1 गुड्रापोग़ोटाहि येसु तनाङ कग़यवालोर बार इळ्‍न रेगतस्के मांदि ओना पेंडेस-पेंडेसे मंदुर. 2 अस्‍के ओर्वोग़ मोंडरोगमतोग़ ओनगा वासि “बाबा, नीवा विचर मतेके नाक सव्रे कीसि नावा कळ्वोग़तुन तेंड पग़यकिन,” इनजोर येसुन दंडुम अरसि इतोग़.

3 “अह इतेके अले, नावा विचर मन्ह्‌ताये! निमा बेस आम,” इनजोर येसु इतोग़. पया यहुदिरा मोंडरोगमतोन इटवद नोमळता अडोतुन नोमवा येसु ओन कय आहच बोयतोग़. अस्‍के चट्नेन ओना मोंडरोगम मायता. 4 “इंजेके मोंडरोगम सव्रेम आता लोप्‍पाड्‌क मोक ईयलाह मोसानाङ अडोङ मतपु निमा कुदि अनजि ‘बेस आतन,’ इनजि बूमयाह्‌क मात्रम तोहा. बूमयानके अनेके इद पोल्‍लोतुन बोन्‍के बह वेहमा. ‘सव्रेम आताह्‌कु मोक ईतोग़,’ इनजि बूमयाल सबेटोरिह्‌क वेहतनोग़, अस्‍के नियगा मोंडरोगमता कळ्‍वोग़ मनो आयग़ा, नीकु देवुळतुन मोळ्‍कलाहि पोलग़ा,” इनजोरे मोंडरोगमतोन येसु इतोग़.

5-6 पया येसु कापेर्नाग़ वातस्‍के ओर्वोग़ लळयमुडा साय्‍बल ओनके वासि काल्‍गडेम अरसोर साय्‍ता ताल्ह्‌कतोग़, “ओ गूरु, नावा साकुर केवाल कय-काल वावा वेल्‍लाय दुकते अरसि लोते ऊल्गसोर मन्ह्‌तोग़,” इतोग़. 7 अस्‍के येसु साय्‍बान इतोग़, “नना वासि ओनु सव्रे कीकन,” इनजि इतोग़.

8-9 अस्‍के वेग़ साय्‍बाल येसुन इतोग़, “गूरु, नना यहुदि जाततोनन आयोन, अदिह्‌के निमा नावा लोनलोप्पा वायना ओपविन. नना वने ओर्विना कय इळ्‍न मनजि, नावा कय इळ्‍न सीपय्‍क मन्ह्‌तोर. नना वग़ोग़ सीपयिन ‘अन!’ इनजोर वेहतेके ओग़ दास्‍तोग़, ओसो दुस्रोनु ‘वाय!’ इनजोर केयतेके ओग़ वास्‍तोग़. अहे नावा साकुर केवानु ‘इद कीम, रा!’ इनजोर वेहतेके अद कबळतुन ओग़ कीस्‍तोग़े. इद्रमि, इद रोगमता पोग़ोन नीवा अदिकर मन्ह्‌ता, निमा मात्रम उंद पोल्‍लो वळ्ह्‌कतिन इतेके नावा साकुर केवाल सव्रेम आयनोग़,” इनजोर इतोग़.

