1 Homnabas danaw chimpo, ki myan naparin a kairamānan no kaobāsan ni Nabot a Jesreelita. Iyaw kaobāsanaya, ki myan do Jesreel, as masngen do palasyo naw ni Ahab a āri no Samarya.* 21:1 Myan palasyo ni Ahab do Jesreel (1 Ār. 18:45-46) kan do Samarya a sintro no Israel. No ngaran a Samarya, ki pinakainawan pa no intīro no pagāryan no Israel a ammyānan a pagāryan (1 Ār. 16:24). 2 Binata ni Ahab di Nabot a kāna, “Itoroh mo pa dyaken kaobāsan mwaya tan paymohamohan ko so rakanen, ta masngenaya do palasyo kwaya. Torohan koymo so maganaganay a kaobāsan a tādi na, mana an pipyahen mo, bayādan ko dyimo so kosto a balor na.”

3 Ki inatbay ni Nabot a kāna, “Baywan ni ĀPO a itoroh ko dyimo tāwid ko a yapo dyirad simna aāmang ko.”

4 Insabat ni Ahab kaliday a makasokasoli maynamot do inbahey naw ni Nabot a Jesreelita a kāna, “Itoroh kwaba dyimo tāwid ko a yapo dyirad simna aāmang ko.” Naypoktad do katri naw a maydadamoyong a somalap do dyindyinaw, kan chinaskeh naw komninan.

5 Somindep si Jesebel a baket na do yanan naw, kan inyahes na a kāna, “Āngo ta taywara ka magliliday a maydadamoyong a dya koman?”

6 Inatbay na iya a kāna, “Maynamot ta inbahey ko di Nabot a Jesreelita a kon ko, ‘Ilāko mo dyaken kaobāsan mwaya, mana an pipyahen mo, torohan koymo so matarek a kaobāsan a tādi na.’ Ki binata naw a kāna, ‘Itoroh kwaba dyimo kaobāsan kwaya.’ ”

7 Binata ni Jesebel a baket na a kāna, “Ay samna, komwanoriw kapagāri mo do Israel? Maybangon ka kan koman ka na, as kan pasoyoten mo inawan mo. Ta yaken anchiw manoroh dyimo so kaobāsanaya ni Nabot a Jesreelita.”

8 Dawa, namarin so tolas na sa a inpirma na do ngaran ni Ahab. Sinilyowan na sa, kan inpaw-it na saw tolas saw dyirad panglakayenaw kan siraw mabigbigbigaw a machipagyan do Jesreel a syodad a yanan ni Nabot. 9 As intolas na do tolas saw a kāna, “Paychipehen nyo saw tawotawo a para do kapagayonar, kan paydisnahen nyo si Nabot do madāyaw a disnan do kahatahatangan daw no tawotawo. 10 As mapadisna kamo so dadwa marahet a mahahakay do salapen naw, kan ipatistīgo nyo dyira a inabay naw Dyos kan no āri. As kaihtot nyo sya a oboren tan madiman.”

11 Dawa, siraw panglakayen saw kan mabigbigbig saw a machipagyan do syodadaw a yanan ni Nabot, ki pinarin daw akmas intolas naw dyira ni Jesebel do tolas naw. 12 Pinaychipeh da saw tawotawo a para do kapagayonar, kan pinadisna da si Nabot do madāyaw a disnan do kahatahatangan daw no tawotawo. 13 Do dāwri, nangay sa naydisnaw dadwaw a marahet a mahahakay do salapen naw, kan inyangay daw pamagatos daw a kontra di Nabot do salapen daw no tawotawo a kon da, “Inabay ni Nabot Dyos as kan no āri.” Dawa, inihtot da do gaganaw no syodad, kan inobor da a mandad nakadiman na. 14 Sinpangan na, nangipaiyangay sa so dāmag di Jesebel a kon da, “Naobor dana si Nabot, kan nadiman dana.”

15 Apāman a nadngey ni Jesebel a naobor kan nadiman dana si Nabot, binata na di Ahab a kāna, “Maytēnek ka na, kan yangay mo na ahapen kaobāsanaw ni Nabot a Jesreelita a naskeh a nangilāko dyimo. Mabyay paba, ta nadiman dana.” 16 Do nakadngey naw ni Ahab a nadiman dana si Nabot, naytēnek kan minosok a nangay do kaobāsanaw ni Nabot tan madyira na.

17 Sinpangan na, inpakatoneng ni ĀPO chirin naw di Elyas a Tisbita a kāna, 18 “Maytēnek ka, kan mosok ka a machibayat di Ahab a āri no Israel a magtoray do Samarya. Ari sichangori do kaobāsanaw ni Nabot a nangayan na tan madyira na. 19 Ibahey monchi dya a kon mo, ‘Nyaw bata ni ĀPO: Nangdiman ka so tawo, as kan inahap mo paw dyira naw. Oyod abawri?’ Ibahey mo pa dya a kon mo, ‘Nyaw bata pa ni ĀPO: Do logaraw a nanapotaposan dan chito so raya ni Nabot, dawrinchiw panaposan dan chito so mismo a raya mo!’ ”

20 Do nakawaraw ni Elyas, binata ni Ahab dya a kāna, “Na, nadoktalan mori yaken, imo a kabōsor ko?”

Inatbay na a kāna, “On, nadoktalan koymo, ta inlāko mo inawan mo a mamarin so marahet do kapanyideb ni ĀPO. 21 Dawa, bata ni ĀPO dyimo a kāna, ‘Yangay konchi dyimo didigra. Opasen konchi imo, kan abohen ko sanchi a yapo di Ahab kāda mahakay a aran adīpen mana siwayawaya do Israel. 22 Payparinen ko sanchiw kapotōtan mo akmas kapamilya ni Jeroboam a pōtot ni Nebat, kan akmas kapamilya ni Baasa a pōtot ni Ahiha,† 21:22 1 Ār. 15:27-30, 16:11-12 ta pinasoli mo yaken, kan pinawnot mo saw tawotawo a Israel a naygatos.’

23 “As maynamot di Jesebel, nyaw binata ni ĀPO a kāna, ‘Kanen danchi no chito bangkay ni Jesebel do masngenaw do ahad no syodad a Jesreel.’ 24 Siraw kaliposan ni Ahab a madiman do irahem no syodad, ki kanen da sanchi no chito saya. As aran sino dyira a madiman a machibawa do syodad, ki kanen da sanchi no manomanok saya.”

25 (Aba polos tawo a akma di Ahab a nangilāko so inawan na do kapamarin na so marahet do kapanyideb ni ĀPO a pinaklaklal ni Jesebel a baket na. 26 Makabābabaw pinarin na do nakalākat na siras didyosen sa a akma siras Amoreo saw a pinaksyat ni ĀPO do salapen dan tawotawo a Israel.)

27 Do nakadngey naw ni Ahab siras nyaya chirin, pinirit naw kagay naw, as nakapaylaylay na so makersang kan nagayonar. Aran do kapakaycheh naw, silalaylay so makersang, kan minidibidi a sililiday.

28 Sinpangan na, inpakatoneng ni ĀPO chirin naw di Elyas a Tisbita a kāna, 29 “Nadlaw mo abawri an maypāngo nakapagpakombaba ni Ahab so inawan na do kapanyideb ko? Maynamot ta inpakombaba naw inawan na do salapen ko, iyangay ko abanchiw nyaya didigra do ōnos no kabyay na. Ki iyangay konchiw nyaya do chimpwaw no pōtot na a mahakay.”