1 Do kasngen danaw no kadiman ni Āri Dabid, ki pinatawagan na si Solomon, kan inbilin na dya a kāna, 2 “Anak ko, īto danaw kapaybitos no byay ko a akmas tabo tawotawo. Payiten mo kapangtokto mo, kan ipaboya mo a mahakay ka. 3 Parinen mo pagrebbengan a itoroh dyimo ni ĀPO a Dyos mo. Maybibyay ka do chakey na, as kan tongpalen mo saw pangeddeng kan bilbilin na, siraw kapangokom kan kaipaneknek na a akmas naitolas do Linteg ni Moyses tan maparin ka a magballīgi do aran āngo a parinen mo kan do aran dino a kwanan mo. 4 On, parinen mo komwan tan maparin ni ĀPO a tongpalen inkari na a maynamot dyaken do kachwaw a inbahey na a kāna, ‘An nāw dan kapotōtan mo a siaannad do kabibyay da, kan mapodno do salapen ko do tābo a pōso kan pahad da, ki manayon anchiw kapaydisna no kapotōtan mo do trono no Israel.’

5 “Asa pa, chapatak mo naw pinarin na dyaken ni Joab a anak ni Seroyas an maypāngo nakadiman na siras dadwaw a komander no bōyot no Israel a sa Abner a pōtot ni Ner kan Amasa a pōtot ni Jeter.* 2:5 2 Sam. 3:27; 2 Sam. 20:10 Do chimpo no talna, diniman na sa a akmay kabōsor na do paggogobatan. Do nakadiman naw sira, ki namanchaan barīkis naw kan tokap naw so raya da no abos gatos. 6 Parinen mo dyaw sigon do kinasīrib mo, ki basta dyi mwa palobōsan a romapit do kamalkem na a madiman a sitatalna.

7 “Ki ipaboya mo kapodno do pamilya ni Barsillay† 2:7 2 Sam. 17:27-29 a Gileadita, kan palobōsan mo sa a machihanghang dyimo, ta sinidongan da yaken do nakapayyayo kwaw di Absalom a kakteh mo.

8 “As myan pa dyimo si Simey a pōtot ni Gera a Benhaminita a yapo do Bahorin. Inabay naw yaken so taywara do arawaw a nakangay ko do Mahanaim. Do nakawsok naw a nangbayat dyaken do Oksong a Jordan, ki insapata ko dya do ngaran ni ĀPO a dyi ko a dimanen so ispāda.‡ 2:8 2 Sam. 16:5-13, 19:16-23; Eks. 22:28 9 Changori, ki ibidang mo aba iya a abos gatos. Masīrib ka a tawo, kan chapatak mo nanchi an āngo machita mo a parinen tan mayyayawat do raya na a mangay do tanem na do kamalkem na.”

10 Sinpangan na, nachipaynahah si Āri Dabid dyirad aāmang na saw, kan naitābon do syodad na.§ 2:10 No syodad na, ki iyaw kōtaw no Sion do tohos no abagātan a dayāen paytokonan do Jerosalem. Sinākop ni Dabid Jerosalem dyirad Jeboseo a tawotawo. 2 Sam. 5:7 11 Nagāri so apat a poho a katawen do Israel. No papito a katawen, ki do Hebron, kan tatdo poho kan tatdo a katawen do Jerosalem. 12 Dawa, nachitādi si Solomon a naydisna do trono ni āmang na, kan mapinsan nakapatnek no kapagāri na.

13 Sinpangan na, nangay si Adoniha a anak ni Haggit di Batseba a ānang ni Solomon. Inyahes ni Batseba dya a kāna, “Maganayoriw panggep mwaya a mangay dya?”

Ki tominbay si Adoniha a kāna, “Naon, mo ikit! Maganayaw. 14 Aryaw chakey kwa akdawen dyimo an maparin.”

“Na, ibahey mo na,” binata ni Batseba.

15 “Chapatak mo na a dyaken no pagāryan. Tabo no tawotawo no Israel, ki hinahaw da a yaken magāri dyira. Ki naybadiw a nangay do kakteh kwaw pagāryan, ta dyira na a yapo di ĀPO. 16 Changori, asa lang chakey ko a akdawen dyimom ikit. Dyi ka pakono a machiengga dyaken.”

