1-2 अस्‍के पया येसु माक कग़यवालोरिन ओसो मुडुन इतोग़, “सास्‍त्रमगूरुर ओसो परुसिर वेरिह्‌कु मोसानाङ अडोङ काग़्हतनद अदिकर मन्ह्‌ता. 3 अदिनेनाह्‌क ओरु मीक बाताङ-बाताङ वेहतनुर, अव सबे पोल्‍लोनु मीट माळाटु, नोमाटु, मति ओर कीतप मीट बह केमाटु, बह इतेके ओर सिरप लोकुरिह्‌के वेहतह्‌तोर, मति तमा इतेके अह तिरियोर आस्‍तोर. 4 वेर वेहतव अडोङ मीक पका बेरा मोतालेह्‌का आस्‍ताङ. मति अद मोतातुन तमा इतेके कयतेला बोयिस ऊळोर.

5 “वेर तमाङ कतम कबस्‍किन लोकुर ऊळना इनजि कीस्‍तोर. देवुळता पोल्‍लो रासिसि निहच तासतव ताय्‍तिङ बेराङ-बेराङ पंडिसि, वेरु तमाङ डंडाकय्‍कनगा ओसो कपरतगा दोहतह्‌तोर. ओसो तमाङ गेंदे-कोङिह्‌कु लाट-लाट लासाङ वेळ्‍हतह्‌तोर. लोकुर वेरिन पका कर्तुळ इनदना इनजि वेर इह कीस्‍तोर. 6 वेरिह्‌क कुळ्‍पिनगा ओसो पार्तनाताङ लोह्‌कनगा बेरोर उदवालोराङ जागाङ गावले. 7 लोकुर वेरिन गोटुस्‍कनगा जोहर कीयना ओसो ‘गूरु’ इनदना, इद्रमताङ वेरिह्‌क बेसु.

8 “मति मीकु बोराय ‘गूरु’ इनमाकिर. बाराह्‌क इतेके नना ओर्वोनन मीवा गूरुनन, मीट मात्रम कतमतोरिर तमोग़-दादालोरिर मह्‌निर, मियगा उड्लोग़-बेरोग़ इलेर. 9 इद बूमते बोने मीटु ‘बाबा’ इनजि मान एमाटु, बाराह्‌क इतेके देवुळदीपते मनवाल मीवा बाबाल, ओन्‍के इद्रमता मान ईयनद ओप्पिह्‌ता. 10 ओसो मीकु बोराय ‘माल्‍का’ इनजि इनमाकिर. बाराह्‌क इतेके देवुळ लोहतोग़ पिसिह केवानन, ननाने मीवा माल्‍कानन आंदन. 11 मति देवुळता मुनेह मियगा सबेट्क बेरोग़ बोग़ आयलाह ऊळिह्‌तोग़, ओग़ मीवा सेवा केवाल आयेग़. 12 बोग़ तन्‍क बेरोग़ कीयनोग़, देवुळि ओन उड्‌लोग़ कीयग़ा. अहे बोग़ कुलुल बुदते ताकिह्‌तोग़, ओन देवुळ बेरोग़ कीयग़ा.

13 “ओर सास्‍त्रमगूरुरिर ओसो परुसिरिर, मीट सोङ केवालोरिर! देवुळि मीक पका सिक्सा ईयग़ा! बाराह्‌क इतेके देवुळता राजेमतके वावालोरा अग़ मीट केहतह्‌निर. मीट कुदवने ओळियविर, ओसो ओळियवालोरिन वने दाया एविर.

14 (“ओर सास्‍त्रमगूरुरिर ओसो परुसिरिर, मीट सोङ केवालोरिर! मीक बेचोटा गोसा आयग़ा! बाराह्‌क इतेके मीटु रांडे आस्‍कना सम्‍सरम तिन्‍ज मुळ्‍हतह्‌निर. ओसो सोङ कीतपु वेल्‍लाय जोम रोमवा पार्तना कीय्ह्‌निर. इदिनेनाह्‌क मीकु ओसो एक्‍वा सिक्‍सा आयग़ा.)* 23:14 मत्‍यल 23:14 इद पोल्‍लो मोदुल पोल्‍लोताङ उचुके काग्‍देह्‌कने मन्ह्‌ता, सबेटविस्‍कने इले.

15 “ओर सास्‍त्रमगूरुरिर ओसो परुसिरिर, मीट सोङ केवालोरिर! मीक बेचोटा गोसा आयग़ा! बाराह्‌क इतेक मीट दुस्रा-दुस्रा देसेह्‌कनगा वग़ोन कग़यवान दोर्किह कीयलाह इळ्‍ता बूमतुन पोग़ोन कीय्ह्‌निर. ओग़ दोर्कतस्‍के पया मीट ओनु मीकाय एक्‍वा पिववद किसबटटा सिक्‍सातुह्‌कु ओप्पनाह कीय्ह्‌निर.

