3
Jesús Moisés baɨmo jamánomoidɨmɨe
1 Ie jira, cue ñue ámatɨaɨ, Juzíñamui uáidogamacɨ dɨbénemo jaɨnáidɨomoɨza, Jesumo izire comecɨ omoɨ facari; ua caɨ jeire oga ñúefue lluáɨbitagamɨemo ñue comecɨ omoɨ facari. Iemo nane Juzíñamui dɨbénemo caɨdo ñue úritɨmɨemo, mai íemo comecɨ omoɨ facari. 2 Bie Jesús íena daɨí mamédɨmɨe ocuica uaina jaca nágaruillaɨ ɨ́ɨnofɨrede; ua, jaiáidɨmɨe Moisés nana íemo llogáuaina jeire ófɨrena izói, afe izói bímɨe nana íemo ocuica uaina jeire ófɨrede. 3-4 Jae onódɨomoɨza naga jofo come niga; dama abɨna niñédeza. Mei íadɨ naga ráanɨaɨ fɨnódɨmɨe Juzíñamui. Iemo daje izói ja onódɨomoɨza, naga jofo niraɨma afe nigaco baɨmo ñúemɨeza. Afémɨemo jamánomo ñúefue jóonerede. Ie izói afe bie Jesús Moisés baɨmo ñúefuena nitáregamɨe, mei naga raa afémɨe comuítagaza; íemo jɨáɨ daje izói Juzíñamuimo caɨ jaɨnáinana Jesús comuítateza. 5 Ua, afe Moisés nana Juzíñamui íemo llogáuai, Juzíñamui dɨbénemo táɨjɨacadɨmɨe izói, aféuaina ñue jaɨ́cɨna Juzíñamui eneno nɨzeca Israel náɨraɨmo llotátate. Afe daɨí afémɨe ie méifodo bite llófuellɨfuemo uai nabáitate. 6 Mei íadɨ Cristo, jofona náamataga Jitó izói, nana ie anamo itɨ́nona ñue jaɨ́cɨna ocuíoide. (Afe daɨí Cristo Moisés báɨfene ímɨenaza onódɨcaɨ, mei naga jitó, jofo ero táɨjɨraɨma baɨmo itɨ́mɨenaza.) Iemona Cristo dáɨnana, caɨ ɨ́ɨnuafue ñue rɨire itɨ́fuedo are illa ɨ́coɨmo jeire caɨ oíadɨ, Juzíñamui comɨ́nɨdɨcaɨ. Afe llezica afémɨemo caɨmare caɨ úiñuana jitáirede.
Juzíñamui comɨnɨ comecɨ caɨmare uái illafue
7 Ie jira Juzíñamui Ñuera Joreño jaiai Cuegáuaido daɨde:
Birui Juzíñamui daɨnáuai omoɨ cacana llezica omoɨ comécɨaɨ rɨ́iretañeno iri.
8 Jaiai énɨe zaféredɨnodo Israel comɨnɨ facátaruimo afémacɨ íaɨoɨ comecɨ rɨire fɨ́nuano Juzíñamuina uáitatiaɨoɨ.
Jɨɨ, afe izói omoɨ iñeno iri, daɨde.
9 Iemo nane Juzíñamui daɨde:
Aféruillaɨdo jaiai omoɨ uzútɨaɨ Judíuaɨ cuemo ɨ́ɨnoñeno fɨeni facátafuedo cuena facátatiaɨoɨ.
Cuarenta dɨga fɨmónado nana íaɨoɨmo cue fɨnócafuiaɨna cɨódiaɨoɨ íadɨ, cuemo fɨeni comécɨidiaɨoɨ.
10 Ie jira afe bigɨma cuena rɨ́icaitade.
Afémacɨdo daɨdɨcue: “Iaɨoɨ comecɨ cuemo fɨgo jaɨnáiñenamona, cue lloga io onóñeno oni nɨbéfodo jáidɨnona itíaɨoɨ.”
11 Iemona áferi icɨ́rillano rɨírede uaido daɨdɨcue: “Jaca cue lloga caɨmare comécɨna uái ocózinaillana óñeitiaɨoɨ,” daɨdɨcue.
12 Amatɨaɨ, daje izói fɨgóñede, ñúefuena ɨáɨruiga ɨ́ɨnoñede comécɨmona mai abɨ́ omoɨ rairuiri, afe izói omoɨ íñeillena. Mei afe izóidɨmɨe caɨ caade Juzíñamuimona oni eneno jɨca íteza. 13 Mei íadɨ nágaruillaɨdo, Juzíñamui ómoɨna naɨ uáidua llezica, Juzíñamui dɨbénemo ñue rɨire jaɨnairi. Iemo danɨ ómoɨmona ñue lletari. Daɨí ñue omoɨ llóiri, fɨénidɨfue ie abɨ jɨ́fuiafuedo buna ómoɨmona dáamɨe comécɨna rɨíreiñellena. 14 Mei nanóidemona caɨmo ite izire ɨ́ɨnogafue, rɨire fáɨcanocaiñeno uáfuena caɨ onóiadɨ, jae Cristo dɨbénemo jaɨnáidɨnodɨcaɨ. Aféfuemo rairuíñeno ñue omoɨ jiéruiri.
15 Juzíñamui Cuegáuai daɨí daɨde:
Birui Juzíñamui daɨnáuaina omoɨ cacana llezica, jaiai Israel Juzíñamuina uáitajaruimo comecɨ rɨírena izói, omoɨ comecɨ rɨíretaneño iri.
16 ¿Bu mei afe Juzíñamui uai cacádɨno íadɨ, nane dáanomo íena uáitate? Mei nana Egíptomona Moisés baɨrócamacɨ Juzíñamuina uáitate. 17 ¿Mei nɨ́ɨmacɨ cuarenta dɨga fɨmona Juzíñamuina icɨ́ritate? Mei nana afe Juzíñamui uai ɨ́ɨnoñeno fɨeni fɨnódɨno; nɨɨ afémacɨ ícuruaɨ énɨe zaféredɨnomo fɨénocaiga. 18 ¿Nɨɨ náɨraɨna rɨírede uaido Juzíñamui daɨde: “Jaca cue lloga caɨmare comécɨna uái ocózinaillɨnomo dúcɨñeitɨomoɨ?” Mei nana afe ie uaina cacádɨnona íadɨ aféuaina jeire oñédɨnona daɨí daɨde. 19 Daɨí íaɨoɨna dáɨnana íaɨoɨ ɨ́ɨnoñenado jofo cáɨmanomo dúcɨnidiaɨoɨ. Ua daɨí ñúenomo íaɨoɨ dúcɨñenana onódɨcaɨ.