10 इद पोल्‍लोतुन केंजिसि येसु पकाय बामतोग़. अस्‍के तना पयाह वावालोर मुडुन इतोग़, “इह केंजाट, नना वेहतह्‌नन, इचोटा बेरा विस्‍वस नाकु मावा इस्रयेलतोरगा बोनगान बह दिसो!* 8:10 वेग़ लळयमुडा साय्‍बल इस्रयेल देसेमतोग़ आयोग़, मति देवुळता सास्‍त्रम पुनवोग़ु दुस्रा देसेमतोग़ आंदोग़. वेग़ रोम सर्करता सेवातुह्‌कु इस्रयेलते वासि. 11 इदे निटम पोल्‍लो, मीट केंजाटु, वेग़ साय्‍बानलेह्‌काडोर यहुदि आयवोर वेल्‍लाटोर ईनाह-आनाह गुम आयनुर, आसि देवुळदीपता राजेमतगा मावाङ मुनेतोर पेदल्‍क अब्रहमि, इसकि, याकुबि, वेरा बतते उदनुर. 12 मति ‘माट इस्रयेलतोरोम इनजि देवुळदीपते नेङकोम,’ इद्रम इनवालोर उय्‍तुरिन देवुळ मनवदु ईकळता जागाते देवुळि पलत पोहचीयग़ा. अगा ओरु अळयना, पल्क कोग़्कना कीयनुर.”

13 पया लळयमुडा साय्‍बान येसु इतोग़, “अले, निमा लोन अन, निमा विस्‍वस कीतपु नीवा साकुर केवाल बेस आयेग़,” इतोग़. अदे गट्काते वेग़ साय्‍बाना साकुर केवाल सव्रेम आतोग़.

14 येसु पया तनाङ कग़यवालोर बार सिमोन पत्रुना लोन अतोग़, अस्‍के पत्रुना आतो पकाय दंडटे कटुदगा टेटेम अरस मता. 15 अस्‍के येसु ताना दंटुन ऊळिसि ताना कयदुन बोयताहे दंड रेगता. पया अद तेदिसि ओरिह्‌क जावा-एग़ कीसीता.

16 अदे दिया मुलतस्‍के वेल्‍लाटोरिन देयह्‌क-बूताह्‌कु पोयतोरिनु येसु बेस कीयनोग़, इनजि लोकुर ओनगा ततोर. ततस्‍के देयह्‌किनु येसु तना तोडटा उकुमते पूंडटोग़ ओसो सबे दुकह्‌लोरिन सव्रे कीसीतोग़. 17 इद्रमि यसयाल इनवाल मुने रासतदु देवुळता कबुर इंजेके करल आता, अद कबुर इह मन्ह्‌ता:

18 पया येसु तना सर्ने वेल्‍लाय मुल मन्ह्‌तोर इनजि ऊळतोग़, ऊळिसि तना ऐंगेटोरिनु “गालिल सम्दुरता अबर बाजे दाकल,” इनजि वेहतोग़. 19 अस्‍के ओर्वोग़ सास्‍त्रमगूरु येसुनगा वासि इतोग़, “गूरु, निमा बेके दाकिन, अकेन नना नीवा संगे वायकन,” इतोग़. 20 मति येसु ओन इतोग़, “कोय्लेस्किह्‌क मनदलाह बार गळ्‍दाङ, पिटेह्‌क मनदलाह बार गूडाङ मन्ह्‌ताङ. मति नना माने-मन्‍कना नडुम पुटिसाय मति, नाक तला रोयिह कीयलाह वने जागा इले. इतेके निमा ओसोवने नावा संगे वायलाह ऊळिह्‌‍निना?”† 8:20 माने-मन्‍कना नडुम पुटटोग़ु इतेके येसुये. माने-मन्‍कना नडुम पुटटोग़ु इद पोल्‍लोता अर्तम पुनदलाह पुस्तकिना आक्रिते पुनवव पोल्‍लोना अर्तमि रासतव मन्ह्‌ताङ, अगा ऊळाटु.

21 पया दुस्रोग़ ओनाङ कग़यवाल ओन इतोग़, “गूरु, नना नीवा संगे वायकन, निटमे. मति मुने नाक बाबाना लोन दायलाह ईमु. बाबाल हायनोग़ अस्‍के नना ओन पोहचि नियके वायकन” इह ताल्ह्‌कतोग़. 22 “आयो, निमा नावा संगे इंजेके वाय. देवुळता जीवालेवोरु हातपे मन्ह्‌तोर, ओरे तमाङ हातोरिन पोहिर!” इनजि येसु ओन इतोग़.

