1 Ye̱so inu̱ru̱ u̱n ká dak-o̱, wu̱ co̱wu̱ru̱ u̱n dak-o̱ o-Judiya, ka da-de wu̱ passu̱ru̱ Ro̱o̱g-o̱ o-Joda. Komo mo̱o̱r-to̱ u̱n hun-ne̱ dooru̱ m-go'one̱ be-de u̱n wu̱. Wu̱ dooru̱ ye̱ m-yoose̱ bo̱ wu̱ we̱te̱ m-no̱m à.

2 Ye̱ ken Parisa-ne̱ ye̱ haanu̱ru̱ be-de u̱n wu̱ remen ye̱ taksté̱ wu̱, ko̱ wu̱a ba'ase̱ be-de Shir à. Ye̱ citu̱ru̱ wu̱, “¿Depete̱ campo̱ wu̱ ho'os ne'a u̱n wu̱?”

3 Ye̱so shasu̱ru̱ ye̱, “¿Ya Mosa ze̱e̱ no̱?”

4 Ye̱ ze̱e̱ru̱, “Mosa ya'ag te̱ o-co̱w a gen taku̱rda-o̱ u̱n caas u̱t-ge, a ho'os ne'a.”* 10:4 Hyen komo: Kara 24:1-4; Mati 5:31.

5 Ye̱so ze̱e̱ru̱ ye̱, “Cikt u̱n no̱ de rwo̱'e̱ wu̱ genetu̱ no̱ kà karamsa-o̱. 6 Cin da-o̱ Shir no̱me̱ ko̱yan à, ‘Wu̱ no̱mo̱g hun-ne̱ campo̱ u̱n ne'a ne̱.’† 10:6 Hyen komo: Taka 1:27; 5:2. 7 Cin da wu̱ nomte̱ na kaane̱ à, ‘Campo̱ a yage̱ tato u̱n wu̱ u̱n inu u̱n wu̱ ne̱ remen wu̱ she'etté̱ u̱n ne'a u̱n wu̱ ne̱. 8 Ye̱, yoor-ye̱ waragte̱ u̱ntu̱n wan-gaan’‡ 10:7-8 Hyen komo: Taka 2:24. campo̱ u̱n ne'a u̱n wu̱ ne̱, yanze u̱n ho̱n u̱n ho̱n á. Ye̱a ma'as hun-ne̱ gaan. 9 Ge-to̱ Shir gekse̱ à, taasu̱ ne̱t, wu̱ caas to̱ á.”

10 Bo̱ Ye̱so komte̱ u̱t-ma u̱n Parisa-ne̱ ne̱ à, wu̱ ji'iru̱ o-hur u̱n yan-neke̱-mo̱ u̱n wu̱ ne̱. Bo̱ ye̱ woote̱ o-hur à, komo ye̱ dooru̱ wu̱ m-cit u̱n ka ma-to̱. 11 Wu̱ ze̱e̱ru̱ ye̱, “Ko̱wan wu̱ ho'ose̱ ne'a u̱n wu̱, wu̱ gaaru̱ ne'a ho̱r-wu̱, ás-o̱ wu̱ ro̱tte̱ u̱n ka ne'a-wu̱ ne̱, remen ne'a u̱n wu̱ wu̱ á. 12 Tomso ne̱ ne'a-wu̱ ho'ose̱ campo̱ u̱n wu̱ à, wu̱ gaaru̱ campo̱ ho̱r-wu̱, ás-o̱ wu̱ ro̱tte̱ u̱n ka campo̱-wu̱ ne̱, remen campo̱ u̱n wu̱ wu̱ á.”§ 10:12 Hyen komo: Mati 5:32; 1Kor 7:10-11.

