1 अद तूकने माट कग़यवालोरोम येसुनगा वास ताल्ह्‌कतोम, “देवुळ राजेम कीयना लोकुरगा मयग्‍डाहि सबेट्क बेरोग़ बोग़ मन्ह्‌तोग़, गूरु?” 2 अस्‍के ओग़ु ओर्विन उड्लोग़ पेकान केयिसि मावा नडुम निल्‍पिह कीतोग़. 3 अह कीस इतोग़, “इह केंजाट, नना वेहतह्‌नन, मीटु बुदते मिळ्‍न्‍दिसि, उड्लोर पेकोरलेह्‌का जीवाते कुलुल आयवालेवा, मीकु देवुळ राजेम कीयना लोकुरगा जागावन दोर्को आयग़ा. 4 अदिह्‌के बोग़ु वेग़ उड्लोग़ पेकाना लेह्‌का बुदते उड्ला आस्‍तोग़, ओग़े देवुळ राजेम कीयना लोकुरगा सबेट्क बेरोग़ आंदोग़. 5 इद्रम उड्लोग़ पेकानलेह्‌काडोनु, नावा पेदिर ओन्‍क अरताह्‌कु, बोर एरे कीस्‍तोर, ओरु नाक वने एरे कीतप आस्‍तोर. 6 उड्लोर पेकाना लेह्‌का नाक नमवालोरग्‍डाहि बोन आय वग़ोनु, ओना नयगा मतद विस्‍वसतुन विळ्‍सलाहि बोग़ कटळ वाटटप आस्‍तोग़, वेग़ कटळ वाटवाल देवुळता बेरा सिक्‍सात्‍कु ओजनोग़. वेना वेळेटगा पका पूहतद जेता बंडातुन दोहचि, वेन सम्‍दुरते वेल्‍लाह आता कसातगा मुळ्‍हतना, इद बेरा सिक्‍सा आंदु, मति तान्‍काय वीळिस बेरा सिक्‍सा देवुळि अद्रम कटळ वाटवाह्‌क ईयग़ा. 7 विस्‍वसतुन विळ्‍सलाह एग़्‍कुळ कीयनव पोल्‍लोनेनाह्‌कु दुनियातोरिह्‌कु पका गोसा आयग़ा. इद्रमताङ पोल्‍लोङ कोनि आयनुङे, निटमे! मति बोर दुस्रोरिन नाक विळ्‍सलाह एग़्‍कुळ आस्‍तोर, ओरिह्‌क देवुळ पका सिक्सा ईयग़ा.

8 “केंजाटु, नीवा कय आयि, काल आयि नीवा विस्‍वसतुन रोमिह कीतप कीतु बार इतेके, कयदुन-कादुन बोग़ाय डायिस पोहचीतेक बेस आवालि, इद्रम निमा ‘येसुनगा विस्‍वसतुन विळ्‍सोन,’ इनजि जिद कीमु. बाराह्‌क इतेके नीवा बोतिगा मेंदुलि पिववद किसबटटा सिक्‍सातगा दायना वाटो, कोलल आसि, कूटाल आसि अमेसाता पिसमुळते दायना, इदे नीक पाय्‍दाता. 9 अहे नीवा कोंडा नीवा विस्‍वसतुन रोमिह कीतप कीतु बार इतेके, कोंडातुन बोग़ाय पेग़्‍ह्‌चीतेक बेस आवालि, इद्रम निमा ‘येसुनगा विस्‍वसतुन विळ्‍सोन,’ इनजि जिद कीमु. बाराह्‌क इतेके नीवाङ रेंड कोंडाङ मनजि निमा पिववद किसबटटा सिक्‍सातगा दायना वाटो, उंदिय कोंडा मनजि अमेसाता पिसमुळते दायना, इदे नीक पाय्‍दाता!

10 “उसर मन्‍ह्‌ट, नाक नमवालोर उड्लोरिनु बोने बार मीट पोहचीतप ऊळमाटु. बाराह्‌क इतेके वेरिन ऊळनव देवतुल्‍कुदेवुळदीपते मन्ह्‌ताङ, अविस्‍किह्‌क अमेसा नावा बाबाना मुनेह अनजि वेहतलाह अदिकर मन्ह्‌ता, इदिन मीट सीताते तासाटु.

