1 Idi nonta eman‐ekad si Jesus, ẃaray inon‐an ton too ja sigod ja ekorab ni inkay‐anak to. 2 Jet sota ira too nen Jesus, kowan sha son si‐kato ey, “Maistoro, nganto ngatay ekoraban niyay ya too? Sigosho ẃaray basol to, ono basol ni maka‐anak son si‐kato?”

3 Si Jesus, simongbat ja kowan to ey, “Aliẃen sota basol niyay ya too, ono sota basol ni maka‐anak i ekoraban to, no diket inpalobos nen Apo Shiyos, say si‐kato met laeng i mengekas son si‐kato, say amta‐en ni totoo ey ebadeg i panakabalin to. 4 Niman ta ẃara kito pay laeng shi biyag, mesepol la dag‐en tayo sota obda ja piyan nonta engibetkag son si‐kak, ta no onsabi sota timpon ketey tayo, ibi‐jag tayo ma ja man‐obda. 5 Niman ta ẃara‐ak pay laeng shiya dobong, si‐kak i may‐eshig ey silew wa ondawag so ni nemnem ni tood ja dobong.”

6 Idi enaksheng nga inkowan nen Jesus iyay, tinopsha‐an to sota bo‐day jet pingkel to, asan toka ipakpak nodta mata nonta toon ekorab, 7 jet kowan to son si‐kato ey, “Daw ka, ka pansha‐dop shima nabneng nga shanom shi Siloam.” (Say olog ni esel la Siloam, naybetkag.) Jet sota ekorab, dimaw wa en nansha‐dop, jet idi imoli di, eman‐esas ma.

8 Jet sota ira inaskang to, tan sota ira eshom ma toon maka‐amta son si‐kato ni toka pankekkekshaw nontan da, kowan sha ey, “Apay aliẃen sajay aya sota toon emantetongaw ni olay ja emankekkekshaw?”

9 Sota ira eshom, kowan sha ey si‐kato, nem sota ira eshom, kowan sha ey, “Apil — kalopdopa to bengat sotan.”

Jet sota toon istay ekorab, kowan to ey, “Owen, si‐kak sotan na too.”

10 Idi inkowan to ey owen, inbag‐an sha et mowan, ja kowan sha ey, “Toway inpasing mon nan‐asas ey istay ekorab ka met?”

11 Simongbat iya toon istay ekorab, ja kowan to ey, “Sota toon kowan sha ey si Jesus, engala nonta bo‐day ya tinopsha‐an to, jet inpakpak tod matak jet inbetkag towak ka ondaw shi Siloam ja en mansha‐dop. Idi mansha‐dopak, maka‐asasak ma.”

12 Jet inbag‐an sha mowan ja kowan sha ey, “Toway kad‐an nontan den too?”

Simongbat sota toon istay ekorab ja kowan to ey, “Taẃey, ekak amtay dinaẃan to la.”

13 Jet sajay ya toon istay ekorab, indaw sha so nonta ira Parisiyo. 14 Say indaga so nen Jesus niyay ya milagro, nonta timpo ni ngilin ni Hodiyos; 15 isonga sota ira Parisiyo, inbag‐an sha ngo sota toon istay ekorab, no toway inpasing ton nan‐asas. Jet sota toon istay ekorab, inistoriya toy inpasing nen Jesus.

16 Jet sota ira eshom ma Parisiyo, kowan sha ey, “Sotan na too, aliẃen si Apo Shiyos i edapo‐an to, ta no si Apo Shiyos komay edapo‐an to, apay nga eg to met onoren sota kowan ni dinteg tayo, pangkep ni akew ni ngilin?”

Nem sota ira eshom ma Parisiyo, kowan sha ey, “Enshi. Sota ngaaw wa too, eg mebedin na todongan nen Apo Shiyos sa dag‐en toy kaskasshaaw, ja inges niya dingka niyay ya too.” Nontan ma, sajay iren too, nanshowa ira ja eg man‐inawatan.

17 Isonga sota ira Parisiyo, inbag‐an sha mowan iya toon istay ekorab, ja kowan sha ey, “Si‐kam ma istay ekorab, ngantoy moka pannemnem pangkep son si‐kato? Tep si‐katoy inpan‐asas son si‐kam.”

Simongbat iya toon istay ekorab, ja kowan to ey, “Sotan na too, say kowan ko, para padto nen Apo Shiyos.”

18 Nem sota ira pangolo ni Hodiyos, eg sha pati‐en ey sigod ja ekorab iyay ya too nonta inkay‐anak to. Isonga sha inpa‐odop sota maka‐anak son si‐kato, ta piyan shen ibag‐an, asan shaka pati‐a. 19 Jet sota ira pangolo ni Hodiyos, inbag‐an sha sota maka‐anak ja kowan sha ey, “To‐to‐ẃen sajay sota anak jo? Sigod ja ekorab iyay nonta inkay‐anak to? Jet no agpayso, ngantoy inpasing ton nan‐asas niman?”