16 “ओर ‘अग़ तोहतह्‌नोम,’ इनवालोर गुडिरिर! मीक बेचोटा गोसा आयग़ा! बाराह्‌क इतेके ‘बोग़ाय मंदिरता गूडटा किरिया कीतेके, ओन अद किरिया पोयो. मति बोग़ गूडटा बंगरता किरिया कीस्‍तोग़, ओन मात्रमि अद किरिया पोयतह्‌ता,’ इनजि मीट काग़्हतह्‌निर. 17 ओर बय्‍तळ गुडिरिर! गूडटगा मनाह्‌के अद बंगर पवित्र आस्‍ता, इतेके बेरा बेद, बंगरा, गूडिया? 18 ओसो ‘बोग़ मंदिरतगा गरियाता किरिया कीस्‍तोग़, ओन अद किरिया पोयो. मति गरियाता पोग़ोन वाटटदिना बोग़ किरिया कीस्‍तोग़, ओन अद किरिया पोयतह्‌ता,’ इनजि मीट काग़्हतह्‌निर. 19 ओर गुडिरिर! गरियातगा मनाह्‌के वाटटद मोक आयि, कोड आयि, पवित्र आस्‍ता, इतेके बेरा बेदु, गरियाया, बारा कोडिया? 20 अदिह्‌क बोग़ गरियाता किरिया कीस्‍तोग़, ओग़ु गरियातुनु ओसो गरियातगा वाटटद कतमतदिन किरिया कीस्‍तोग़. 21 ओसो बोग़ु मंदिरता गूडटा किरिया कीस्‍तोग़, ओग़ु अगा मोळ्‍कनद देवुळतुन किरिया कीस्‍तोग़. 22 ओसो बोग़ु देवुळदीपता किरिया कीस्‍तोग़, ओग़ु देवुळता राजगादेतुनु ओसो ताना पोग़ोन उदनदिन किरिया कीस्‍तोग़. अदिनेनाह्‌कु बेगातेला बेगा अद किरिया पोयतह्‌ताये!

23 “ओर सास्‍त्रमगूरुरिर ओसो परुसिरिर, मीट सोङ केवालोरिर! मीक बेचोटा गोसा आयग़ा! बाराह्‌क इतेके मीटु जीरा, सोप, इद्रमता पंटाता वने दहा तूस्‍कनग्‍डाहि उंद तूस देवुळतुह्‌क कोड ईय्ह्‌निर. मति सेतेमते नेयम कीयना, जीवा लोपना, देवुळतगा बर्वस तासना, इद्रमताङ सास्‍त्रमताङ मोदुल पोल्‍लोन मीट विळ्‍सतिर. मति अव उड्लाङ पोल्‍लोन वने माळनाय मता, ओसो इव मोदुल पोल्‍लोन वने माळनाय मता. 24 ओर ‘अग़ तोहतह्‌नोम,’ इनवालोर गुडिरिर! बोग़ बुसिन बारा वाळा पोस पोहतह्‌तोग़, मति रूटुमतुन बारा ऊळवा, गुस्‍क्‍ने लोपिह्‌तोग़, अद्रमलेह्‌का मीट उड्लाङ-उड्लाङ पोल्‍लोन पका नोमिह्‌‍निर, मोदुल पोल्‍लोन बारा मुर्तिय सीता केविर.

25 “ओर सास्‍त्रमगूरुरिर ओसो परुसिरिर, मीट सोङ केवालोरिर! मीक बेचोटा गोसा आयग़ा! बाराह्‌क इतेके मीटु गिनेङ-बट्‌किङ सिरप पलतेनाह तोमिह्‌‍निर, मति लोप्पाडेके इतेके ऊळ्‍बेते लोकुरिन जाळ्‍पिसि दोर्किह कीतद माल निंदिस मन्ह्‌ताङ. 26 ओर बुदते गुडिरिर परुसिरिर! मुने बट्‌कितुन लोप्पा तोमना, अस्‍के अद पलतवने वेडग़ा. अद्रमे मुने मीवा पोटालोप्पाडाङ विचर्क नेह्‌नाङ आयिङ, अस्‍के पया मीवाङ कबस्‍कवने नेह्‌नाङ मंदनुङ.

27 “ओर सास्‍त्रमगूरुरिर ओसो परुसिरिर, मीट सोङ केवालोरिर! मीक बेचोटा गोसा आयग़ा! बाराह्‌क इतेके मीटु पांड्रि चुना ओकताङ गुमयानलेह्‌का मह्‌निर. अव पलतेनाह इतेक पका सोबा दिसिह्‌ता, मति लोप्पाडेके ऊळतेके, सेत्तानाङ बोकाङ, कळियताङ-कळियताङ एग़्स्किसि किडुम पोस मन्ह्‌ताङ. 28 अहे मीटवने पलताहि लोकुरिह्‌क पका सेतेमतोरलेह्‌का दिसिह्‌‍निर. मति मीवा पोटालोप्पा नाळेह कीयनद बुद, पापम बुदि निंदिस मन्ह्‌ता.