13 Ye̱ ken ye̱ hantu̱ru̱ Ye̱so yakar re̱k-ye̱ remen wu̱ ci'it ye̱. Yan-neke̱-mo̱ u̱n wu̱ kangsu̱ru̱ ye̱. 14 Bo̱ Ye̱so hyente̱ à, ryaab-u̱s re̱e̱ru̱ wu̱. Wu̱ ze̱e̱ru̱ yan-neke̱-mo̱ u̱n wu̱, “Yage̱ no̱ yakar re̱k-ye̱ ye̱ haante̱ be u̱n de. No̱ we̱n ye̱ á. Me̱ u̱n ze̱e̱ kaane̱ remen Gwo̱mo-to̱ Shir to̱ ro̱ be-de u̱n ka ye̱ ro̱ u̱ntu̱n yakar re̱k-ye̱ à. 15 Nip-o̱ me̱ no̱ m-ru̱re̱, wu̱ yage̱ ya'as u̱n gwo̱mo-to̱ Shir hur-de u̱n wu̱ bo̱ wà re̱k-wu̱ ro̱ m-ya'as à, wu̱ á tu̱w u̱n to̱ á.”* 10:15 Hyen komo: Mati 18:3. 16 Bo̱ Ye̱so komte̱ ye̱ m-ru̱re̱ kaane̱ à, wu̱ gamtu̱ru̱ ka yakar-ye̱. Wu̱ hu̱u̱ru̱ ye̱ nu-o̱ u̱r-bon.

17 Bo̱ Ye̱so hu̱u̱te̱ yakar nu-o̱ u̱r-bon à, wu̱ inu̱ru̱, wu̱ rwu̱u̱nu̱ru̱ u̱n co̱w. Wu̱ ken ne̱t-wu̱ hyambu̱ru̱ wu̱. Wu̱ teeru̱ru̱ o-rek. Wu̱ kwu̱ktu̱ru̱ u̱n co Ye̱so, wu̱ citu̱ru̱ Ye̱so. Wu̱ ze̱e̱ru̱, “Wa-u̱r-Yoos, wan-me̱n-u̱t pus-to̱, ¿re u̱m he m-no̱m u̱m kumut ho̱o̱g-o̱ ba m-ta?”

18 Ye̱so citu̱ru̱ wu̱ eb u̱n wu̱, wu̱ ze̱e̱ru̱, “¿Remen ya u̱n o̱ o zettu̱ me̱ wan-me̱n-u̱t pus-to̱? Wan-me̱n-u̱t pus-to̱ ro̱ ko̱n á, se̱ Shir u̱n ho̱n-de u̱n wu̱. 19 O nepse̱ rii-yo Shir zee à: ‘Wo̱ ho̱ ne̱t á. Wo̱ ho̱o̱b ne'a-wu̱ u̱n ne̱t á, ne'a ne̱ wu̱ ho̱o̱b campo̱ wu̱ u̱n ne̱t á. Wo̱ hiw u̱r-hyow á. Wo̱ no̱m swo̱-se u̱t-bo̱ á. Wo̱ re̱ ra-o o̱r ru á, 'ya tato ru u̱t-go̱s u̱n inu ru ne̱.’† 10:19 Hyen komo: Rwu̱u̱ 20:12-16; Kara 5:16-20. ”

20 Ka ne̱t-wu̱ ze̱e̱ru̱, “Wa-u̱r-Yoos, u̱m do̱ru̱te̱ to̱ ka kap cin da-o̱ u̱m ro'e̱ wà à.”

21 Ye̱so gwo̱tu̱ru̱ ka ne̱t-wu̱, ka ne̱t-wu̱ napu̱ru̱ u̱nze Ye̱so waste̱ u̱n wu̱ ne̱. Ye̱so ze̱e̱ru̱ wu̱, “Amba rii gaan yo o taage̱. Neke̱ o beeb rii-yo o ro̱tte̱ à, o ya'as ko̱o̱b-ne̱ ye̱ ro̱tte̱ rii á ka hwo̱r-ye̱. Wo̱a kum u̱r-'yons n-To̱n shir. Ka da-de ne̱, o mu̱u̱n, o do̱ru̱ me̱.”

