1 Cˀia⁴ ni⁴čhjin³-ve⁴ cjai¹nca³ coan³ncjin²ya³ cho⁴ta⁴-le⁴ Cristo. Je² cho⁴ta⁴ griegos cjai¹nca³ to⁴chˀao³ tsa³ca³tio²-le⁴con³ cho⁴ta⁴ hebreos nca³ je² ya¹nchjin¹-le⁴ xi³ je³cˀen³ xˀin⁴-le⁴ li²coi³ cˀoa⁴-sˀin² tsˀa³cao⁴-le⁴ je² tso³jmi² xi³ vˀa³vi¹-le⁴ nchaon³nchaon³.

2 Cˀia⁴ je² xi³ te³jao² pa²stro⁴ qui³nchja⁴ma³ña³-le⁴ nca³tsˀi³ cho⁴ta⁴-le⁴ Cristo, cˀoa⁴qui³tso²-le⁴: A³li²coi³ nta³ tjin¹ nca³ jin⁴-jin⁴ cˀoe¹jnai³⁴-jin⁴ je² en¹-le⁴ Ni³na¹ nca³ cˀoe¹yai³⁴-jin⁴ tˀa³ ya¹mi²xa⁴. 3 Chja⁴ˀa²jion³ xi²nquio⁴³, ˀnti¹ntsˀe³, ña³to³ cho⁴ta⁴xˀin⁴ xi³ ˀya³-le⁴ nca³ nta³ cho⁴ta⁴, xi³ cjai¹nca³ to⁴tjin¹jin³ ni⁴ma⁴-le⁴ je² Espíritu Santo, cˀoa⁴ xi³ tjin¹-le⁴ cjoa⁴ˀi³sen³-ta³con². Je² xi³ cˀoai⁴-le⁴² je² xa¹-vi⁴. 4 Jin⁴-jin⁴ to⁴jo³ cˀoe¹tsˀoa³ ntsjai²-ni¹⁴jin⁴, coa⁴co²ya³ ntsjai²-ni¹⁴jin⁴ en¹-le⁴ Ni³na¹. 5 Je² en¹ xi³ qui³tso² je² pa²stro⁴ cjai¹nca³ nta³ qui³sa³sen³-le⁴ nca³tsˀi³ cho⁴ta⁴-ve⁴. Cˀia⁴ tsa³cja³ˀa¹jin³ Esteban, jnco³ cho⁴ta⁴xˀin⁴ xi³ cjai¹nca³ nta³ ma³cjain¹-le⁴, cˀoa⁴ xi³ cjai¹nca³ to⁴tjin¹jin³ ni⁴ma⁴-le⁴ je² Espíritu Santo. Cˀoa⁴-ti⁴ tsa³cja³ˀa¹jin³ Felipe, Prócoro, Nicanor, Timón, Parmenas, cao⁴ Nicolás xi³ ja³ˀai³tˀa³-le⁴, xi³ ya⁴ Antioquía tsˀe⁴. 6 Je² xi³ ña³to³-ve⁴ tsa³qui³ncha³va³sen³ nqui³xcon⁴ pa²stro⁴. Je² pa²stro⁴ tsa³cˀe¹tsˀoa³ tsa³ca¹yo³son²-le⁴ ntsja³. 7 Cjai¹nca³ qui³son² je² en¹-le⁴ Nai³-na¹. Nˀion¹ coan³ncjin²ya³ cho⁴ta⁴-le⁴ ya⁴ Jerusalén. Cˀoa⁴-ti⁴ cjai¹nca³ ncjin² ma³-ni³ na⁴ˀmi³ xi³ cˀoa⁴-sˀin² coan³cjain¹-le⁴.

8 Je² Esteban cjai¹nca³ to⁴qui³sˀe³-le⁴ cjoa⁴nta³ cao⁴ nca³nˀion¹. A³li² to⁴cˀoa⁴cji³ cjoa⁴xcon¹ cˀoa⁴ choa⁴ xi³ qui³sˀin³ jin³-le⁴ cho⁴ta⁴. 9 Cˀia⁴ qui³sco²mi³tjen⁴ yao³-le⁴ cˀa³ cho⁴ta⁴ xi³ tsˀe⁴ ntˀia³ sinagoga-le⁴ cho⁴ta⁴ xi³ cˀoa⁴ˀmi²-le⁴ cho⁴ta⁴ntai¹, cao⁴ xi³ tsˀe⁴ cho⁴ta⁴ cireneos, cao⁴ xi³ tsˀe⁴ cho⁴ta⁴ alejandrinos, cao⁴ xi³ tsˀe⁴ Cilicia, cao⁴ xi³ tsˀe⁴ Asia. Tsa³cjao¹ti³ya³-ni³ cao⁴ je² Esteban. 10 To⁴nca³ li²coi³ coan³ tsa³ca³tio²ta²ja³-le⁴ je² cjoa⁴ˀi³sen³ta³con²-le⁴ cao⁴ je² Espíritu xi³ je² Esteban qui³nchja⁴ya³-ni³. 11 Cˀia⁴ qui³tso²ya³ˀma³ cˀa³ cho⁴ta⁴ xi³ cˀoa⁴coi⁴tso⁴ nca³ qui³nčhˀoe¹-le⁴ Esteban nca³ qui³nchja⁴ˀaon³-le⁴ Moisés cao⁴ Ni³na¹. 12 Qui³si³qui³so¹tjen⁴ cjoa⁴si³ jin³-le⁴ cho⁴ta⁴ na⁴xi⁴na³nta¹ cao⁴ cho⁴ta⁴jchi¹nca³ cao⁴ cho⁴ta⁴ scribano. Ji³cho²con³-le⁴, qui³tsoa³che¹. Ji³cho²cao⁴ ya⁴ jña³ nca³ tjio¹ cho⁴ta⁴ junta. 13 Cˀia⁴ tsa³ca³sen¹va³sen³-le⁴ testigos nti³so³ xi³ cˀoa⁴qui³tso²: Je² cho⁴ta⁴ xo⁴cji³-ve⁴ a³li²coi³ vˀe²jna³jyo¹ nca³ cˀoa⁴-sˀin² ti¹nchja⁴ˀaon³-le⁴ je² ˀnte³tsje³-vi⁴ cao⁴ je² cjoa⁴-te¹xo³ma³. 14 Qui³no²ˀya²-lai⁴jin⁴ nca³ cˀoa⁴qui³tso² nca³ je² Jesús xi³ Nazaret tsˀe⁴ si⁴²qui³xo¹ya³ je² ˀnte³-vi⁴, si⁴²cˀa³ntjai²ya³ je² cjoa⁴ xi³ nˀian² xi³ qui³tsjoa³-na¹ Moisés. 15 Cˀia⁴ je² nca³tsˀi³ cho⁴ta⁴junta qui³sco³ˀa² Esteban. Tsa³ve³ ncjain¹ jo³-ni³ xi³ tsˀe⁴ jnco³ a²ncje⁴.