23 अस्‍के पया तनाङ कग़यवालोरा संगे येसु ओडाते उदिसि अबर बाजे दायलाह पेसतोग़. 24 अनेक-अनेके दोम्‍क्‍नेने सम्दुरतगा बेरा दूंदि वाता, वासि एताङ लचाने ओडातुन कोळ्‍ङिह कींदु. मति येसु इसि पर्वालेवा उंजिस मतोग़. 25 अस्‍के ओर कग़यवालोर येसुनगा एरे वासि ओन तेहतोर. “ए गूरु, माक पिसिह कीमु, माट मुळ्न्दिह्‌नल!” इनजोर केयतोर. 26 अस्‍के येसु उंजिस तेदताहे ओरिन इतोग़, “एय विस्‍वस लेवोरिर, नयगा मीक पिसिह कीयलाह लाव मन्ह्‌ता इनजि मीट पुनविरा, मीट पया बार्किया रेयतिर?” इद्रम इतोग़. पया ओग़ नितोग़, निचि अद दूंतुन, एतुन वेग़्हतोग़, अस्‍के दोम्‍क्‍नेन दूंद-मुर्गम मायता, अहे सबे मेलियनाङ बाताङ मेर्क्ने आताङ. 27 तेन ऊळिस कग़यवालोर पकाय बामतोर. वेर पया इनदलातोर, “वेनाङ पोल्‍लोनु वळ्‍यु, लचाङ केंजिह्‌ताङ इतेके वेग़ बेद्रमतोग़ मन्कल मंदनोग़?”

28 पया सम्दुरता अबरि गदरे इनदनद एरियातगा ओर एवतोर. अगा हातोरिन पोहतलाह पांजाङ मताङ. ओर एवतस्‍के अव पांजानाह इर्वुर देयह्‌क पोयतोरु पेसिस वानेके ओन्‍क कलियतोर. वेर इर्वुर इचोन आकाङ-दोकानोर मंदुर इतेके वेर मनदनद अग़दुह्‌कु बोग़े बह दाया पग़वोग़ आंदोग़. 29 येसुन ऊळिसि वेर पकाय जोरते केयतोर, “एय देवुळता मग़निन, निमा बार्किया माक अडम आय्ह्‌निन? नेयमता कगो एवयना मुनेन निमा माक सिक्‍सा ईयलाह वातिना? 30-31 मति निमा माक पूंडना मतेके ओके ऊळा, वेल्‍लाय जेक गोह्‌ड पदिङ मेयिह्‌ताङ, अके माक लोह्‌चीमु,” इनजोरे देयह्‌क येसुन काल्‍गडेम अरताङ. 32 अस्‍के येसु “अन्ह्‌ट, पेसाट!” इतोग़, इताहे देयह्‌क चट्नेन पेसिस पदिना गोह्‌डटगा तुर्म्ने नेङताङ. अस्‍के गोह्‌ड पदिङ अद कुहलेह्‌काडा मेटा ओळ्‍सिये हायेङ-पिसेङ आसोर सम्दुर कचुल वित बोटटाङ. एतगा पया कुबोग़ इनाह अरसि कतमे मुळ्‍न्‍दिस डोलताङ. 33 पदिङ मेहवालोर पया इद उब्‍ता-उबिय आता पोल्‍लोतुन तमा नाटे वेहतलाह विततोर. देयह्‌क पोयतोरा लोप्पा बाताल-बाताल बह आता, इदिन पूरा नाटेनोरिह्‌क वेहतोर. 34 वेहतस्के मावाङ कतम पदिङ बूळेम आताङ, इनजि अग्‍डोर पूरा नाग़मेटोर रेयतोर, रेयिसि येसुनगा वासि कलियतोर. ओन कलियिसि इतोर, “मयगा मनमा निमा, मयग्‍डाह पेसिसि अबर बूम अन,” इनजोर येसुन कट्ला कीतोर.