“Na, āngo nawri a akdawen mo?” inyahes ni Batseba.

17 Tinongtong na a kāna, “Imo paw mangay a mangdaw di Āri Solomon, ta makapachiengga aba dyimo. Yahes mo pa a itoroh na dyaken si Abisag a iyaw Sonammitaw a baketen ko.”

18 Initbay ni Batseba a kāna, “Naon ah. Nolay mo, ta kasarīta ko si āri para dyimo.” 19 Dawa, nangay si Batseba a nachisarīta di Āri Solomon a para di Adoniha. Do nakaboyaw ni āri si ānang na, naytēnek a nagmāno dya, as nakapaydisna na do trono naw. Inpahap naw asaw a disnan a para di ānang na, as nakapaydisna na sya do kawanan naw.

20 Binata ni Batseba a kāna, “Aryaw asa dēkey lang a chakey ko a akdawen dyimo. Machiengga kaba dyaken ah.”

Initbay no āryaw a kāna, “Āngom ānang nawri? Ibahey mo, ta maparin kwabaw machiengga dyimo.”

21 Binata na a kāna, “Palobōsan mo pa si Abisag a iyaw Sonammitaw a baketen ni kakteh mos Adoniha.”

22 Inatbay ni Āri Solomon si ānang na a kāna, “Namna, āngo ta akdawen mom ānang dyaken a itoroh ko si Abisag a iyaw Sonammitaw di Adoniha? Pī! An komwan, āngo ta dyi mo pa akdawen dyaken a itoroh ko dyaw pagāryan ko, ta ākang ko kan rārayay na pa sa Abyatar a pādi kan Joab a anak ni Seroyas?”

23 Do dāwri, insapata ni Āri Solomon di ĀPO a kāna, “Dosāen pakono yaken no Dyos so taywara an dya madiman si Adoniha do dawri a inakdaw na. 24 Changori, akmas kasigorādo no kasibibyay ni ĀPO a napatnek kan napaydisna dyaken do trono ni āmang ko a si Dabid, kan napayparin dyaken kan kapotōtan ko a magāri dyirad tawotawo a Israel a akmas inkari na, ki machita a madiman si Adoniha sichangori a araw!” 25 Dawa, tinoboy ni Āri Solomon si Benayas a pōtot ni Jehoyada a nangdiman di Adoniha.

26 Binata pa no āryaw di Abyatar a pādi a kāna, “Somabat ka na do tana mo do Anatot. Rombeng ka a madiman,* 2:26 Sinidongan ni Abyatar si Adoniha do kakey na a magāri. 1 Ār. 1:7 ki ipadiman kwaba imo sichangori, ta imo nanyidechideb do kapangisiw daw so Lakāsanaw no Tōlag ni Āpo a DYOS do chimpo paw ni āmang ko a si Dabid, kan nachirāman ka dya do tabo nakalidyatan na.”† 2:26 2 Sam. 15:24-29 27 Dawa, pinaksyat ni Solomon si Abyatar do kinapādi na di ĀPO. Nyaw nakatongpalan dana no inchirinaw ni ĀPO do Silo a maynamot di Eli a pādi kan siraw kapotōtan naw.‡ 2:27 Si Abyatar, ki asa kapotōtan ni Eli a pādi. 1 Sam. 2:27-36

28 Nadāmag ni Joab naparinaw da Adoniha kan Abyatar. Maynamot ta nachikampi di Adoniha a aran dya nachikampi di Absalom, ki nayyayo do toldaw ni ĀPO, as kinemkeman na so mairot sinan olong saw do altaraw a yanan a pagkamītan. 29 Do nakaibahey daw sya di Āri Solomon a nayyayo si Joab a myan do toldaw ni ĀPO do yanan altaraw, tinoboy na si Benayas a pōtot ni Jehoyada a mangdiman dya.

30 Dawa, nangay si Benayas do toldaw ni ĀPO, kan binata na di Joab a kāna, “Inbaheyaw ni āri a mohtot ka daw.”

Ki initbay na a kāna, “Engga! Dya danaw kadimanan ko.”

