1 Beta, toke tjaahie djaane ke kie Kriest ke laute se pahiele bahoet kharaab tem aaiga. 2 Manai logan khaalie apane ke sotjiega aur paisa ke haahie rahiega. Oelog apane ke barwargie kariega, ghamandie rahiega, aur Parmeswar aur manai log ke bedjatie kariega. Oelog aapan maai-baap ke baat na soeniega, koi ke dhanbaad na deiga aur Parmeswar ke tanko na maaniega. 3 Oelog doesare ke prem na kariega aur aapan baat na poera kariega. Oelog doesare ke niendara kariega aur apane ke na samhaar sakiega. Oesab baat na soeniega aur oelogke na attjha lagiega barhia se rahe ke. 4 Oelog doesare ke dhokha deiga aur be-phiekier rahiega. Oelog apane ke bara biesaal samdjhiega. Oelogke maudj manaawe ke bahoet attjha lagiega, bakie oesab Parmeswar ke na pjaar kare hai. 5 Oelog bieswaasie ghat batiaaiga, bakie aapan tjaal-tjalan se dekhaaiga kie oesab Parmeswar ke saktie me na bieswaas kare hai. Aisan manai log se doer rahiehe.

6 Oelog me se koetjh log doesare ke ghar me ghoeske bhoettjar aurat logan ke aapan bas me kar lewe hai. Ie aurat log djaan-boedjhke boeraai me doebal hai. 7 Oesab hardam maange hai siekhaawe waalan ke baat siekhe, bakie Parmeswar ke sattjaai na apanaawe hai. 8 Djaise Janas aur Jambares Parmeswar ke sattjaai par moeh tjalaawat raha aur aisane Mosas ke doesman hoi gail, oisane ie kharaab siekhaawe waalan Parmeswar ke doesman hai. Oelogke samadjh ekdam biegaral hai aur oelogke bieswaas be-kaamiel hai. 9 Bakie oelog na dher dien manai logan ke dhokha dei paai. Djaise Janas aur Jambares ke boeraai halieje dekhaai gail, oisane oelogke paagalpan bhie dekhaaiga.

10 Bakie toe hamaar siektjha aur tjaal-tjalan par thiek se dhiaan lagaile hai. Toe djaane hai kie ham kaun tjiedj maangiela kare aur kie hamme bieswaas, dhieradj, prem aur hiemmat hai. 11 Toe bhie dekhle hai kaise oesab hamme sataais hai aur ham Antiokia, Iekoniam aur Liestra sahar me ketana doekh oethailie hai. Bakie Prabhoe hamme ie sab moesiebat me se batjaais hai. 12 Aise hai kie har ek djaun Kriest Jiesoe me saamiel hai aur Parmeswar ke rasta par tjale hai, oe sataawal djaai. 13 Bakie kharaab manai aur dhokhaabaadj log doesare ke bahakaawe hai, apane bhie dhokha kha hai aur auro biegarte djaai.

14 Beta, toe hamaar baat siekhle hai aur diel bhar se bieswaas kare hai. Toe djaane hai ke toke siekhaais hai, ohie se ie baat pakarle rahiehe. 15 Toe tjhotahie se Parmeswar ke pawietr baat siekhle hai. Toke ekare dwaara boeddhie mielal hai kaise toe Kriest Jiesoe me bieswaas kare ke dwaara batj djaai sakiehe. 16 Parmeswar aapan poestak liekhwaais hai aur ekar har ek baat kaamiel hai siekhaawe, samdjhaawe, oelta sotj-bietjaar badale aur soedhaare khaatien, 17 djeme Parmeswar ke bieswaasie logan poera howe aur tajaar rahe har ek rakam bhala kaam kare ke.