1 ई मातगोळ्द बाद्दा यीशु गलील इन झील* ६:१ झील इन मतलब धोळ क्यार्रा हुन मतलब तिबिरियास इन झील इन आप्पाटी होदुन. 2 अदिक ऊंद धोळ्द भीळ आऊन हिंद आगेत यतिकी जो आश्चर्यकर्म आव बिमारगोळ मा तोर्सतोगोन आंदुर अवरी नोळतोगोर. 3 आग यीशु पहाळी मा येरकु तान चेलागोळ सांगुळ अल कुरतोदुन. 4 यहूदीगोळ्द फसह अन हाब्ब हात्‍ती ईरोद. 5 याग यीशु तान कण्णगोळी नेगुकु ऊंद धोळ्द भीळ इक तान हात्‍ती बर्त नोळदुन, रा फिलिप्पुस से अंदुन, “नाव इंदुर भोजन इन साटी यल टु रोट्टी कोंडकु तंदेव?” 6 आव ईद मात आऊक परखुसोर साटी अंदुन, यतिकी आव खुद जानसोन कि आव येन माळ्यान. 7 फिलिप्पुस आऊक उत्‍तर कोट्टुन, “येढ्ढ सौ दीनार इन रोट्टी भी आंदुर साटी पुरा आगतीदील कि आंदुर दा टु हर ऊंद इक थ्वाळा-थ्वाळा सिक्‍केगुल.” 8 आऊन चेलागोळ दा टु शमौन पतरस उन वार्ट अन्द्रियास आऊन से अंदुन, 9 “ईल ऊंद पार आन यार हात्‍ती जवारी इन अईद रोट्टी अदिक येढ्ढ मेनगोळ आव; लेकीन ईस लॉकुर साटी अव येन आव?” 10 यीशु अंदुन, “लॉकुरी कुर्स बुळी.” आ जागा दा हापाळ काड्डा ईरोद: आग लॉकुर यारदा गंळ्सुर्द संख्या लगभग अईद हजार इन ईरोद, कुरतोदुर. 11 आग यीशु रोट्टीगोळी हुळदुन, अदिक धन्यवाद माळकु कुरावाळेर इक वाट्स बुटुन; अदिक हांग अच मेनगोळ दा टु यास आंदुर चाहासोर वाट्स बुटुन. 12 याग आंदुर तिनकु संतुष्ट आगेदुर रा आव तान चेलागोळ से अंदुन, “मिक्‍कु तुकळागोळी जमा माळबुळी कि येनु भिटकु आगबाळुल.” 13 इदुरसाटी आंदुर जमा माळदुर, अदिक जवारी इन अईद रोट्टीगोळ तुकळागोळ से जो तिनावाळेर ऊळोर, हन्नेळ फुट्टी तुमदव. 14 आग जो आश्चर्यकर्म आव माळकु तोर्सदुन अदरी आ लॉकुर नोळकु अनली कुरतुर, “आव भविष्यवक्ता जो दुनिया दा बरावाळा ईरोन निश्चय ईवा हुन.” 15 यीशु ईद जान्सकु कि आंदुर नानी राजा माळोर साटी हुडोद चाहासतार, बाक पहाळी मा आबना ओळेदुन.

16 याग द्याव मुळ्कत, रा यीशु उन चेलागोळ झील इन किनारा मा होदुर, 17 अदिक ड्वांगा मा येरकु झील इन आप्पाटी कफरनहूम इक होगली कुरतुर. आ समय अंधार आगेगीत, अदिक यीशु ईगासताका आंदुर हात्‍ती ईला बंदीदुन. 18 आँधी अन कारण झील दा लयरगोळ येळली कुरतव. 19 याग आंदुर केई केई अईद-आर कोस इन लगभग होटोदुर, रा आंदुर यीशु उक झील मा नळुत अदिक ड्वांगा अन हात्‍ती बर्त नोळदुर, अदिक अंजेदुर. 20 लेकीन आव आंदुर से अंदुन, “ना हुईन; अंजबाळी.” 21 इदुरसाटी आंदुर आऊक ड्वांगा मा येरसोर साटी तयार आदुर अदिक तुरन्त अद ड्वांगा आ जागा मा पोहचुसेत यल आंदुर होगोर.

22 दुसरा दिशी आ भीळ, जो झील इन आप्पाटी निदुरकु ईरोद, ईद नोळदुर कि ईल ऊंद इक बिटकु अदिक यातोदु ड्वांगा ईला ईरोद; अदिक यीशु तान चेलागोळ सांगुळ आ ड्वांगा मा ईला येरीदुन, लेकीन सिर्फ आऊन चेलागोळ अच होगीदुर. 23 आग हापाळ ड्वांगागोळ तिबिरियास टु आ जागा अन हात्‍ती बंदव, यल आंदुर प्रभु उक धन्यवाद माळदुर बाद्दा रोट्टी तिंदीदुर. 24 इदुरसाटी याग भीळ नोळ्त कि ईल ना यीशु आन अदिक ना आऊन चेलागोळ, रा आंदुर भी ड्वांगागोळ मा येरकु यीशु उक ढुंढ्सतेला कफरनहूम पोहचुसदुर.

