1 पया उंद लेङु मंदिरतग्डाहि एळुङ देवतुल्किन जोरते इद्रम वेहतनद नना केंजतन: “अन्ह्‌ट! एळुङ कसलानगा मनदनद देवुळता ओङतुन बूमतगा वळसीम्ह्‌टु” इनजोर इता. 2 इतस्के मुनेता देवतुलि अनजि, तना कसलातुन बूमतगा वळता. वळतस्के, जन्वरता सीनातुन कीतोरिह्‌क ओसो ताना बोमातुन मोळ्कतोरिह्‌क कूतव बोटाङ पेसताङ.

3 दुस्रा देवतुलि तना कसलातुन सम्दुरतगा वळता. वळतस्के अग्डा एग़ु डोलतोग़ मन्कना नेतुरता लेह्‌का आता. आताह्‌कु एताङ सबे जन्वर्क डोलताङ.

4 मूंड नंबरता देवतुलि तना कसलातुन बेरेह्‌कनगा ओसो एताङ कनिर्क पेसनगा वळता. वळतस्के अग्डा एग़ नेतुर आता. 5 आताह्‌कु पूरा एता पोग़ोन अदिकर मनदनद देवतुलि देवुळतुन इता, “ए पवित्रतोनिन! इंजेके मनवानिन! मुनेताहि मतोनिन, निटम देवुळतिन! निमा नेयम कीयना देवुळतिन! निमा इविस्कना नेयम कीतिन. 6 नीवा पवित्र मन्कलोरिन ओसो नीवा कबुरतोरिन लाग्वोर मन्कलोर हव्कतोर. ओरा नेतुर पोहतोर. अदिनेनाह्‌क एतुन नेतुर आनाह कीतिन. ओर लाग्वोर मन्कलोर नेतुरतुने उंडनाह कीतिन. ओर इद्रमताय सिक्सा दोर्कना लायक मन्ह्‌तोर,” इनजोर इता. 7 अचोटेन दूपम उर्न्जनद जागाताहि उंद लेङ इद्रम वेहतनद नना केंजतन: “इंगो! सामि, देवुळतिन, बेरा लावतोनिन! नीवा नेयम बेसतल ओसो निटमता मन्ह्‌ता,” इनजोर अद लेङ इता.

8 पया नालुङ नंबरता देवतुलि तना कसलातुन पोळ्दतगा वळता. वळतस्के मन्कलोरिन किस दग्डा लेह्‌काडा कांकाते तिपल कीयलाहि पोळ्दतुह्‌क अदिकर दोर्कता. 9 पकाय कांकाते मन्कलोर तिपल आंदुर ओसो इव बेराङ पीळाना पोग़ोन अदिकर मनदनद देवुळतुन उस्कना-पास्कना कींदुर. मति तमा पापमता अग़दाहि मलवोर, अहे देवुळतुन मान ईस मोळ्कोर.

10 एयुङ नंबरता देवतुलि तना कसलातुन जन्‍वरता कुर्सितगा वळता. वळतस्के ताना राजेमते ईकळ पोयता. पोयताह्‌कु मन्कलोर पकाय सिक्सा आसि मंटातुह्‌क तमाङ वेंजेह्‌किन कस्किंदुर. 11 तमा मंटातेनाह्‌क ओसो तमाङ बोटानेनाह्‌क देवुळतुन उस्कना-पास्कना कीतोर. मति तमा पापमता अग़दाहि मलवोर.

12 पया आरुङ नंबरता देवतुलि तना कसलातुन परात इनदनद बेरा बेरेटगा वळता. वळतस्के अद बेरेग़ इळ्कता. इळ्कताह्‌कु पोळ्द पेसना बाजेतेहनोर राजालोरिह्‌क तमाङ सीपय्किन पोस वायलाह अग़ दोर्कता. ओरिह्‌क अग़ दोर्कि इनजोर अद देवतुलि बेरेग़तुन इळ्कनाह कीता.

13 अचोटेने नना ऊळतन: मासुंडता तोडटाहि,✡ 16:13 तोहचीतव पोल्‍लोङ 12:3 जन्वरता तोडटाहि,✡ 16:13 तोहचीतव पोल्‍लोङ 13:1-10 जोल कबुरतोना✡ 16:13 तोहचीतव पोल्‍लोङ 13:11-18 तोडटाहि मूंड देयह्‌क पेसताङ. अव देयह्‌क पंडेन लेह्‌का दिसताङ. 14 अव देयह्‌किह्‌क बामिह कीयनव सीनाङ तोहतनद लाव मता. अव देयह्‌क लळयतेनाह्‌क पूरा बूमतोर राजालोरिन जमा कीयलाह पेसताङ. अद लळयि, बेरा लावता देवुळि पूरा बूमतोरिन नेयम कीयनद दियातस्के आस्ता. 15 सामि इद्रम वेहतलाह आता “ऊळाट! मन्कलोर पुनवस्के कले वायना लेह्‌कान नना वायकन. बोर-बोर उसरते मनजि, तमाङ गेंदेङ तयर कीस तासिह्‌तोर, ओर देय्वातोरु. अद्रम मनवेके, लजा वानाह कूळलिय ताकमुळ आयग़ा,” इनजोर सामि वेहतलाह आता. 16 पया अव देयह्‌क, ओर राजालोरिन, इब्रि बासाते अर-मगिदोन इनदनद जागातगा तताङ.* 16:16 हर-मगिदोन जागा इतेके मगिदो इनदनद मेटा.

17 पया एळुङ नंबरता देवतुलि तना कसलातुन मोयुदगा वळता. वळतस्के मंदिरतग्डा देवुळता राजकुर्सिताहि उंद लेङ जोरते इद्रम पेसता: “इंजेके नना पूरा कबळतुन मारिह कीतन,” इनजोर इता. 18 अचोटेने मिळ्स्कता, नेकता, गुंळ्जता, बूमि पकाय गल्जता. मन्कलोर बूमतगा मनदलाह आतोर, अस्केडाहि इचोन पका बेस्केन गल्जवा मता. 19 बूमि गल्जतस्के बेरा सहर† 16:19 इद येरुसलेम सहर इलवेके बेबिलोन सहर. मूंड तुक्ळेङ आता. दुस्राङ जातिनोराङ सहर्क पूरा बूळेम आताङ. पूला अंगुर जोमातुन बट्‌कितगा दोसिसि ऊहतना लेह्‌का, बेरा बेबिलोन सहरता पोग़ोन पकाय ओङ आसि, सिक्सा ईयलाह देवुळि सीता कीता. 20 अस्के सम्दुरता नडुम मनदनव सबे तोग़िङ ओसो मेटाङ मायताङ. 21 ओसो पोग़ोटाहि रेंड वीसाङ किलोना इचोटाङ आदुर बंडाङ मन्कलोरा पोग़ोन अरताङ. आदुर्कनेनाह मन्कलोर पकाय तिपल आतोर. अदिनेनाह्‌क आदुर्क अरताह्‌कु मन्कलोर देवुळतुन उस्कना-पास्कना कीतोर.