1  Wan-to̱m-wu̱ Shir ataane̱-wu̱ huru kar-o̱ u̱n wu̱. U̱m hyanu̱ru̱ re̱ge̱n-yo he'ene̱ rwu̱u̱n-mo̱ n-To̱n shir haan-mo̱ n-dak à, komo a ya'asu̱ru̱ wu̱ rii-yo u̱n tiks u̱n 'wu̱gu̱pte̱-o̱ u̱n ka kuub-o̱ u̱r-du̱w o̱. 2 Da-o̱ wu̱ tikshe̱ ká kuub-o̱ à, de ken hye-de rwu̱u̱nu̱ru̱ sa o zee hye-de u̱n caari-o̱ o-ra, har ká hye-de rwo̱'u̱ u̱r-ho̱ u̱n ku̱s-o̱ n-to̱n ne̱ no̱m o-comb.* 9:2 Hyen komo: Taka 19:28. 3 Ye̱ge̱-'e rwu̱u̱nu̱ru̱ n-me̱ u̱n ká hye-de, ye̱ ciru̱ru̱ u̱n ho̱no o-dak, a ya'u̱ ye̱ gwo̱mo-to̱ u̱s-to̱t u̱ntu̱n ye̱ge̱-tot.† 9:3 Hyen komo: Rwu̱u̱ 10:12-15. 4 A kewsu̱ ye̱ komo u̱n taase ye̱ sabarse̱ po̱-to̱ n-dak, ko̱ u̱t-ran, ko̱ u̱s-'yo, se̱ de̱ hun-ne̱ ye̱ ro̱tte̱ napa-o̱ Shir u̱n zwo̱n-to̱ u̱n ye̱ á.‡ 9:4 Hyen komo: Izik 9:4. 5 A 'ya ye̱ gwo̱mo-to̱ u̱n ho̱ u̱n ne̱t á, se̱ de̱ ye̱ rangse̱ hun-ne̱ har re̱ng-u̱s taan. Ye̱ ya'ag hun-ne̱ m-reeten u̱ntu̱n reeten-mo̱ u̱n to̱to̱nte̱-o̱ o-tot. 6 N-me̱ u̱n ká ho̱-to̱ hun-ne̱ a hoob m-mar, amba ye̱a kum á. Ye̱a dishe̱ m-mar amba mo̱a yage̱ m-haan.§ 9:6 Hyen komo: Ayub 3:21; Irmi 8:3.

7 Ká 'e-ye̱ sha'ag jo̱k-ye̱ a zo̱ngse̱ remen u̱r-gu̱n à. Hi-to̱ u̱n ye̱ ro̱ yeresse̱ u̱ntu̱n go̱nd-to̱ o-zinariya, co-se u̱n ye̱ komo sha-mo̱ u̱n co-se u̱n hun-ne̱.* 9:7 Hyen komo: Jowe 2:4. 8 Hi-se u̱n ye̱ u̱ntu̱n hi-se u̱n ne'a, yin-ye̱ u̱n ye̱ u̱ntu̱n yin-ye̱ o-zur.† 9:8 Hyen komo: Jowe 1:6. 9 Ye̱ co̱pu̱ru̱ matuku-to̱ u̱t-kwo̱m n-te̱ u̱n be-to̱ u̱n ye̱, go̱ u̱n to̱ hun-ne̱ ro̱ m-co̱p remen u̱r-gu̱n à, zááz-o̱ u̱n ku̱ku̱n-to̱ u̱n ye̱ m-shas u̱ntu̱n zááz-o̱ u̱n jo̱k-ye̱ u̱r-gu̱n.‡ 9:9 Hyen komo: Jowe 2:5. 10 Ye̱ ro̱ u̱s-tu̱r ne̱, se u̱n to̱t u̱n hun-ne̱ u̱ntu̱n ye̱ge̱-tot. Tu̱r-se u̱n ye̱ rangsu̱te̱ hun-ne̱ har re̱ng-u̱s taan. 11 Ye̱ ro̱ u̱n ko-Gwo̱mo ne̱, wu̱ ye̱ ro̱ u̱n ku̱s-o̱ u̱n wu̱ à, wu̱ ro̱ ká wan-to̱m-wu̱ Shir wu̱ a ya'ase̱ gwo̱mo-to̱ u̱n ká kuub-o̱ u̱r-du̱w o̱ à. Jin-de u̱n wu̱ u̱n rem-de u̱t-Ibra “Abaddo̱n” wu̱, u̱t-Girik komo, “Apo̱riyon” Wata “Wan-hom u̱n hun-ne̱.”

