13
देवुळतुह्क विचर वानाह बह पिसना
1 मीट उंदिय लोतोरा लेह्कान ओर्विह्क-ओर्वोग़ जीवा कीसोर मन्ह्टु. 2 अग़दुह्क अनवालोर विस्वसिर मियगा वातेके, ओरिन पुनवेक तेला बेस ऊळाटु, बह इतेके इद्रम कीसि उच्वुर मन्कलोर पुनवालेवाये देवतुल्किह्क वने जावा-एग़ कीसीतोर.
3 तमा विस्वसतेनाह्क जेलते मनवालोरिन माग़्ङमाट. मीट वने ओरा संगे जेलते मनदना लेह्कान विचर कीम्ह्टु. तमा विस्वसतेनाह्क उच्वुर मन्कलोर तिपल आस्तोर, मीट कुदि तिपल आतप लेह्का ओरिन सीता कीम्ह्टु.
4 देवुळि सबे रीतिनाङ सिंड्रि-साट्याल कबस्क केवालोरिन नेयम कीयग़ा. अदिनेनाह्क मुते-मुजो देवुळता मुनेह किरिया कीतपु ऐंगेन सेतेमते मनदना गावले.
5 देवुळि कुदि इद्रम इता:
“नना नीक बेस्केन विळ्सोन;
नीक बेस्केन अय केवा मनोन,”✡ 13:5 व्यवस्थाविवरण 31:6; यहोशू 1:5
इनजोर इता. अदिनेनाह्क मीट कोताना लालुसते मनमाट. मियगा बाताल मन्ह्ता, तानवटेन गिर्दाते मन्ह्टु. 6 देवुळि इताह्कु, माट वने
“सामि नाक साय्ता कीस्ता;
नना बेस्केन रेयोन;
माने-मन्कल नाक बाताले कीया पग़वोग़,”✡ 13:6 देवुळताङ पाटाङ 118:6; 56:11
इनजोर दीराते इनदा पग़यह्नल.
7 मीक देवुळता पोल्लोतुन वेहचि, अग़ तोहतोरिन सीता कीम्ह्टु. ओरा ताकमुळतुन विचर कीस ऊळाट; ओर देवुळता पोग़ोन आक्रि एवनाह विस्वस तासिस मतप लेह्कान मीट वने विस्वस तासाट. 8 येसु किर्स्तु मुने वने, इंजेक वने, अमेसा-अमेसातुह्क बेस्केन वने बद्लेम आयवाल आयोग़. 9 अदिह्क बोग़ाय वासि मीट पुनवव, पूनाङ पोल्लोङ काग़्हचि मीक देवुळता सेतेम पोल्लोताहि लेसिह कीयलाह एमाटु. इव तिनदनव, इव तिनवव इनजोर मन्कलोर वेहतनव अडोन केंजताह्क आयो; मति देवुळि मीक दया कीताह्कु मीवा जीवा मेग़्कनद बेसु. अद्रमताङ अडोन केंजिसि ताकवालोरिह्क बातालाय दोर्कताया? बाताले दोर्को! 10 येसु डोलिस मनजि तना नेतुर ईतदिन विस्वस कीतल. तान विस्वस केवालेवा, मोसानाङ अडोना इसबते सेवा केवालोर बूमयालोरिह्क मावा बर्कततगा कलियलाह अदिकर इले. 11 पापमतुन मायिह कीयलाहि जन्वर्कना मोक ईस्तोर. मोक ईतापया पेर्माल नेतुरतुन सबेट्क पवित्र जागातगा ओस्तोग़; अविस्कनाङ मेंदुस्किन बार तमा डेराता अबर बोळ्सिह्तोर.✡ 13:11 लैव्यव्यवस्था 9:11; 16:27 12 अद्रमलेह्काने येसु वने, तना नेतुरते मन्कलोरा पापमतुन एडिह कीयलाहि, येरुसलेम सहरता पलते तिपल आसि डोलतोग़.
