta a parinen mo, ta no Dyos, ki myan dyimo.

8 “Manma ka na mosok do Gilgal. Sigorādo a mangay akonchi dyimo daw a mangidāton so masosohan saw a dāton kan dāton saw a pachikapya. Ki machita a panayahen mo yaken do irahem no papito a karaw a manda do kawara ko, kan ibahey konchi dyimo an āngo parinen mo.”

9 Do nakapakatadyichokodaw ni Saulo a komaro di Samwel, binalīwan no Dyos katatawo ni Saulo. Tabo saw pangilasīnan saw, ki naparin do dāwri a araw. 10 Do nakapakarapit daw da Saulo kan pachirawatan naw do Gibea, nachibayat dyaw bonggoy no propīta. Do dāwri, nangay dyaw panakabalin no ispirito no Dyos, kan nachirayay a nachipangipadpadto dyira. 11 Do nakaboya daw sya no tabo sīgod saw a makaam-āmmo sya a machipangipadpadto si Saulo dyirad propīta saw, inyahes da do katakatayisa dyira a kon da, “Na, āngo paro naparin do pōtot naya ni Kis? Asa danawri a propīta si Saulo?”

12 Inyahes no asaw a mahakay a magyan do dawri a logar a kāna, “Masisītawri an sino āmang dan kadwan a propīta an si ĀPO pakayapwan kapagpadto da?” Dawa, nayparin a panyinyirin daw nyaya: “Asa pawri dyirad propīta si Saulo?” 13 Do nakatayokaw no kapachipangipadpadto ni Saulo, somnonget do logaraw a pagdaydayāwan.

14 Naboya na sa no marāan naw ni Saulo, kan inyahes na di Saulo kan iyaw pachirawatan naw a kāna, “Dino nakayakayapwan nyo?”

Tominbay si Saulo a kāna, “Na, chinichwas namen asno saw. Ki do dyi namen danaw a nakaboya sira, nangay kami na do yanan ni Samwel.”

15 Binata no marāan naw a kāna, “Na, ibahey mo pa dyaken āngo binata ni Samwel dyimo?”

16 Initbay ni Saulo a kāna, “Na, inpasigorādo naw dyamen a nachichwasan dana saw asnwaw.” Ki inbahey naba di marāan na iyaw inbahey naw ni Samwel a maynamot do kapayparin naw a āri.

17 Do dāwri, tinawagan na sa ni Samwel tawotawo saw no Israel a mangay do yanan ni ĀPO do Mispa, 18 kan inbahey na dyira a kāna, “Nyaw bata ni ĀPO a iyaw Dyos no Israel: ‘Pinahbot koynyo do Egipto, kan insalākan koynyo do toray dan taga Egipto saw kan tabo pagāryan saw a nangidadanes dyinyo.’ 19 Ki sichangori, chinaskeh nyo Dyos nyo a nangisalākan dyinyo do tabo didigra kan pakariribokan nyo. As nakaibahey nyo sya a kon nyo, ‘Engga, mangitongdo ka so āri a mangitoray dyamen.’ Dawa, sichangori, mapaboya kamo do salapen ni ĀPO do kāda trībo kan kāda partīdos nyo.”

20 Do dāwri, pinaypasngen ni Samwel tabo no trībo saw no Israel, kan iyaw trībo naw no Benhamin napidi. 21 Somarono, inyangay na saw kāda pamilya do trībo no Benhamin do salapen naw, kan napidi iyaw pamilya ni Matri. Kapanawdyan na, napidi si Saulo a pōtot ni Kis. Ki do kachichwas daw sya, aba daw si Saulo. 22 Dawa, inyahes darana di ĀPO a kon da, “Ari danawri dyaw nawri a tawo?”

Tominbay si ĀPO a kāna, “Naon, ari a tomayotayo do yanan daya no warawara.”

23 Nayyayo sa kan nangay da a pinahtot si Saulo. Do nakapaytēnek naw do yanan daw no tawotawo, asa a kaoho no kakarakarang na kan aran sino. 24 Binata ni Samwel dyirad tabo tawotawo a kāna, “Maboya nyoriw tawowaya a pinidi ni ĀPO? Abaw aran asa kapariho na do tabo tawotawo.”

Do dāwri, nangngēngengey saw tawotawowaw a kon da, “Manayon pakono byay no āri!”

25 As inlawlawag ni Samwel dyirad tawotawo saw pagrebbengan saw no āri. Intolas na sa do mahonaw a papil, kan kinapya na do salapen ni ĀPO. Katayoka na, pinayam narana saw tawotawo saw a somabat do bahabahay da.

26 Aran si Saulo, ki somnabat do bahay da do Gibea a kayrayay na saw matotored saw a mahahakay a sinalid ni ĀPO so pōso. 27 Ki myan saw kadwan a mangriribok a mahahakay a nakabata sya a kon da, “Pī! Maypāngo kaisalākan dyaten nawri a tawo?” Indadanes da, kan inyangayan daba so rigālo da. Ki naylilyak aba si Saulo.