11 “(लेसतोरिनु पिसिह कीयलाहे, माने-मन्‍कना नडुम पुटटोनन, नना वातन.)* 18:11 मत्‍यल 18:11 इद पोल्‍लो मोदुल पोल्‍लोताङ उचुके काग्‍देह्‌कने मन्ह्‌ता, सबेटविस्‍कने इले. 12 मीट बह इह्‌निर, रा? बोग़ो ओर्विनगा नूर गोरेङ मताङ. पया अग्‍डाहि उंद गोरे वेलियनेक-वेलियनेक लेसता. पया अव पिसतवु उंद कमि नूर गोरेनु, मेटातग विळ्‍सिसि, अद उंद लेसतद गोरेतुन पर्ह्‌कलाहि ओग़ दायनोग़ा, अनोग़ा? 13 इह केंजाट, नना मीक वेहतह्‌नन, ओका वेला अद लेसतद गोरे ओन्‍क दोर्कतेके, लेसववु उंद कमि नूर गोरेह्‌काय एक्‍वा, इद दोर्कतद गोरेतेनाह्‌कु, पका गिर्दा कीयनोग़. 14 अद्रमलेह्‌काने, वेर उड्लोर विस्‍वसिर, ओर्वोग़तेला अमेसात्‍कु लेसनदायो, इद्रम देवुळदीपतोग़ मीवा बाबाना विचर मन्ह्‌ता.

15 “नीवा ऐंगेटोग़ विस्वसिना तपतेनाह्‌कु निमा नारज मतेके, ओनगा निमा अन, अनजि मीट ईविर नाटेनोरगा अनवाये, ओना तपतुन ओन्‍क तोहा. ओग़ नीवाङ केंजतोग़ इतेके, मीट ईविर गूनम आतिर, कलियतिर इतप आयग़ा. 16 मति ओका वेला ओग़ नीवाङ केंजवेके, निमा नीवा तोळ इर्वुर-मुवुर विस्‍वसिरिन पोसि, ओसो उंद मल्‍का ओनगा अन्‍ज ऊळा. बाराह्‌क इतेके ‘कम्‍सेकम इर्वुर-मुवुर मन्‍कलोरा साक्‍सिते नीवा पोल्‍लो करल आयग़ा.’ सास्‍त्रमवने इहे वेहतह्‌ता. 17 ओसो ओका वेला ओग़ कैंगम आसि ओराङ वन केंजवेके, विस्‍वसिरा तुंगातोरगा इद पोल्‍लोतुन वेहा. मुडा गोटटुन वन ओग़ केंजवेके, देवुळतुन नमवोर पर्गेर, सिद्‌वा एनवालोर, वेरिन ऊळतपु, ओन तपतोन वने ‘वेग़ मावोग़ आयोग़,’ इनजि अहे ऊळा.

18 “इह केंजाट, नना वेहतह्‌नन, इद्रमतोरगा मीट नेयम कीनेके मीटु ‘इद पोलिह्‌ता,’ ‘अद पोलो,’ इह वेहतेके, मीवा नेयमतगा देवुळता अदिकरवने मंदग़ा. 19 नना ओसो उंद पोल्‍लो मीक वेहतह्‌नन. मियग्‍डोर कम्‍सेकम बोराय इर्वुर विस्‍वसिर बेदाय पोल्‍लोतेनाह्‌कु इद बूमतगा उंद पट आसि देवुळतुन ताल्ह्‌कनुर अस्‍के, अद पोल्‍लोतुन नावा देवुळदीपतोग़ बाबाल कीयनोग़. 20 बाराह्‌क इतेके बेगा इर्वुर-मुवुर नावा पेदिरते गुम आस्‍तोर, अगा नना दिसवालेवा ओराङ केंजिह्‌नन,” इनजि येसु इतोग़.

21 पया पत्रु येसुनगा वास इतोग़, “गूरु, नावा ऐंगेटोग़ विस्‍वसि तपिसि नाक नारज कीसोर मतेके, नाक बेचोक मल्‍काङ ओनेनाह्‌क मापि कीया पोयतग़ा? एळुङ मल्‍काङ मापि कीकना?” 22 येसु ओन इतोग़, “आयो, सिरप एळुङे मल्‍काङ आयो, मति ओसो एळुङ मल्‍काङ, ओसो एळुङ मल्‍काङ, इद्रम लेकालेवा बेचोको मल्‍काङ मापि कीसोरेन मन.