12 Rii-yo u̱r-'wo̱n de u̱r-takan aragte̱, kuks u̱t-yoor to̱ ro̱o̱ne̱ à.

13 Ka da-de wan-to̱m-wu̱ Shir acinde̱-wu̱ huru̱ kar-o̱ u̱n wu̱, u̱m ho̱gu̱ru̱ o̱ ken co̱r-o̱ ro̱ m-rwu̱u̱n be-de u̱n ka kar-u̱t nass-to̱ u̱n hana-o̱ u̱n zinariya o̱ ro̱ u̱n he̱r-o̱ Shir à.§ 9:13 Hyen komo: Rwu̱u̱ 30:1-3. 14 Ka co̱r-o̱ ze̱e̱ru̱ wan-to̱m-wu̱ Shir acinde̱-wu̱, ka wu̱ ro o-kar ne̱ u̱t-kom à, “Ho'osu̱ne̱ ka yan-to̱m ye̱ Shir ne̱n nass-ye̱ ye̱ ro̱ ke'o u̱n ro̱o̱g-o̱ o-Yupireti à!” 15 Ka yan-to̱m-ye̱ Shir ne̱n nass-ye̱, a u̱n ho'osu̱ndu̱ ye̱ remen ye̱ hoot bu̱u̱g-u̱r gaan be-de u̱n bu̱u̱g-u̱t tet-to̱ u̱n hun-ne̱ ye̱ u̱n ho̱no o-dak. Shir e̱ss ka yan-to̱m ye̱ remen ká da-o̱ u̱n ká ho̱-de, u̱n ká re̱ng-yo u̱n ká hak-o̱ ne̱. 16 U̱m ho̱gu̱ru̱ mo̱o̱r-to̱ u̱n ka karma-ne̱ ye̱ n-to̱n u̱n jo̱k woose̱ miriyo̱n zungu-u̱s yoor [200,000,000].

17 Da-o̱ u̱m hyane̱ ka jo̱k-ye̱ u̱n yan-da-se u̱n ye̱ ne̱ à, ye̱ ro u̱ntu̱n kaane̱: matuku-to̱ u̱n ye̱ to̱ u̱t-kwo̱m u̱t-jaas to̱ zàà u̱ntu̱n o-ra, u̱n to̱ ken ne̱ u̱ntu̱n sha-mo̱ o-comb u̱n ho̱-mo̱ u̱t-wa ne̱ u̱n mo̱ u̱t-ru̱ ne̱. Ko̱ yo ke jo̱k-yo komo hi-de u̱n yo ro̱ u̱ntu̱n de o-zur, komo ta'ar-to̱ u̱n caari-o̱ o-ra m-rwu̱u̱n u̱n nu-o̱ u̱n ye̱ u̱r-'hye ne̱. 18 A ho̱o̱ru̱ bu̱u̱g-u̱r gaan be-de u̱n bu̱u̱g-u̱t tet-to̱ u̱n hun-ne̱ u̱n ká ta'ar-to̱ u̱n caari-o̱ o-ra to̱, u̱r-'hye m-tu̱kne̱ de rwu̱u̱ne̱ u̱n nu-se u̱n ye̱ à. 19 'Wo̱ns-mo̱ u̱n ka jo̱k-ye̱ ro̱ u̱n nu-se u̱n ye̱, u̱n tu̱r-se u̱n ye̱ ne̱ komo. Tu̱r-se u̱n ye̱ komo ro̱ u̱t-hi ne̱ u̱ntu̱n to̱ u̱n hwo̱ u̱n gwo̱mo-to̱ u̱n ho̱gu̱sse̱ u̱n hun-ne̱ m-hoog ne̱.

20 Amba ka hun-ne̱ ye̱ mare̱ u̱n ka rangse̱-o̱ á, ye̱ kwangu̱te̱ m-waktu̱ne̱ be-de Shir. Ye̱ se̱ngu̱ru̱ u̱n kwu̱kte̱ u̱n ya-u̱t-ko̱t m-gir ne̱ u̱n saw-to̱ a no̱me̱ u̱t-kom à u̱n zinariya, ko̱ azorpa à, ko̱ u̱n kwo̱m-u̱t jaas-to̱, ko̱ u̱r-ta'ar, ko̱ u̱s-'yo, to̱a hoks m-hyan á, to̱a ho̱ge̱ á, to̱a hoks m-arag á.* 9:20 Hyen komo: Bo̱ng 115:4-7; 135:15-17; Dane 5:23. 21 Komo ye̱ ko̱n a soksu̱ ye̱ ba'as-to̱ u̱n hun-ne̱ ye̱ ye̱ hoome̱ á, ko̱ hyat-to̱ ye̱ nome̱ u̱n bu̱-yo u̱n mo̱r, o-ás, ko̱ hyow-de u̱n ye̱ á.