1 Maha Yasunaga talima piagaru iba Taiberiasa mini mende Galili angeni hearia Yasu ibuni ha pani halu ogodagua bini. 2 Saimono Pidabi Tomasa kai mini Hono Palu ibubi Galiliha Kaina tanoali Nadanele henegobi Sebedi igini kiralibi Yasunaga talima piaga kira mendebi ti mandagi hene.✡ Md 4.21, Yo 1.45-51, 20.24 3 Ti mandagi hearia Saimono Pidahanda tihondo lalu, I̱ wena minu porogo, lene.✡ Lg 5.5

Ani layagola tigua ibuhondo lalu, Ina haru ma, lene. Ani lowa ti iba taluni puwa mbiraga wena minalu hearia homa mbira mina nabi hene. 4 Egerebagiore ni dole tiga biyagola Yasu iba angeni íbu hearia ibunaga talima piaga biarume Yasu kalo manda nabi hene.✡ Yo 20.14 5 Yasuhanda tihondo lalu, Igiriru-o wena mbira minu ngamibe, lene.✡ Lg 24.41

Ani layagola tigua ladai bialu, Wena mbira naminuwiore, lene.

6 Ibugua tihondo lalu, Wena nu gi tigahayagi yupe harimiyagua wena minuleberami, lene. Tigua wena nu yupe halu hearia wena dewaore anda piyagola nu yamibe nahe hene.✡ Lg 5.4-7

7 Ani biyago hondowa talima piaga mbira Yasuhanda gubalini ho haga henegome Pidahondo lalu, O kagoni Anduane Homogoda, lene. Anduane Homogoda layago hale howa Pida ibunaga labolabo daliga biagane ala golo ngelenego mo bo bialu ibaha pora bialu Yasu hearia uba ede hene.✡ Md 14.29, Yo 13.23, 20.2 8 Talima piaga maru ti iba taluni howa nuha wena dewa anda piyago gililo yalu angeni uba ede hene. Ti iba angeni uba ede halu polenego kaundia ndo ge lunaga magi mida handari mbira (100) ale hangu wini. 9 Iba angeni iraga halu hearia ira pungane hihoailo deagoria wena mberediru hiriago de hendene. 10 Yasuhanda tihondo lalu, Wena minarimigo maru yalu ibidaba, lene.

11 Ani layagola Saimono Pida ibu puwa iba taluni howa wena nu yamuwa iba angeni gililo yalu ibini. Wena minayago timbuni dewaore daga handari mbirani pira duriani tebira (153) minini. Wena dewaore minayagome nu lere nalene.✡ Lg 5.6 12 Ani biyagola Yasuhanda tihondo lalu, Tomo nami̱ya ibidaba, lene. Ani layagola ibunaga talima piagaru tigua ibu Anduane Homogoore kagoni manda biai howa ti mbirame ibuhondo lalu, Í̠ ái kebe, nalene. 13 Yasuhanda mberedi dugu yalu ibuwa tihondo talebu migi bini. Wenabi anidagua dege bini.✡ Yo 6.11, Ab 10.41

14 Yasu ibu homalu heyu howa ibunaga talima piaga hearu hearia ha pani henego halu tebone ogoni.✡ Yo 20.19, 20.26

15 Tigua tomo nai howa Yasuhanda Saimono Pidahondo lalu, Yone igini Saimono-o í̠na o karume i̱hondo gubalini ho kagobi ndo í̠na i̱hondo gubalini timbuni ho kebe, lene.✡ Md 26.33, Yo 1.42

Ani layagola Pidahanda ladai bialu lalu, E̱ laro. Anduane Homogo-o i̱na í̠hondo gubalini ho kogo í̠ manda bide, lene.

Ani layagola Yasuhanda ibuhondo lalu, I̱naga nogo sibi iginiruhondo tomo mialu habe, lene.* Marume bi ogoni ogodagua gili bulene nga manda bini. Yone igini Saimono-o mbirale uruni í̠ gubalini ho kegobi ndo í̠na i̱hondo gubalini timbuni ho kebe, lene. 16 Ani lowa ibugua Pidahondo halu mende lalu, Yone igini Saimono-o í̠na i̱hondo gubalini ho kebe, lene.✡ Ab 20.28, Hi 13.20, 1 Pi 2.25

Ani layagola Pidahanda ibuhondo lalu, E̱ Anduane Homogo-o i̱na í̠hondo gubaliniore ho kogo í̠ manda bide, lene.

Ani layagola Yasuhanda ibuhondo lalu, I̱naga nogo sibiru haru habe, lene. 17 Ani lowa Yasuhanda ibuhondo halu tebone lalu, Yone igini Saimono-o í̠na i̱hondo gubalini ho kebe, lene.✡ Yo 13.38, 16.30

Ibugua ibuhondo halu tebone lalu, I̱hondo gubalini ho kebe, layago hale howa Pida ibu emene genda howa lalu, Anduane Homogo-o í̠ bibahende manda biai kego i̱na í̠hondo gubaliniore ho kogo manda bidegoni, lene.

Ani layagola Yasuhanda ibuhondo lalu, I̱naga nogo sibiru haru habe, lene. 18 Ani lowa lalu, I̱na í̠hondo heneneore laro. Í̠ igiri hongohe haringi í̠ninaga aga gambali buwa í̠ni poa biyagoha pu pebe bialu hari. Ai í̠ wahe harengi í̠naga gi dogo laregola mbiralime í̠naga gi minu huba bialu í̠ napoa kegoha haru polebira, lene.✡ Yo 13.36, Ab 12.3-4 19 Yasuhanda bi layadagoni Pida ibu ogonidagua bialu homalu Ngode Datagaliwabe mini mo yaraga holebira manda buwa lamini. Ani lowa Yasuhanda ibuhondo lalu, I̱ porodagua talima ibabe, lene.✡ Md 16.24-25, Mg 1.17, Yo 13.36, 2 Pi 1.14

20 Pida ibu beregedo handalu hearia Yasunaga talima piaga mbira Yasu ibu gubalini ho haga hene biago Pidanaga mbirahayagi hearia hendene. Bamba ti tomo dawa nole ngoai ho birayangi agali mbira Yasunaga galu hombeni palu paga howa ibuhondo lalu, Anduane Homogo í̠ aiwa nde lolebirabe, lenego o biago hearia hendene.✡ Yo 13.23-25, 20.2 21 Hondowa Pidahanda Yasuhondo lalu, Anduane Homogo-o agali ogo agua bulebirabe, lene.

22 Ani layagola Yasuhanda ibuhondo lalu, I̱ dai beroria ibu haabo helo hamelo koyagua nde agi. Í̠naga biabe ndo. Í̠na i̱ porodagua talima ibulene ngago ibabe, lene.✡ Md 16.27-28, 25.31, 1 Ko 4.5, Mo 22.7, 22.20

23 Ani lenego hale howa Yasu talima pialu hearume lalu, Ibunaga talima piaga ogoni nahomolebira laya, lalu hene. Yasuhanda, Ibu nahomolebira, nale. I̱ dai beroria ibu haabo helo hamelo koyagua nde agi. Í̠naga biabe ndo, lalu ogonidagua hangu lene.

24 Ogodagua biya ogodagua laya lalu talima piaga ogonime bebani bi gilibu ngago iname hondowa heneneore layadalo manda bu kama.✡ Yo 19.35, 3 Yo 12

25 Yasuhanda biabe tara tara dewaore binigo bibahende hangu hangu gilibu wiai kole dindi bibahendeha mbuga dewaore uruni wibe nakale manda bido.✡ Yo 20.30