1 Do nakapaypalakay danaw ni Samwel, tinodingan na saw pōtot na saw a hwis no Israel. 2 No ngaran no matoneng na, ki si Joel. Iyaw somarono, ki si Abihas. Naghwis sa do Beerseba. 3 Ki inonotan daba no pōtot na saw iyaw kaparinaw ni āmang da. Basbāli a nangwarta sa a nangrawat so pasoksok, kan dyinīdo daw kinalinteg.

4 As dawa, naychichipeh saw panglakayen da saw no Israel, kan nangay sa di Samwel do Rama. 5 Binata da dya a kon da, “Chiban mo pa. Malkem ka naya, kan tinōlad dabaya imo no pōtot mo saya do kaparin mo. Dawa, sichangori, mangitongdo ka so āri a mangipangōlo dyamen a akmas myan saya dyirad tabwaya kadwan a nasyon.”

6 Ki naay-āyo aba si Samwel do nakaibahey daw sya a torohan na sa so āri a mangipangōlo dyira. Dawa, naydasal di ĀPO. 7 Tinbay ni ĀPO a kāna, “Adngeyen mo tabo ibahebahey daya no tawotawo dyimo, ta imo abaw chinaskeh da, an dya yaken chinaskeh da a āri da. 8 Akmas pinarin daw do nakaihbot kwaw sira do Egipto manda sichangori, tinadyichokodan da yaken, kan nagdaydāyaw sa so matatarek a dyos. Dawa, komwan met parinen daya dyimo sichangori. 9 Sigi, adngeyen mo sa, ki kapyahen mo sa ballaāgan ah, kan ipakatoneng mo dyira iyaw parinen anchi no āri a magāri dyira.”

10 Dawa, inbahey ni Samwel tabo inbaheyaw ni ĀPO dyirad tawotawowaw a mangdakdaw so āri. 11 Binata na a kāna, “Iyanchiw nyaw parinen no āri a magāri dyinyo: Ahapen nanchiw anak nyo sa mahahakay, kan payparinen na sa magsīrbi do logan na saw kan kabalyo na saw a pachigobat, kan payparinen na pa sanchi a taga-darop do salapenaw no logan na saw a pachigobat. 12 Kadwan sanchi, ki dotokan na a mangimandar so rinībo a soldādo. As kadwan, ki mangimandar so taydidima a poho. Pagaradohen na sanchiw kadwan, kan pagranyen na sanchi so āpit na. Siraw kadwan, ki pamarinen na sa so armas a pachigobat kan siraw rimīnta saw no logan a pachigobat. 13 Ahapen na sanchiw anak nyo sa a mababakes a pamarinen so bangbanglo, panotongen, kan pamarinen na sa so tināpay. 14 Ahapen nanchi iyaw kagaganayan dyirad hakawan nyo, kaobāsan nyo saw, kan kaolibwan nyo saw, as kan itoroh nanchi dyirad opisyalis na saw. 15 Ahapen nanchiw apagkapollo no trīgo nyo kan ōbas nyo, as kan itoroh nanchi dyirad opisyalis na kan siraw kadwan pa a magsīrbi dya. 16 Siraw pachirawatan nyo a mahahakay kan mababakes, kan iyaw kagaganayan saw a bāka kan asno nyo, ki ahapen na sanchi para do bōkod na a pakaosaran. 17 Ahapen nanchiw apagkapollo no arban nyo, as kan inyo a mismo, ki mayparin a adīpen na. 18 Anchan marapit nawri a araw, itanyis nyonchiw kawayawaya nyo do pinidi nyo a āri, ki atbayen na pabanchi inyo ni ĀPO.”

19 Ki inkaskāso daban tawotawo saw si Samwel. Binata da a kon da, “Engga! Chakey namen myan so āri a magāri dyamen. 20 Tan komwan, akma kaminchi siras kadwan saya a nasyon a myan so āri a mangitoray dyamen, as kan mangipangōlo kan machilāban dyirad kagobat namen.”

21 Do nakadngey naw ni Samwel so tabo a binata da no tawotawo saw, yay na a inbahey di ĀPO. 22 Tominbay si ĀPO di Samwel a kāna, “Adngeyen mo sa, kan torohan mo sa so āri da.”

Do dāwri, inbahey ni Samwel dyirad mahahakayaw no Israel a kāna, “Ngay, maybidi kamo na do kāda idi nyo.”