1 Xihuicaca ica paquilistli para TOTECO imojuanti tlen initztoque xitlahuac iixpa.

Nelía yejyectzi para nochi tojuanti tlen tijchijtinemij tlen cuali ma tijhueyichihuaca.

2 Xitlatzotzonaca ica arpa para xijhueyichihuaca, TOTECO.

Xihuicaca iixpa huan xijpaquilismacaca ica tlatzotzonali tlen nesi queja guitarra.

3 Xijsencahuaca se huicatl tlen yancuic,

huan xijhuicatica TOTECO.

Xitlatzotzonaca cuali,

huan xitzajtzica ica paquilistli.

4 Pampa nelía xitlahuac nochi tlen quiijtohua TOTECO.

Nochi tlen quichihua tenextilía para temachtli.

5 TOTECO quipactía nochi tlen xitlahuac huan tlen melahuac.

Nochi tlen itztoque ipan tlaltepactli quiselíaj iteicnelilis TOTECO.

6 TOTECO tlanahuati ma onca elhuicactli huan mochijqui.

San camatqui huan mochijqui metztli, tonati huan nochi sitlalime.

7 Yajaya quisejcotili nochi atl tlen eltoc ipan hueyi atl.

Quiajcojqui nopa atl campa más tlahuejcatla.

8 Nochi intlaltepac ehuani xijhueyitlepanitaca TOTECO.

Quena, nochi tlen initztoque ipan ni tlaltepactli xiquimacasica.

9 Pampa nochi tlen yajaya quiijto,

ya nopa mochijqui.

Huan tlen yajaya tlanahuati ma eli,

ya nopa elqui.

10 TOTECO quinxolehuilía inintlalnamiquilis tlacame ipan campa hueli tlaltini para ma ax quichihuaca tlen fiero moilhuijtoque.

San tlailpitzas huan quincuapolos tlaltini para ax huelise quichihuase tlen fiero quisencajtoque quichihuase.

11 Pero tlen TOTECO moilhuijtoc quichihuas ax quema mopatlas.

Tlen ya quinequi,

ya nopa elis para nochipa.

12 Paquij tlacame ipan nopa tlali tlen motemachíaj ipan TOTECO.

Quena, nelía paquij nopa tlacame tlen TOTECO quintlapejpenijtoc para iaxcahua.

13 TOTECO tlen itztoc nepa elhuicac techhualtlachilijtoc nochi titlacame.

14 Hasta nepa ipan elhuicac TOTECO techtlachilijtoc tlen tiitztoque ipan ni tlaltepactli.

15 Yajaya TOTECO tlen techyolchijchijqui nochi titlaltepac ehuani huan techtlachilía nochi tlen tijchijtinemij.

16 Se hueyi tlanahuatijquetl ax tlatlani pampa quinpiya miyac isoldados.

Niyon se soldado tlen motemaca ax tlatlani pampa quipiya miyac fuerza.

17 Amo ximotemachi ipan se cahuayo para mitzmanahuis yonque nelía tetic.

San ica ifuerza ax hueli temanahuía.

18 Pero TOTECO, quena, yajaya nochipa techtlachilijtoc tojuanti tlen tiquimacasij tiquixpanose.

Techmocuitlahuía tlen timochiyaj ipan iteicnelilis.

19 Techmanahuía quema tiitztoque nechca miquistli.

Huan techtlamacas quema oncas mayantli para noja ma tiitztoca.

20 Tojuanti ipan toyoltzi timotemachíaj ipan TOTECO.

Yajaya techpalehuía huan techmanahuía ica tlen ax cuali.

21 Yeca ma tiyolpaquica ipan TOTECO,

pampa timoneltemachijtoque ipan yajaya tlen nelía tlatzejtzeloltic.

22 TOTECO, xijpiya moyolo tohuaya,

pampa san ipan ta timochiyaj.