29 “ओर सास्‍त्रमगूरुरिर ओसो परुसिरिर, मीट सोङ केवालोरिर! मीक पका सिक्सा आयग़ा! बाराह्‌क इतेके मीटु मुनेतोर देवुळताङ कबुरतोरिन ओसो सेतेमतोरिन मान ईयलाह, ओराङ गुमयाङ दोहतह्‌निर, अविस्‍किन सिंगर कीय्ह्‌निर. 30 अह कीसि मीट इह्‌निर, ‘माट मावाङ तादोर-बाबोरा कालमते मन्‍ज मतेके, देवुळताङ कबुरतोरिन हव्‍कवालोरा तोळ आयोम आवेरोम.’ 31 इह्‌निर वने ‘माट मुनेतोर कबुरतोरिन हव्‍कतोरा जालपिल आंदोम,’ इनजोर मीट कबुल आय्ह्‌निर, ओसो नावाङ केंजवोरिर आसि, मीवा तादोर-बाबोरा लाग्‍वा बुदतुन मीट विळ्सविर इनजि तोहतह्‌निर. 32-33 ए तरसविसमलेह्‌काडोरिर! ‘माट नेह्‌नाङ कीयनोम,’ इह्‌निर इतेके कीम्ह्‌टु! कीम्ह्‌ट, मीवाङ तादोर-बाबोरा लेह्‌का! ओरा सुरु कीतद पापमतुन मीट मारिह कीम्ह्‌ट! मति मीटु बगबग मळ्‍गनद किसबटटा सिक्‍साताहि बह पिह्‌ट अरयकिर? 34 केंजाट, नना मियके कबुरतोरिनु, सेहनलोरिनु, सास्‍त्रम काग़्हवालोरिनु लोहतकन. मीटु ओरिन उच्‍वुरिन हव्‍कनागुटातगा वेळ्‍हतकिर, हव्‍ककिर, ओसो उचवुरिनु मीवाङ सास्‍त्रम काग़्हतनव लोह्‌कने सोग़्‍पा-जूटटे नल्ह्‌तकिर, नल्ह्‌चि ओरिनु नाह्‌क-नाह्‌क कोहतकिर. 35 नना ओरिन बाराह्‌क लोहतकन इतेके बोर मुनेतोर सेतेमतोर लोकुरिन हव्‍कतोरु, ओरिन हव्‍कतद पापमता सिक्‍सा कतम मीवा पोग़ोन अरयना इनजि. ओर सेतेमतोर लोकुर बोर इतेके, सुरुमुने सेतेमते मतोग़ आबिल वेनग्‍डाह बर्काना मग़ि जकरिया बूमयानग एवनाह (वेने कोनि मंदिरता गरिया ओसो गूडटा नडुम हव्‍किस मतोर).† 23:35 आबिल इतेके मुनेतोग़ मन्कल आदमिना पेकाल, वेन तमदादाल हव्‍कतोग़, इद मुनेता हव्‍कतद कबळ आंदु. देवुळता पाळ्‍ना सास्‍त्रमते जकर्या बूमयान हव्‍कतद पोल्‍लो, इद सास्‍त्रमता मारेङा कितबते वेहतद मन्ह्‌ता. 36 इह केंजाट, नना वेहतह्‌नन, इव हव्‍कनाङ कबस्‍कना पूरा सिक्‍सा मीट नावाङ डीसाताङ कबस्‍किन ऊळतोरिर, इद पीळतोरगा अरयग़ा.

37 “येरुसलेमतोरिर, येरुसलेमतोरिर, देवुळता कबुरतोरिन हव्‍कवालोरिर, मियके देवुळ लोहतोर बळयिनोरिनु बंडाङ उकवालोरिर! बेद्रम तलोग़ कोग़ु तनाङ पीसेन अग़ोलिह्‌ता, अद्रमलेह्‌काने मीकु नयगा गुम कीयना इनजि बेचोको मल्‍काङ नावा विचर आंदु! मति मीट नाकु अह कीयलाह एविर. 38 केंजाट, मीवा मंदिर इम्‍ने आनाह देवुळि मीक विळ्‍सिस दायग़ा. 39 नना मीक वेहतह्‌नन, नना मल्‍स वायनस्‍के ‘देवुळबाबाना अदिकर पोस वावाह्‌कु देवुळता देय्‍वा आयि!’ इनजोर मीट इनदकिर, अचानाह नना मीवाङ कोंडाह्‌क मुर्तिय दिसोन आयकन.”