13 इंजेक माट वने ओग़ लजा अरतप लेह्कान लजा अरयकल. ओना संगे पलते दायना लेह्कान, पाळ्ना करलता नोमळतुन विळ्सिसि, अद करलतुन नोमवालोरा मुनेह कदरलेवा मनदलाह माट तयर आयकल.* 13:13 इद सीटि यहुदि विस्वसिरिह्क रासतद मता, ओर पाळ्ना करलतुन विळ्सतेके अद करलतुन नोमवालोर यहुदिर, ओर विस्वसिरिन जेक तासेर. अह आसि ओर विस्वसिरिह्क तमाय जाततोरा कदर दोर्को आवालि. 14 इद बूमतगा माक अमेसातुह्क मनदलाह बेदे नाग़ इले. माट कोनि इंजेके पोग़ोटा सहरते मनदकल इनजोर ताना अग़ ऊळिह्नल. 15 अदिनेनाह्क माट येसु कीतदिन सीता कीसि, देवुळतुन अमेसा जोहर कीयिङ. मावा तोडटे ताना पेदिर पोयतकल. इद तानेनाह्क मोक ईतप लेह्कान आस्ता. 16 ओसो बेसताङ कबस्क कीयनदिन, आपुना मादुन ओर्विह्क-ओर्वोग़ तूसनदिन विळ्समाट. इव वने देवुळतेनाह्क मोक ईयना लेह्कान मन्ह्ताङ. इविस्कने अद गिर्दा आस्ता.
17 मीवा मुडा मुक्यालोर, मीवाङ जीवाना राका कीस्तोर. तमा कीयनद इद कबळता लोप्पा, ओर देवुळतुह्क इसब ईयनुर. अदिनेनाह्क इद कबळतुन ओर नारजते आयो, मति गिर्दाते कीयनाह, ओरा पोल्लोते वरेम आस मन्ह्टु. ओर नारज आस कीतेके, मीक बाताले पाय्दा दोर्को आयग़ा.
18 माट कसुरलेवप ताकिह्नोम इनजोर मावा जीवा पुन्ह्ता. सबे पोल्लोने माट देवुळतुह्क ओप्पनाह कीयलाह ऊळिह्नोम. इदिनेनाह्क मयेनाह्क पार्तना कीसोर मन्ह्टु. 19 मियगा चट्पिट वायलाह नाक अग़ दोर्कि इनजोर पार्तना कीसोर मन्ह्टु, इनजि नना मीक अर्जि कीय्ह्नन.
20-21 सुकम ईयनद देवुळि तना विचर कीतप लेह्का मीट कीयनाह, मीक सबे बेसताङ पोल्लोङ ईयि. येसु किर्स्तुना मेटे मावा ताकमुळतगा तान्क विचर वातव पोल्लोङ आयिङ. किर्स्तु येसुना नेतुरता मेटे देवुळि मावा संगे अमेसातुह्क मनदनद पूना करलतुन निल्पिह कीयलाह आता. इद पूना करल नितना इनजि देवुळि येसुन ओसो वने हामुरताहि जीवा अर्हता, इद्रमि येसु किर्स्तु मावा बेरोग़ कोपाल आतोग़. ओने मन्कलोर अमेसा-अमेसातुह्क मान ईयिर. आमेन.
आक्रिताङ पोल्लोङ
22 मावोर विस्वसिरिर! नना मीक बेरा लाट सीटि रासोन. नना मीक बुदि काग़्हचि, रासतद पोल्लोतुन सीता कीसोर केंजाट इनजि मीक अर्जि कीय्ह्नन. 23 मावा ऐंगेटोग़ तिमोति जेलताहि पेसतोग़, इदिन मीट पुनदना इनजि कबुर वेहतह्नन. ओग़ इगा चट्पिट एवतेके, माट ऐंगे मियगा वायकोम.
24 मीवा मुक्यालोर सबेटोरिन ओसो मियग्डोर देवुळता मन्कलोर सबेटोरिन जय येसु इन्ह्टु. इतालिया पटटोर विस्वसिर मीक जय येसु इनदलाह आतोर.
25 देवुळता देय्वा मीट सबेटोरगा मनि. आमेन.
✡13:5 13:5 व्यवस्थाविवरण 31:6; यहोशू 1:5
✡13:6 13:6 देवुळताङ पाटाङ 118:6; 56:11
✡13:11 13:11 लैव्यव्यवस्था 9:11; 16:27
*13:13 13:13 इद सीटि यहुदि विस्वसिरिह्क रासतद मता, ओर पाळ्ना करलतुन विळ्सतेके अद करलतुन नोमवालोर यहुदिर, ओर विस्वसिरिन जेक तासेर. अह आसि ओर विस्वसिरिह्क तमाय जाततोरा कदर दोर्को आवालि.