25 झील इन आप्पाटी याग लॉकुर्द भीळ यीशु से सिकदुर रा अंदुर, “हे गुरु, नी ईल याग बंद?” 26 यीशु आंदरी उत्‍तर कोट्टुन, “ना नीम से खरा खरा अनतीन, नीव नानी इदुरसाटी ढुंढसालीर कि नीव आश्चर्यकर्म नोळदीर, लेकीन इदुरसाटी कि नीव रोट्टीगोळी तिनकु संतुष्ट आदीर. 27 नाशवान भोजन इन साटी मेहनत माळबाळी, लेकीन आ भोजन इन साटी जो अनन्त जीवन ताका ठहरूसतद, यारी मंळसा अन पार नीमी कोट्टान; यतिकी आप्प मतलब परमेश्वर अदुर मा छाप हच्यान.” 28 आंदुर आऊन से अंदुर, “परमेश्वर उन क्याल्सा माळोर साटी नाव येन माळेव?” 29 यीशु आंदरी उत्‍तर कोट्टुन, “परमेश्वर उन क्याल्सा ईद आद कि नीव आऊन मा विश्वास माळी, यारी आव कळ्यान.” 30 आग आंदुर आऊन से अंदुर, “बाक नी यातोद चमत्कार तोर्सत्या कि नाव अदरी नोळकु नीन विश्वास माळेव? नी यातोद क्याल्सा तोर्सत्या?” 31 नाम आप्प दादागोळ आळी दा मन्ना तिंदुर; ह्यांग लिख्सकु आद, “आव आंदरी तिनोर साटी स्वर्ग टु रोट्टी कोट्टुन.” 32 यीशु आंदुर से अंदुन, “ना नीम से खरा खरा अनतीन कि मूसा नीमी अद रोट्टी स्वर्ग टु कोटीदील, लेकीन नान आप्प नीमी खरा रोट्टी स्वर्ग टु कोळतान. 33 यतिकी परमेश्वर उन रोट्टी अदा हुन जो स्वर्ग टु ईळुकु दुनिया अक जीवन कोळतद.” 34 आग आंदुर आऊन से अंदुर, “हे प्रभु, ईद रोट्टी नामी हमेशा कोळतेला ईर.”

35 यीशु आंदुर से अंदुन, “जीवन इन रोट्टी ना हुईन: जो नान हात्‍ती बरतान आव यागलु उपासा ईरतीदील, अदिक जो नान मा विश्वास माळतान आव यागलु प्यासा ईरतीदील. 36 लेकीन ना नीम से अंदिदीन कि नीव नानी नोळ भी कोंडीर तरी विश्वास माळालीर. 37 जो येनारा आप्प नानी कोळतान अद सप्पा नान हात्‍ती बंदीत, अदिक जो यावारा नान हात्‍ती बंदान आऊक ना यागलु तेगुतिदील. 38 यतिकी ना तान इच्छा ईला लेकीन तान कळावाळा अन्द इच्छा पुरा माळोर साटी स्वर्ग टु ईळदीन; 39 अदिक नान कळावाळा अन इच्छा ईद आद कि जो येनारा आव नानी कोटान, अदुर दा टु ना येनारा खोऊसालीन, लेकीन आऊक आखरी दिशी बाक जित्‍ता माळाईन. 40 यतिकी नान आप्प उन इच्छा ईद आद कि जो यावारा पार उक नोळुल अदिक आऊन मा विश्वास माळुल, आऊक अनन्त जीवन सिक्‍कीत; अदिक ना आऊक आखरी दिशी बाक जित्‍ता माळाईन.” 41 “इदुरसाटी यहूदी लॉकुर आऊन मा कुळकुळ्सली हतदुर, यतिकी आव अंदिदुन, जो रोट्टी स्वर्ग टु ईळुत, अद ना हुईन.” 42 अदिक आंदुर अंदुर, “येन ईव यूसुफ उन पार यीशु आल्लच, यार मोय-आप्प उक नाव अरूतेव? रा आव ह्यांग अनतान कि ना स्वर्ग टु ईळदीन?” 43 यीशु आंदरी उत्‍तर कोट्टुन, आपस दा कुळकुळुसबाळी. 44 याऊ नान हात्‍ती बर सकालुन यागासताका आप्प, याव नानी कळ्यान, आऊक जेडु कोमालुन; अदिक ना आऊक आखरी दिशी बाक जित्‍ता माळाईन. 45 भविष्यवक्तागोळ्द लेखगोळ दा ईद लिख्सकु आद: “† ६:४५ यशायाह ५४:१३ आंदुर सप्पा परमेश्वर उन दी टु कल्सकु ईत्‍तार.” जो यावारा आप्प से केळ्यान अदिक कलतान, आव नान हात्‍ती बरतान. 46 ईद ईला कि यावारा आप्प उक नोळ्यान; लेकीन जो परमेश्वर उन दी टु आन, सिर्फ आवा आप्प उक नोळ्यान. 47 “ना नीम से खरा खरा अनतीन कि जो यावारा विश्वास माळतान, अनन्त जीवन आऊंदा हुन. 48 जीवन इन रोट्टी ना हुईन. 49 नीम आप्प दादागोळ आळी दा मन्ना तिंदुर लेकीन आंदुर सोतोदुर. 50 लेकीन ईद अद रोट्टी हुन जो स्वर्ग टु ईळुतद ताकी मंळसा अदरी तिनुल अदिक सायबाळुल. 51 जीवन इन रोट्टी जो स्वर्ग टु ईळुत, ना हुईन. अगर यावारा ईद रोट्टी दा टु तिंदान, रा सदा जित्‍ता ईत्‍तान; अदिक जो रोट्टी ना दुनिया अक जित्‍ता ईरोरसाटी कोळाईन, अद नान मय हुन.”