Naybidi si Benayas di āri, kan inbahey naw binataw ni Joab.

31 Binata ni āri dya a kāna, “Parinen mo akmas binata naw. Dimanen mo na, as kaitābon mo sya. Tan komwan, ki maponas dyaken kan pamilya ni āmang ko iyaw gatos do nakapamawyog na so raya dan dadwaw a tawo a abos gatos. 32 Bahsen dana ni ĀPO si Joab maynamot do nakapangdiman na a dya napapatakan āmang ko a si Dabid. Kinelbat kan diniman naw dadwa saw a mahakay so ispāda a iyaw komanderaw no bōyot no Israel a si Abner a pōtot ni Ner kan iyaw komanderaw no bōyot no Joda a si Amasa a pōtot ni Jeter. Sira dadwa, ki malinlinteg kan maganaganay sa kan iya. 33 Iya pakono nakadiman daw ombahes di Joab kan siraw kapotōtan na a abos pandan. Ki di Dabid kan dyirad kapotōtan na, do pamilya na kan kapagāri na, myan pakononchiw talna a yapo di ĀPO a abos pandan.”

34 Dawa, nangay si Benayas a pōtot ni Jehoyada do yananaw ni Joab, as nakadiman na sya. As iyaw bangkay naw, ki naitābon do mismo a tana na do let-ang. 35 Sinpangan na, pinatādi ni āri si Benayas a pōtot ni Jehoyada di Joab a komander no bōyot. As si Sadok a pādi, ki pinatādi na di Abyatar.

36 Inpatawag ni Āri Solomon si Simey, as nakaibahey na sya dya a kāna, “Mapatnek ka so bahay mo do dya Jerosalem, kan nāw mo a omyan daw. Ki basta dyi ka mohtot do syodadaya a mangay do aran dino. 37 Ta do arawaw a komaro ka kan mamtang do oksongaya a Kidron, ki sigorādo a madiman ka. Imonchi a mismo makatoneng do kadiman mo.”

38 Tominbay si Simey di āri a kāna, “On mo āpo ko a āri. No inbahey mo, ki maganay. Parinen ko a pachirawatan mo inbahey mwaya.” Dawa, nahay si Simey a nagyan do Jerosalem.

39 Ki do nakatayoka no tatdo a katawen, nagtālaw saw dadwa saw a adīpen ni Simey, as kan nagkāmit sa do āri no Gat a si Akis a pōtot ni Maakah. Do nakadāmagaw sya ni Simey a myan sa do Gat, 40 pinasangaan naw asno naw, as nakangay na di Āri Akis do Gat tan chichwasen na saw adīpen na saw. Do nakadongso naw siras adīpen naw, insabat na sa a yapo do Gat.

41 Do nakaibahey daw sya di Āri Solomon a komnaro si Simey do Jerosalem a nangay do Gat kan naybidi, 42 inpatawag na si Simey, kan binata na a kāna, “Inpaisapata ko abawri dyimo do ngaran ni ĀPO, kan binallaāgan koymo a kon ko, ‘Do arawaw a komaro ka a mangay do aran dino, ki sigorādo a madiman ka’? Ki binata mo dyaken a kon mo, ‘No inbahey mo, ki maganay. Tongpalen ko.’ 43 Āngo ngarod ta dyi mo a tinongpal insapata mwaw di ĀPO kan no bilin kwaw dyimo?”

44 Binata pa ni āri di Simey a kāna, “Oyod a chapatak mo a tabo karahet a pinarin mo di āmang ko a si Dabid. Changori, bahsen ni ĀPO imo do marahet a pinarin mo. 45 Ki yaken a si Āri Solomon, ki bindisyonan pakononchi yaken ni ĀPO, kan nāw na mapinsan kapagāri ni Āri Dabid a abos pandan.”

46 Do dāwri, minandaran ni Āri Solomon si Benayas a pōtot ni Jehoyada, kan yangay na a diniman si Simey. Dawa, mapinsan danaw kapagāri ni Āri Solomon.