22 Bo̱ wu̱ ho̱gu̱te̱ kaane̱ à, wu̱ ho̱ge̱ m-re̱re̱m á ko̱ hiin. Wu̱ neku̱ru̱ me̱n-u̱t ro̱ m-tu̱k remen wu̱ wa-o-kwu̱m-wu̱ de̱e̱n.

23 Ye̱so gu̱tru̱ru̱ yan-neke̱-mo̱ u̱n wu̱. Wu̱ ze̱e̱ru̱ ye̱, “Rem ro̱ ko̱n ko-ya-o-kwu̱m-wu̱ tu̱wu̱t be-de u̱n gwo̱mo-to̱ Shir.”

24 Yan-neke̱-mo̱ u̱n wu̱ hyanu̱ru̱ hyat-to̱ u̱n ka ma-to̱. Komo Ye̱so dooru̱ ye̱ m-ze̱e̱, “U̱m hyanag co̱w u̱n gwo̱mo-to̱ Shir ro̱ u̱n rem ne̱. 25 Jiishte̱ a zee dorom-yo cu̱w u̱n ish-o̱ o-be̱r, o̱tte̱ a zee wa-o-kwu̱m-wu̱ cu̱w be-de u̱n gwo̱mo-to̱ Shir à.”

26 Ye̱ bo̱pu̱ru̱ u̱s-nu de̱e̱n. Ye̱ ze̱e̱ru̱ wu̱, “U̱rege̱ ka o̱, ¿wa he kum u̱n gwu̱?”

27 Ye̱so gwo̱tu̱ru̱ ye̱. Wu̱ ze̱e̱ru̱, “Be-de u̱n hun-ne̱ a nome̱ á. Amba be-de Shir, yatt-yo kwange̱ Shir á.”

28 Bitrus taknu̱ wu̱ m-ze̱e̱, “Gwo̱t, te̱ ka jore̱ ko̱ yo ke rii-yo, te̱ do̱ru̱te̱ wo̱.”

29-30 Ye̱so ze̱e̱ru̱, “Nip-o̱ me̱ no̱ m-ru̱re̱, ne̱t-wu̱ yage̱ hur-o̱ u̱n wu̱ à, ko̱ o̱r u̱n wu̱ ne̱, ko̱ inu u̱n wu̱, ko̱ tato u̱n wu̱, ko̱ yakar, ko̱ u̱t-kat, rem re, tomso remen Ma-to̱ m-Re̱re̱m to̱ Shir, wu̱a kum go̱n ka rem-se har o-zungu u̱n ka da-o̱ m-mo̱ka. Ka o̱ ne̱ tomso o-nip wu̱a kum u̱t-hur u̱n o̱r u̱n wu̱ ne̱ ne̱ u̱n inu u̱n wu̱ ne̱ ne̱ u̱n yakar ne̱ u̱t-kat ne̱. Amba wu̱a kum se mo̱sse̱ o-range̱ ne̱. Da-o̱ ro̱o̱ne̱ ne̱ à, wu̱a kum ho̱o̱g-o̱ ba m-ta. 31 Hun-ne̱ de̱e̱n ye̱ ro̱ caari-ne̱ à, ye̱a waragse̱ re̱k-ye̱. Re̱k-ye̱ komo warag caari-ne̱.”‡ 10:31 Hyen komo: Mati 20:16; Ruka 13:30.

