1 Do nakapakaāgaw daw no Pilisteo so lakāsanaw no Dyos, kinatkat da makayapo do Ebeneser a manda do syodad a Asdod, 2 as inyangay daw lakāsanaw no Dyos do timplowaw no dyos da a si Dagon, kan pinatalin da do bīt naw. 3 Do kamabekasan naranaw, nasāpa saw tawotawo do Asdod a naybangon. Ki naboya da a myan dana nasday a naysasakeb do tana iyaw istatwaw a si Dagon do salapenaw no lakāsanaw ni ĀPO. Dawa, pinaybangon da si Dagon do sīgodaw a yanan na. 4 Ki do nakapaybangon daranaw do somarono danaw a araw, myan dana si Dagon a nasday a naysasakeb do tana do salapenaw no lakāsanaw ni ĀPO. Iyaw oho naw kan kakamay na saw, ki napohed kan myan sa do masngenaw do pantaw. Iya danaw inawan naw nabidin. 5 Nawriw paynamotan na a aran sichangori a araw, siraw papādi saw ni Dagon mana aran sino a somdep do timplo naw ni Dagon do Asdod, ki tokapan daba iyaw dapyanaw.

6 Taywaraw nakapangdōsa ni ĀPO dyirad tawotawo saw do Asdod kan siraw myan saw do omdibonaw. Inamomo na sa, kan pinaganyit na sa so kapaychadogdōgol. 7 Do nakaboya daw no omidi saw do Asdod so napariparinaw, binata da a kon da, “Maparin aba ditā no lakāsanaya no Dyos no Israel dyaten, ta dosdosāen naya yaten kan iyaw dyos taya a si Dagon.” 8 Dawa, pinaychichipeh da sa tabo pangpangōlo no Pilisteo saw, kan inyahes da dyira a kon da, “Āngo parinen ta do lakāsanaya no Dyos no Israel?”

Tominbay sa a kon da, “Na, patoyohen nyo na do syodad a Gat.” Dawa, inyangay daw lakāsanaw no Dyos no Israel.

9 Ki do nakapayadis daw sya, dinōsa ni ĀPO so taywaraw tawotawo saw do syodadaw, kan pinaybiybinākel na sa. Pinaganyit na saw tawotawo do syodadaw so kapaychadogdōgol a aran adedekey kan mangalkem. 10 Dawa, pinatoyo daw lakāsanaw no Dyos do Ekron.

Do nakapasdep da paw so lakāsanaw no Dyos do Ekron, nangagagay saw tawotawowaw a kon da, “Oy, pinatoyo da dya iyaw lakāsanaya no Dyos no Israel tan dimanen na yaten kan siraw tawotawo ta!” 11 Dawa, pinaychichipeh da saw pangpangōlo da saw no Pilisteo, kan binata da a kon da, “Patengen nyo dyaw lakāsanaya no Dyos no Israel. Pabidyen nyo na do gagāngayaw a yanan na tan dyi na yaten a dimanen kan siraw tawotawo ta!” Taywaraw nakadōsa no Dyos dyira. Ta iyaw makamwamomo a kadiman, ki nagwaras dana do intīrwaw a syodad. 12 Siraw dyi saw a nadiman, ki pinaganyit na sa so kapaychadogdōgol. As iyaw katanyis daw no tawotawo do syodadaw a mangdaw so sidong do dyos da saw, ki nakarapit do hanyit.