1-3 Si‐kak, emati‐ak so nen Cristo, isonga agpayso iya ikowan ko di; aliẃen na naka man‐o‐owap. Amtak ey aliẃen o‐owap iya ikowan ko tep sota Ispirito Santo nen Apo Shiyos i emengitoshong niya nemnem ko. Say kowan ko, sajay: ebadeg i naka pengisekit ni kait kon Hodiyos. Naka mandeshingit ta pasiya ni olay kabol son si‐kara ja karada‐an ko. No mebedin koma, angken si‐kak et ngo i shosa‐en nen Apo Shiyos ingkatod ingka, jet angken maysi‐janak son Cristo, basta si‐katoy pemati‐an ni kait kon Hodiyos son Cristo. Nem eg met mebedin. 4 Si‐kara sota sigod ja too nen Apo Shiyos jet ebadeg i kaasi to son si‐kara: si‐karay inpanbalin ton annak to, naytakshol pay son si‐kara sota emenenili ja emengipa‐sas ni kawasha to son si‐kara; nay‐awat pay son si‐kara sota bilin to; inkari to pay son si‐kara ey si‐karay ibilang ton too to, tan ẃara pay i eshom ma inkari to son si‐kara; tan naypiyal pay son si‐kara sota koston pesing shen manshedjaw son si‐kato. 5 Si‐karay poli nonta mismon sampolo tan showen annak nen Israel, jet si Cristo ja inbetkag ali nen Apo Shiyos, no maypangkep ni kinatoo to, edapo met laeng shi poli nen Israel; isonga kait sha met laeng si Cristo. Jet si Cristo, ja Shiyos met laeng, si‐katoy Kangeto‐an so ni emin, tan si‐kato pay i mayshedjaw ingkatod ingka! Siya, satan da.

6 Aliẃen kowan ko ey engawngaw sota kari da nen Apo Shiyos son si‐kara nonta bayag da, ja ootik son si‐karay maysedakan. Ta say kowan ko, aliẃen emin na edapod poli nen Israel ket agpayson too nen Apo Shiyos. 7 Aliẃa ngon emin na medepod poli nen Abraham ket maykeshi ey podnon poli to ja mekiteẃid nonta inkari nen Apo Shiyos son Abraham, tan si Isaac ja anak to. Enshi, ta say kowan nen Apo Shiyos son Abraham nontan da, kowan to ey, “Sota ipoli ali nen Isaac, si‐karay maykeshi ey koston polim, aliẃen sota ipoli ni eshom ma anak mo.” Kowan to, 8 jet say olog niyay, aliẃen na sota naypoli‐an ni too i kabol la kaybidangan sha ey annak ira nen Apo Shiyos, no diket sota toon etongpalan nonta kari nen Apo Shiyos, si‐karay maybidang ey podnon annak to. 9 Ta si Isaac met i etongpalan nonta kari to nonta bayag da; isonga ẃara sota kari to son Abraham ja kowan to ey, “No onsabi ali sota koston timpo, ondawak ali et on‐anak si Sara ja aseẃam ni daki.” 10 Jet aliẃen sotan bengat. Si Rebecca ja aseẃa nen Isaac, nonta kalokon to so nonta anak ton epin, ja inpotot nen Isaac ja makapoli son si‐katejo, 11-12 inkowan nen Apo Shiyos so nen Rebecca nontan ey sota pinidi to, kenshat ta sotan; kowan to ey, “Sota na‐onod ja nay‐anak et ngo mowan i pati‐en nonta epangdo.” Sajay ya inpasing nen Apo Shiyos nonta eg pay laeng nay‐anak sota anak nen Rebecca ja epin, pinidi to sota sakey, ey enshi nin nontan i aramid shen mapteng ono ngaaw, ta ẃara nin pay laeng ired dokon. Jet sajay i edaga, say sota nemnem nen Apo Shiyos, ni toka pemidi ni too to, ontoloy; jet say sigod ja toka pesing ja memidi ja ibilang to ey too to ma, sota piyan to, aliẃen sobadit ni aramid ni too. 13 Si‐katoy kowan met laeng nonta naysolat nonta bayag da, ja esel nen Apo Shiyos ey, “Si Jacob i ensemek ko, nem ekak ensemek si Isaw.”