32 Ye̱so u̱n yan-neke̱-mo̱ u̱n wu̱ ne̱ ye̱ ro m-ha u̱n bo̱-o̱ o-Urusharima. Ye̱so ro o-co, u̱n co̱w ye̱ ro wu̱ m-do̱re̱ bi. Ye̱ hyanag hyat-to̱ u̱n neke̱-mo̱ u̱n wu̱ o-Urusharima. Ye̱ ken ye̱ ne̱ ye̱ ro̱o̱ne̱ u̱n jim à, gye̱r-o re̱e̱ru̱ ye̱. Wu̱ dooru̱ koos u̱n ka o̱p u̱n yoor-ye̱ komo. Wu̱ taknu̱ ye̱ m-ru̱re̱ u̱n rii-yo he wu̱ m-kum à. 33 Wu̱ ze̱e̱ru̱ ho̱gu̱ no̱, “A ka m-ha o-Urusharima. Me̱ Wà-wu̱ u̱n ne̱t, wu̱ ken ne̱t-wu̱ a ya'as me̱ u̱n kom-to̱ u̱n Gwo̱mo-ne̱ ye̱ u̱n ko̱n-se Shir u̱n yan-Yoos-de u̱n karamsa-o Mosa ne̱. Ye̱ ya'aste̱ me̱ u̱n kom-to̱ u̱n hamat-ne̱ ye̱ rumse̱ u̱t-gwo̱mo à, ye̱a piishe̱ me̱ ma-to̱ wo̱o̱ m-mar à, ye̱ ho me̱. 34 Ye̱a nomo me̱ u̱r-ar, ye̱ copsu̱ me̱ m-ta, ye̱ bu me̱ u̱s-so̱ro̱g, ye̱ ho me̱. A nome̱ ho̱-u̱t tet, man ine̱ u̱n ho̱o̱g ne̱.”

35 Yakar Ze̱be̱di, Yakubu ne̱, u̱n Yohana, ye̱ hyoknu̱ru̱ be-u̱r Ye̱so. Ye̱ ze̱e̱ru̱ wu̱, “Wa-u̱r-Yoos, te̱ co̱no̱g o nomu̱ te̱ u̱r-ho̱.”

36 Wu̱ ze̱e̱ru̱ ye̱, “¿Ya no̱ co̱ne̱ u̱m nomu̱ no̱?”

37 Ye̱ shasu̱ru̱, “Te̱ co̱no̱g, a sagbe̱ wo̱ u̱t-gwo̱mo, u̱n ho̱-de u̱n se̱ps-m ru, o dek te̱, wan-gaan she'et u̱n kom-o ru o̱ u̱r-re̱, wan-gaan she'et u̱n kom-o̱ u̱r-kwanta.”

38 Ka da-de ne̱, Ye̱so ze̱e̱ru̱ ye̱, “No̱ nap rii-yo no̱ ko̱ne̱ á. ¿No̱a hoks swo̱ u̱r-ko̱o̱b bo̱ u̱m he de m-swo̱?”§ 10:38 Hyen komo: Ruka 12:50.

39 Ye̱ ze̱e̱ru̱ ye̱a hoks. Ye̱so ze̱e̱ru̱, “No̱a su̱ u̱r-ko̱o̱b, bo̱ me̱ de m-swo̱ à. A yo'os no̱ bo̱ a he me̱ m-yo'os à. 40 Amba she'et-de u̱n re̱ u̱n de ko̱ kwanta u̱n de me̱ wu̱ ro̱ wan-gwo̱mo-to̱ m-'ya á. Shir wu̱ zo̱nge̱ ka be-to̱, remen ká ye̱ wu̱ daage̱ à.”

