1 अद्रमलेह्‌काने पया एयुङ नंबरता देवतुलि तना अकुम ऊरता. ऊरतस्के उंद उका पोग़ोटाहि बूमतगा अरतद ऊळतन. अद उकातुह्‌क हानादीप बोंदाता तालम कय ईतद मता. 2 अद तालम कयदे हानादीप बोंदातुन तेग़ियता. तेग़यतस्के बेरा इट्‌केबटटाहि पेसना लेह्‌का पका पोया पेसता. अद हानादीप बोंदाता पोया उंडिसि पोळ्दता वेह्‌चतुन मुचता. अदिह्‌क पूरा ईकळ आता. 3 अद उंडुलताहि वेल्‍लाङे पापेङ पेसिस बूमतगा वाताङ. मिचो कोळ्हतप लेह्‌कान कोळ्हतलाहि देवुळि अविस्किह्‌क लाव ईता. 4 ओसो अविस्‍किन इद्रम इता: “मीट रोंडातुन, पोर्हकन, मराकिन बूळे केमाट; मति बोराङ मुंजिनगा देवुळता सीना इले, ओरिन कोळ्हाट,” इनजोर वेहता. 5 ओसो इद्रम इता, “मीट ओरिन हव्कमाट; मति एयुङ नेलाङ आनाह पकाय अळसिह कीम्ह्‌टु,” इता. मिचो मन्कन कोळ्हतस्के अळयना लेह्‌कान अव पापेङ कोळ्हतस्के अळयनुर. 6 अस्के मन्कलोर हामुरतुन पर्ह्‌कनुर; मति ओरिह्‌क हामुर दोर्को आयग़ा. ओर डोललाह विचर कीयनुर; मति डोल पग़वोर आयनुर.

7 लळयतेनाह्‌क तयर कीतव कोडाना लेह्‌कान अव पापेङ दिसिंदुङ. अविस्कनाङ तलानगा बंगरताङ राजटोपिना लेह्‌कान मताङ. ओसो अविस्कनाङ मोकाह्‌कु मन्कलोराङ मोकाह्‌कना लेह्‌कान मताङ. 8 अविस्कनाङ केल्‍कु आस्कनाङ केल्‍कना लेह्‌कान मताङ. ओसो अविस्कनाङ पल्‍कु डुवस्कनाङ पल्‍कना लेह्‌कान मताङ. 9 अविस्कनाङ अर्युल्कनगा कचताङ जगाना लेह्‌का मताङ. ओसो अव पापेङ पग़यिह्‌पा, वेल्‍लाङे कोडा गाडाङ लळयतस्के नेकतप लेह्‌कान नेकिंदुङ. 10 अविस्कनाङ तोकाङ मिचो तोकाना लेह्‌कान मताङ. अव तोकानगा काटाङ मताङ. मन्कलोरिन एयुङ नेलाङ आनाह अळसिह कीयलाहि अविस्किह्‌क अदिकर दोर्किस मता. 11 अविस्‍कना उंद राजाल मता. अद देयह्‌कना मुक्याना कबुरतद आंदु. अद हानादीप बोंदातुन ऊळेवाळे कीयनद मता. इब्रि जाततोरा बासाते ताना पेदिर अबदोन इनजोर मता, अहे युनानि जाततोरा बासाते अपुलयोन इनजोर मता. (इव रेंड आस पेदिर्कना अर्तमि बूळे कीयनद इनजोर आस्ता.) 12 इद मुनेता पीळा मारता, ताना पया ओसो रेंड बेराङ पीळाङ वायना मन्ह्‌ताङ.

13 आरुङ नंबरता देवतुलि तना अकुम ऊरता. ऊरतस्के देवुळता मुनेह मतद बंगरता दूपम उर्न्जनद जागाताङ नालुङ कोहकनग्डाहि उंद लेङ केंज वाता. 14 अद लेङु आरुङ नंबरतद देवतुलतुन इद्रम इता: “देवुळि नालुङ देवतुल्किन बेरा परात इनदनद बेरेटगा दोहता, अविस्किन निमा विळ्सिस ईम,” इता. 15 अदे वर्सा, अदे नेला, अदे दिया, अदे गट्‌कातेनाह्‌क देवुळि अविस्किन तयर कीस मता. इंजेके मूंड तूस्कनग्डाहि उंद तूस मन्कलोरिन हव्कलाहि आरुङ नंबरता देवतुलि अविस्किन विळ्सिसीता.

16 पया कोडाना पोग़ोन उदिस मतोरिन नना ऊळतन, अव पूरा कोडाङ वीसा कोटिङ मताङ. अविस्कना लेकातुन बोग़ो नाक वेहतनद केंजतन. 17 कोडाङ ओसो अविस्कनगा उदिस मतोरिन नना लेकाते ऊळिह्‌पा, अव नाक इद्रम दिसताङ: कोडानगा उदतोर अर्युलतगा कचता जगा केग़्स मतोर, अव जगाङ किस लेह्‌का कमकल मताङ, डुंगा पंडटा रंग लेह्‌का मताङ, किसतळ्मिना लेह्‌का एरल मताङ. अव कोडानाङ तलाङ डुवलता तला लेह्‌का मताङ, अविस्कनाङ तोडिनाहि किसु, पोया ओसो किसतळ्मिङ पेसिंदुङ. 18 अविस्कनाङ तोडिनाहि पेसनद किसु, पोया, किसतळ्मिङ, इवु मन्कलोरिन हव्कनव मूंड पीळाङ मताङ. अव पीळाने मूंड तूस्कनग्डाहि उंद तूस मन्कलोर डोलतोर. 19 अव कोडाना लावु अविस्कनाङ तोडिनगा, तोकानगा मता. ओसो अविस्कनाङ तोकाङ तरस्कनाङ तलाना लेह्‌का मताङ, अवटे अवु मन्कलोरिन तिपल कींदुङ. 20 इव मूंड आस पीळाने डोलवालेवा पिसतोर मन्कलोरु, इचोन तिपल आस तेला तमा पापमता अग़दाहि मलवोर. ओर देयह्‌किन, बंगरते, वेंडिते, इतुळते, बंडाने पंडटव बोमान मोळ्कसोरेन अंदुर. अव बोमाङ इतेके तोवया पग़वोङ, वेंदा पग़वोङ, ताक पग़वोङ. 21 अहे ओसो मन्कलोरिन हव्कना, ओदेङ पंडना, साट्याल कीयना, कले कीयना, इव कबस्कनाहि ओर मुर्तिय मलवोर.