23 “नना नीकु बाराह्‌क इद्रम इह्‌नन इतेके देवुळ राजेम कीयनस्‍के तना लोकुर ओर्विन-ओर्वोग़ मापि कीयनुर इनजि ताना विचर मन्ह्‌ता. इदिन काग़्हतलाह नना मीक उंद पीटो वेहतह्‌नन. वग़ोग़ राजाल मतोग़. ओग़ तनाङ सेवकिराहि करा ईतव कोताङ ताल्ह्‌कना इनजि विचर कीतोग़. 24 अह कीस ओग़ु इसब एतलाह आतोग़, अस्‍के बेचोको कोटिङ कल्‍दर रुप्‍याना करा एतोन राजानके पोस ततोर. 25 मति वेग़ करा एनवानगा करा देहतलाह बातय लेवाह्‌कु, ‘वेनु, वेना मुतेनु, वेनाङ पिलाङ-पेकोरिनु साकुर कीयलाह वमिसि, ओसो वेना मतद-लेवद सम्‍सरमतुनु कतमे वमिसि, वेग़ ना करा देहेग़,’ इनजि राजाल उकुम ईतोग़.† 18:25 अद तूकनोर मन्कलोर मन्‍कन साकुर कीयलाह वमिंदुर.

26 “अस्‍के वेग़ सेवकि राजानाङ काल्‍क अरसि, ‘ओसो उचुक दियाङ रोमिस मनु, महरज, नना पया नीवा कतम करा देहतकन,’ इनजि काल्‍गडेम अरतोग़. 27 इदिन ऊळिसि, वेग़ सेवकिना राजाह्‌कु मान वसता. वेनु विळ्‍सिसीसि, तना करातुन मापि कीतोग़.

28 “मति वेग़ सेवक पया बार कीतोग़? अग्‍डाह पेसिस वानेके, वेन्‍क तना ऐंगेटोग़ सेवक कलियतोग़. वेनाङ ओग़ सिरपि नूर दियाना कूलि अचोके कोताङ करा वेन्‍क ईयना मता. अस्‍के वेग़ु ओना तोळ्‍सातुन पोसि दोबेङ-नूकेङ कीसोर इतोग़, ‘निमा नाक ईयना मन्ह्‌ता, नावा करातुन चिट्पट देहचीम,’ इनजि पळ्मिङ ईतोग़. 29 ईतस्‍के वेना ऐंगेटोग़ सेवक वेनाङ काल्‍कनगा गप अरस इतोग़, ‘निमा उचुक दियाङ रोमिस मनु, पया नना नीवा करातुन देहतकन,’ इनजोर इतोग़. 30 तेला मति वेग़ ओनाङ केंजवालेवा, ओन ओसि तना पूरा करातुन देहनाह्‌जोमु जेलते ओळ्‍ह्‌चीतोग़.

31 “इदिन ऊळिसि तना ऐंगेटोर सेवकिर पकाय नारज आतोर, नारज आसि इव कतम गोटिङ राजानगा अनजि वेहचीतोर. 32 अस्‍के ओग़ राजाल वेन सेवकिन तनगा केयिसि इतोग़, ‘ए जीवा लोपवोनिन, निमा ऊळा, नावाङ काल्‍क मोळ्‍कताह्‌कु, नाक ईयना नीवा बेह्‌रा करातुन नना विळ्‍सिसि मापि कीसीतन. 33 नना नीकु बेद्रम जीवा लोपिसि विळ्‍सिसीतन, अद्रम निमावने नीवा तोळतोनु जीवा लोपिस विळ्‍सनद आयोया?’ 34 पया राजाल वेना पोग़ोन पका ओङ आसि, वेग़ कतम करा देहनाह्‌जोमु, वेनु सिक्‍सा केवालोर दरोगलोरा कयदे ईसीतोग़.

35 “अदिनेनाह्‌क मीट सबेटोरिर मीवा ऐंगेटोर विस्‍वसिरिन मीवा जीवाताहि मापि केविर इतेके, नावा देवुळदीपतोग़ बाबाल मीक वने इहे सिक्‍सा कीयनोग़,” इनजि येसु माक कग़यवालोरिन इतोग़.