52 इदुर मा यहूदी ईद अनकु आपस दा झगळा माळली कुरतुर, “ईव मंळसा ह्यांग नामी तान मय तिनली कोळ सकतान?” 53 यीशु आंदुर से अंदुन, “ना नीम से खरा खरा अनतीन कि यागासताका नीव मंळसा अन पार उन मय तिनालीर, अदिक आऊन खुन कुडालीर, नीम दा जीवन हैलेच. 54 जो नान मास तिनतान अदिक नान खुन कुडुतान, अनन्त जीवन आऊंदा आद; अदिक ना आऊक आखरी दिशी बाक जित्‍ता माळाईन. 55 यतिकी नान मास सही दा तिनोद चिज हुन, अदिक नान खुन सही दा कुडोद चिज हुन. 56 जो नान मास तिनतान अदिक नान खुन कुडुतान आव नान दा संची बन्सकु ईरतान, अदिक ना आऊन दा. 57 ह्यांग जित्‍ता आप्प नानी कळ्यान, अदिक ना आप्प उन कारण जित्‍ता आईन, हांगा आव भी जो नानी तिंदान नान कारण जित्‍ता ईत्‍तान. 58 जो रोट्टी स्वर्ग टु ईळुत अदा हुन, आ रोट्टी अन घाई यारी आप्प दादागोळ तिंदुर अदिक सोतोदुर; जो यावारा ईद रोट्टी तिंदान, आव सदा जित्‍ता ईत्‍तान.” 59 ई मातगोळी आव कफरनहूम इन ऊंद यहूदी लॉकुर्द सभागृह दा उपदेश कोळाहोती अंदुन.

60 यीशु उन चेलागोळ दा टु हापाळ मुंदुर ईद केळकु अंदुर, “ईद कठोर मात आद; इदरी याव केळ सकतान?” 61 यीशु तान मन दा ईद जान्सकु कि नान चेलागोळ आपस दा ईद मात मा कुळकुळुसतार, आंदुर से केळदुन, “येन ईद मात देल नीमी ठोकर हततद? 62 अगर नीव मंळसा अन पार उक येल आव पयले ईरोन, अल म्याकुच होग्त नोळीर, रा येन आदीत? 63 आत्मा रा जीवनदायक आद, मय देल येनु लाभ हैलेच; जो मातगोळी ना नीम से अंदीन अव आत्मा हु, अदिक जीवन भी हुन. 64 लेकीन नीम दा टु येनारा हिंग आर जो विश्वास माळालुर.” यतिकी यीशु पयले टु अच जानसोन कि जो विश्वास माळालुर, आंदुर यार उर; अदिक याव नानी हुळसुस्यान. 65 अदिक आव अंदुन, “इदुर्दा साटी ना नीम से अंदिदीन कि यागासताका यारीकारा आप्प उन दी टु ईद वरदान कोटकु आगाल्द आगासताका आव नान हात्‍ती बर सकालुन.”

66 इदुर मा आऊन चेलागोळ दा टु हापाळ मुंदुर वापस आगेदुर अदिक अदुर बाद्दा आऊन सांगुळ होगीदील. 67 आग यीशु आ हन्नेळ चेलागोळी अंदुन, “येन नीव भी होगोद चाहासतीर?” 68  ✡ ६:६८ मत्ती १६:१६; मरकुस ८:२९; लूका ९:२०शमौन पतरस आऊक उत्‍तर कोट्टुन, “हे प्रभु, नाव यार हाती होदेव? अनन्त जीवन इन मातगोळ रा नींद अच हाती आव; 69 अदिक नाव विश्वास माळदेव अदिक जान्स कोंडेव कि परमेश्वर उन पवित्र जन नीना हुय.” 70 यीशु आंदरी उत्‍तर कोट्टुन, “येन ना नीव हन्नेळ मुंदरी नीवळुसीदील? तरी नीम दा टु ऊंद मंळसा शैतान आन.” 71 ईद आव शमौन इस्करियोती इन पार यहूदा अन बारा दा अंदिदुन, यतिकी आवा जो हन्नेळ चेलागोळ दा टु ऊंद ईरोन, आऊक हुळसुसोद ईरोद.