14 Eg jo koma ikowan ey ngaaw i kepesing nen Apo Shiyos, ja ẃaray pinaboran to. Ayshi, araẃi itan na nemnem. 15 Mapteng sotan na toka pesing; isonga inkowan to so nen Moises nonta bayag da ey, “Sota piyan kon sesmeken, si‐kato, jet sota piyan kon kaasi‐an, si‐katoy kaasi‐an ko.” 16 Isonga sota kaasi nen Apo Shiyos, aliẃen may‐ekan nodta makapiyan so, ono nodta toon kowan to ey idigatan to say si‐katoy mepaboran, no diket olay tos Apo Shiyos no sipay kaasi‐an to. 17 Say kay‐eshigan niyay, si Paro ja ari nonta bayag da. Isonga ẃaray naysolat ja esel nen Apo Shiyos son Paro, ja kowan to ey, “Inpanbalin taka ni ari say si‐kam met laeng i mismon ka‐asan to ey si‐kak i Kangeto‐an, ta i‐onod moy piyan ko ni anongosto, say sota ngaran ko ma, maypedawag shi intiron dobong.” Kowan nen Apo Shiyos son Paro. 18 Isonga sajay i nemnemen jo, ta sota piyan nen Apo Shiyos ja kaasi‐an, si‐kato; jet sota toon piyan nen Apo Shiyos ja angken ontangken i nemnem ton eg memati, si‐katoy medeka.

19 Jet sigosho say kowan jo mowan, “Apay ngarod nga kowan nen Apo Shiyos ey ẃaray basol ni too, no sotan i ẃara son si‐kato, ey enshi met i kabedinan ni toon memediw ni dag‐en to, ta si Apo Shiyos met i sigod ja nannemnem so!” 20 Nem too ka bengat jet eg ka koma onpa‐so ja onsopngil son Apo Shiyos! Say kay‐eshigan to, sota mandeka ni banga. Enshiy mebedin nonta banga ja onsopngil nonta itsora ni inkaleka to. Sota inpasing nonta dimaga so, si‐kato. 21 Sota emandeka ni banga, ẃara ngo son si‐kato no ngantoy pesing ton memkel nontan na banga. No piyan nonta mandeka ey sota sakey ket, dag‐en ton memapteng ja kay‐iyanan ni sabsabong, si‐katoy pesing to, ono sota sakey ket dag‐en ton para pengi‐janan ni ensekig, si‐kato ngoy pesing to. Ta ẃaray kanebengan ton mandeka ni piyan to.

22 Isonga ẃaray kanebengan nen Apo Shiyos ja mengipekat ni panakabalin ton menosa niya dobong say ma‐amta‐an ey si‐katoy Manakabalin na Shiyos. Nem inenosan to nin ja eg to pay laeng shosa‐en sota toon anam ton ma‐aknan ni embel‐at ta shosa, 23 say sota eshom ma too, ja insagana ton sigod ja mayda‐kam son si‐kato met laeng shi dangit, amta‐an sha ey ebadeg i kaasi to. 24 Jet si‐katejo sotan na pinidi nen Apo Shiyos ja too to; aliẃen emili bengat son si‐kamin Hodiyos, no diket angken son si‐kayon aliẃen Hodiyos. 25 Saja inkayda‐kam jon aliẃen Hodiyos, si‐katoy kaytoshongan nonta inkowan nen Apo Shiyos ja insolat nen Osias nonta bayag da, ja kowan to ey,

27 Jet si Isaias nonta bayag da, ẃara ngoy inkowan to, nem maypangkep so nonta ira Hodiyos, ja kowan to ey,

30 Jet iyay i esa‐nopan nonta emin na inkowan ko la. Sota ira aliẃen Hodiyos, istay eg sha ninemnem i kosto‐an so nen Apo Shiyos son si‐kara, nem kinosto‐an ira nen Apo Shiyos tep emati ira son Cristo. 31 Nem sota ira Hodiyos et ngo mowan, say kowan sha ket, kosto‐an kono ira nen Apo Shiyos ja sobadit ni itongpal sha so nonta bilin to ja naysolat nonta bayag da, nem enshi, ta eg sha kabaalan na onoren na emin. 32 Jet ngantoy kabol la nankolangan sha? Say kabol la nankolangan sha, nanshinel ira nonta kowan sha ey tongpalen shay bilin nen Apo Shiyos, ey eg sha kari baalan. Say inpasing sha koma, emati ira son Cristo say kinosto‐an ira nen Apo Shiyos. Isonga singa nayko‐bilan ira, jet sotan i kaytoshongan nonta esel nen Apo Shiyos nonta bayag da, 33 ja naysolat, ja kowan to ey, “Waray ibetkag ko la so ni took jet sajay da, may‐eshig shi bato ja inseked ko nodta shalan ira nonta totoo. Jet eshakel i mayko‐bilan nodtan. Nem sota ira memati son si‐kato, eg ira medismaya tep ẃaray panpa‐no‐an ni pansaad to.”