41 Bo̱ ye̱ ka ne̱n o̱p-ye̱ ho̱gu̱te̱ yo Yakubu ne̱ u̱n Yohana ko̱ne̱ à, ryaab-u̱s re̱e̱ru̱ ye̱. 42 Ye̱so agnu̱ru̱ yan-neke̱-mo̱ u̱n wu̱. Wu̱ ze̱e̱ru̱ ye̱, “No̱ nak ye̱ a nepse̱ u̱n gwo̱mo-to̱ u̱n to̱ ken dak-to̱ ne̱ à, ye̱ ro̱ u̱n kute̱ u̱n hun-ne̱ u̱r-be̱e̱b. 43 Amba no̱, a nom kaane̱ u̱n no̱ ne̱ á. Kap wu̱ co̱ne̱ wu̱ nom u̱t-go̱s be u̱n no̱ à, se̱ wu̱ waragte̱ ko-gu̱w no̱.* 10:42-43 Hyen komo: Ruka 22:25-26. 44 Ne̱t-wu̱ co̱ne̱ tomso wu̱ nom ko-Gwo̱mo no̱ à, wu̱a nome̱ ko̱ wu̱ ke ne̱t-wu̱ m-gu̱w.† 10:43-44 Hyen komo: Mati 23:11; Mark 9:35; Ruka 22:26. 45 Me̱ u̱n ze̱e̱ yo ka remen, me̱ Wà-wu̱ u̱n ne̱t, me̱ u̱n haan remen a nomu̱tú̱ me̱ m-gu̱w á. Me̱ u̱n haan u̱m nomu̱té̱ hun-ne̱ m-gu̱w, tomso u̱m ya'as ho̱o̱g re remen u̱m rurut hun-ne̱ de̱e̱n.”

46 Ye̱so u̱n yan-neke̱-mo̱ u̱n wu̱ ne̱ ye̱ co̱wu̱ru̱ u̱n bo̱-o̱ o-Jeriko. Ye̱ ro m-ru o-Jeriko u̱n yan-neke̱-mo̱ u̱n wu̱ ne̱ mo̱sse̱ u̱n mo̱o̱r-to̱ u̱n hun-ne̱ ne̱. Wu̱ ken ko-po̱-wu̱, wa u̱s-ko̱n, a wu̱ m-ze̱e̱ Bartimawus (wà Timawus) wu̱ ro tara n-riib u̱n co̱w. 47 Bo̱ wu̱ ho̱gu̱te̱ Ye̱so ko-ya-o-Nazaret-wu̱ à, wu̱ taknu̱ 'yons u̱s-co̱r. Wu̱ ze̱e̱ru̱, “Ye̱so, wà Dawuda, hyan 'wo̱n u̱n de, o gu me̱!”

48 Ye̱ ken ye̱ de̱e̱n ye̱ kangsu̱ru̱ wu̱, ye̱ ze̱e̱ru̱ wu̱, “Re̱s temb!”

Amba wu̱ dooru̱ 'yons u̱s-co̱r de̱e̱n. Wu̱ ze̱e̱ru̱, “Ye̱so, wà Dawuda, hyan 'wo̱n u̱n de, o gu me̱!”

49 Bo̱ Ye̱so ho̱ge̱ wu̱ à, wu̱ e̱su̱ru̱. Wu̱ ze̱e̱ru̱ hun-ne̱, “Agan no̱ wu̱.”

Ye̱ agnu̱ru̱ ko-po̱. Ye̱ ze̱e̱ru̱ wu̱, “Ho'os hur u̱n du sak. Wu̱ ro̱ wo̱ u̱s-eeg.” 50 Bo̱ wu̱ ho̱gu̱te̱ Ye̱so agbu̱te̱ wu̱ à, wu̱ joru̱ru̱ gund-o̱ u̱n wu̱, wu̱ inu̱ru̱ kagat, wu̱ neku̱ru̱ be-u̱r Ye̱so.

51 Ye̱so ze̱e̱ru̱ wu̱, “¿Ya o co̱ne̱ u̱m nomu̱ wo̱?”

Ka ko-po̱-wu̱ ze̱e̱ru̱, “Wan-yoos u̱n de, u̱m co̱no̱g o-hyan.”

52 Ye̱so ze̱e̱ru̱ wu̱, “Ka o̱. Ine̱ o neke̱ neke̱-m ru. She̱r-m ru upsu̱tu̱ wo̱ yish ru.” Ba u̱n naas o-da, wu̱ hyanu̱ru̱ cas cas. Wu̱ do̱ru̱ru̱ Ye̱so u̱n co̱w. Ye̱ argu̱ru̱ m-neke̱.