20 Sota maka‐anak son si‐kato, simongbat ira ja kowan sha ey, “Agpayson anak mi noman itan na too, jet sigod ja ekorab nonta inkay‐anak to. 21 Nem no sota maypangkep ni toka pan‐esas niman, ono sipay timolong son si‐katon nan‐asas, eg mi amta. Si‐katoy ibag‐an jo ta na‐ama met; mebedin na ikowan to son si‐kayo.” 22 (Sajay i insongbat sha, ta entakot ira so nonta pangolo ni Hodiyos, ta say nantotodagan ira nonta pangolo ni Hodiyos, kowan sha ey no sipay too ja mengikowan ey si Jesus sota naypadton mengisedakan ja ibetkag ali nen Apo Shiyos, a‐kalen sha shima sa‐nopan ira ni Hodiyos ja eg ma mebedin na mekisa‐sa‐nop son si‐kara. 23 Isonga sajay i inkowan nonta maka‐anak, ey sota anak shen istay ekorab ket si‐katoy ibag‐an sha.)

24 Jet sota ira Parisiyo, inpa‐odop sha mowan sota toon istay ekorab, jet kowan sha son si‐kato ey, “Si Apo Shiyos komay pan‐iyamanan mo ni maypangkep nita edaga son si‐kam, aliẃen sota toon kowan mo ey enolong son si‐kam. Ta amta mi ey sajay ya too ket mabesol.”

25 Sota toon istay ekorab, simongbat ja kowan to ey, “No si‐kak, ekak amtay aramid to, no ngaaw ono mapteng, nem say sakey bengat ja amtak: nontan, ekorabak, nem niman, maka‐asasak ma.”

26 Jet inbag‐an sha mowan na kowan sha ey, “Ngantoy dingka to son si‐kam? Ngantoy inpasing ton inpan‐asas son si‐kam?”

27 Simongbat sotan ja kowan to ey, “Inkowan ko met da son si‐kayo. Nganto pay laeng i ipinpinshow‐an ko so, no eg jo met laeng pati‐en? Apay piyan jo mowan na itenengan aya? No kasta, piyan jon manbedin ni too to?”

28 Sota ira Parisiyo, nan‐es‐esdan sha sota toon istay ekorab asan shaka ma ikowan ey, “Si‐kam a! Too toka! Nem si‐kami, too shakami nen Moises. 29 Ta amta mi ey si Moises, tinabtabal nen Apo Shiyos, nem eg mi pay amta no toway edapo‐an nita kowan mo ey enolong son si‐kam!”

30 Jet sota toon istay ekorab, simongbat ja kowan to ey, “Kaskasshaaw itan na kowan jo! Sotan na too, inpan‐asas towak, nem say kowan jo, eg jo pati‐en ey si Apo Shiyos i edapo‐an to. 31 Amta ni emin na too, ey say toon ngaaw i aramid to, eg todongan nen Apo Shiyos. Nem sota toon mengiredjaw son Apo Shiyos, tan mandeka ni piyan to, si‐katoy todongan nen Apo Shiyos. 32 Angken nonta ikaypalsowa niya dobong ingkato niman, enshiy en naytenengan ja inges niyay ya too, ja inpan‐asas toy toon sigod ja nay‐anak ka ekorab. 33 No sotan na too ket aliẃen si Apo Shiyos i edapo‐an to, istay eg to koma mebedinan na pan‐esas i toon ekorab.”

34 Jet sota ira pangolo ni Hodiyos, kowan sha ey, “Sesi‐kam, kowan mo ey tod‐an mokamin maka‐amta ni dinteg, ey inba‐deg may basol!”

Idi enaksheng iyay ya inkowan sha, ingkal sha nodta sa‐nopan ja kowan sha ey eg ma mekisa‐sa‐nop.

35 Idi shinemag nen Jesus ey ingkal sha nodta sa‐nopan sota toon istay ekorab, dimaw, ja to simbi jet to inbag‐an ja kowan to ey, “Agpayson kaka memati nonta naypadton Anak ni Too?”

36 Sota toon istay ekorab, simongbat ja kowan to ey, “Apo, ikowan mo no sipa sotan na too, say pati‐en ko.”

37 Si Jesus, simongbat ja kowan to ey, “Inon‐an mo met sotan na too. Jet si‐kak sotan, ja mismon emekitbal son si‐kam niman.”

38 Sota toon istay ekorab, simongbat ja kowan to ey, “Apo, naka memati son si‐kam.” Jet sotan ma ey nantalimokod ja nanshayaw son Jesus.

39 Jet si Jesus, intoloy ton kowan to ey, “Say kabol la dinaẃan ko did ja dobong, say mandinasin i toon memati tan toon eg memati. Dimawak ali say sota singa ekorab, maka‐asas, nem sota toon kowan to ey eman‐esas, si‐kara et ngo mowan i may‐eshig ey ekorab.”

40 Sota ira Parisiyo ja nay‐esop son Jesus, intenengan sha iyay ya inkowan to, jet kowan sha ey, “Say piyan mon a‐seden, angken si‐kami, ekorab kami?”

41 Si Jesus, simongbat ja kowan to ey, “Enshi. No ekorab kayo koma, istay mebedin na mepesinsiya‐an kayo. Nem kowan jo ey maka‐asas kayo, ja joka idastog sota kowan jo ey abos jon maka‐amta ni podno. Isonga ka‐onong son si‐kayo i basol jo; eg epakaẃanan.”