1 Do dāwri, myan asa propīta a mayngaran so Elyas a Tisbita. As iya, ki yapo do Tisbe do tana a Gilead. Binata na di Āri Ahab a kāna, “Akmas kasibibyay ni ĀPO a Dyos no Israel a pagsirsīrbyan ko, abanchiw polos apon mana chimoy do somarono saya a tawtawen malaksid an ibahey ko.”

2 Sinpangan na, inpakatoneng ni ĀPO chirin naw di Elyas a kāna, 3 “Komaro ka dya, as kapagpadāya mo kan tomayo ka do losok naw no dēkey a oksong a mayngaran so Kerit do dayāen no Oksong a Jordan. 4 Minoynom kanchi do dēkeyaw a oksong, kan binilin ko naw kak saw a mamakan anchi dyimo.”

5 Dawa, tinongpal naw inbaheyaw ni ĀPO dya. Nangay do dēkeyaw a oksong a Kerit do dāyaen no Jordan, kan nagyan daw. 6 Nangyangangay kak saw so tināpay kan karni an mabekas kan mahep, kan minoynom a yapo do dēkeyaw a oksong.

7 Do nakapaypahabas no chimpo, nayachan dēkeyaw a oksong, ta chinimoy na pabaw tana. 8 Sinpangan na, inpakatoneng ni ĀPO chirin naw di Elyas a kāna, 9 “Mangay ka do idi a Sarepat a masngen do syodad a Sidon* 17:9 Sidon, ki nakayapwan ni Jesebel. 1 Ār. 16:31 kan magyan ka daw. Nangbilin ako na so bālo a mabakes a manorotoroh so kanen mo.” 10 Dawa, nangay do Sarepat. Do nakapakarapit naw do rowangan naw no idyaw, myan bālo a mabakes a mamachi. Tinawagan ni Elyas kan binata na dya a kāna, “Panghap mo pa yaken so dēkey a ranom do bāso tan makaywaw ako.” 11 Ki do kangayaw no bālwaw a manghap, tinawagan narana a kāna, “Panghap mo pa yaken so kakchid no tināpay.”

12 Initbay no bālwaw a kāna, “Akmas kasigorādo no kasibibyay ni ĀPO a Dyos mo, apabaw tināpay ko. Moyboh dana a asa kakemkem a arinaw myan do angang kan dēkey a lana do garapon. Mamachi ako so tatdo lang a irotong a panotong ko so kanen ko kan anak kwaw a mahakay tan kanen namen sakbay no kadiman namen.”

13 Binata ni Elyas dya a kāna, “Mamo kaba. Somabat ka na, kan parinen mo bata mwaya. Ki manma panotong mo yaken so dēkey a tināpay a yapo do myanaw dyimo, as kaiyangay mo sya dyaken. Katayoka na, manotong ka so dyira nyo kan anak mwaya. 14 Ta nyaw bata ni ĀPO a Dyos no Israel a kāna, ‘No arina do angangaw, ki mapatawsan aba. Komwan panchiw no lana a myan do garapon, ki mapatawsan aba a mandad arawaw a chimoyen ni ĀPO tanaya.’ ”

15 Komnaro kan pinarin naw inbaheyaw ni Elyas dya. As do dāwri, myan danaw kanen da Elyas kan iyaw bālwaw kan pamilya naw so mahay. 16 Ta iyaw arina do angangaw, ki mapatawos aba. Komwan iyaw lanaw, ki mapatawos aba sigon do chirinaw ni ĀPO a inbahey ni Elyas.

17 Homnabas chimpo, iyaw mahakayaw a anak no mabakesaw a bālo a makin dyira so bahayaw, ki naganyit. Naypaypāngay ganyit naw a nandad nakapagsardeng na a omanges. 18 Binata na di Elyas a kāna, “Aryoriw kaipsok mo dyaken, imo a tawo no Dyos? Nangay kawri dya tan ipanakem mo gatos ko kan dimanen mo anak kwaya?”

19 Inatbay ni Elyas a kāna, “Itoroh mo dyaken anak mwaya mahakay.” Do dāwri, inhap naw adekeyaw do tachayaw ni ānang na, as inyangay na do mamanyitwaw a kwarto a pakaykaychehan na kan pinapoktad nad katri naw. 20 Tomnanyis si Elyas di ĀPO a kāna, “O ĀPO a Dyos ko, āngo ta inyangay mo paw didigra do dyaya a bālo a nachidagosan ko do kadiman mo so anak naya?” 21 Sinpangan na, naysasakban naw adekeyaw so naypitdo,† 17:21 2 Ār. 4:34 kan tomnanyis di ĀPO a kāna, “O ĀPO a Dyos ko, palobōsan mo paw byay no nyaya a adekey a maybidi dya!”

22 Nadngey ni ĀPO dasal naw ni Elyas, kan naybidi iyaw byay naw no adekeyaw, kan nagōngar. 23 Inhap ni Elyas adekeyaw a yapo do mamanyitwaw a kwarto, kan binaba na a inigchin do irahemaw no bahayaw. Intoroh na do ānang naw kan binata na a kāna, “Chiban mo, sibibyay anak mwaya!”

24 Tinbay no bālwaw si Elyas a kāna, “Changori, chapatak ko na a imo, ki tawo no Dyos. As iyaw chirin ni ĀPO a yapo do dangoy mo, ki oyod.”